తెలంగాణ నుంచి ఈ సారి ఏకంగా ఏడుగురికి పద్మ అవార్డులు

కేంద్ర ప్రభుత్వం 2026 సంవత్సరానికి గానూ ప్రకటించిన అత్యున్నత పౌర పురస్కారాల్లో తెలంగాణ రాష్ట్రం తన ప్రత్యేకతను చాటుకుంది. గణతంత్ర దినోత్సవం సందర్భంగా విడుదల చేసిన ఈ జాబితాలో వివిధ రంగాల్లో విశిష్ట సేవలు అందించిన తెలంగాణ ప్రముఖులకు గౌరవం లభించింది. దేశవ్యాప్తంగా మొత్తం 131 మందికి అవార్డులు ప్రకటించగా, అందులో 5 పద్మ విభూషణ్, 13 పద్మ భూషణ్ మరియు 113 పద్మశ్రీ పురస్కారాలు ఉన్నాయి. ఇందులో ఏపీ నుంచి 4 గురికి పద్మ అవార్డులు దక్కాయి.

తెలంగాణ ప్రతిభకు దక్కిన గౌరవం..

తెలంగాణ నుంచి ఎంపికైన వ్యక్తులు కేవలం ఒకే రంగానికి పరిమితం కాకుండా సైన్స్, వైద్యం, కళలు మరియు వ్యవసాయ అనుబంధ రంగాల్లో తమదైన ముద్ర వేశారు. ముఖ్యంగా సైన్స్ అండ్ ఇంజినీరింగ్ విభాగంలో చంద్ర మౌళి గడ్డమానుగు, కృష్ణమూర్తి బాలసుబ్రహ్మణియన్ , కుమారస్వామి తంగరాజ్‌లకు పద్మశ్రీ పురస్కారాలు లభించాయి. వీరు పరిశోధనా రంగంలో చేసిన కృషి అంతర్జాతీయ స్థాయిలో గుర్తింపు పొందింది.

వైద్య రంగంలో సామాన్యులకు సైతం అత్యాధునిక చికిత్సలను అందుబాటులోకి తెచ్చిన గూడూరు వెంకట్ రావు.. ప్రముఖ క్యాన్సర్ నిపుణులు పాల్కొండ విజయ ఆనంద్ రెడ్డిలకు ఈ అత్యున్నత పురస్కారం దక్కింది. వీరి సేవలు ఆరోగ్య రంగంలో తెలంగాణ పేరును మరింత ఉన్నత స్థానంలో నిలిపాయి. అలాగే కళాకారిణి దీపికా రెడ్డికి కూచిపూడి నృత్య రంగంలో ఆమె చేసిన అద్భుత ప్రదర్శనలకు గానూ కేంద్రం ఈ గౌరవాన్ని అందించింది. ఈ ఏడాది అవార్డుల్లో మానవత్వానికి పెద్దపీట వేస్తూ పశుసంవర్ధక రంగంలో నిస్వార్థ సేవలు అందించిన రామారెడ్డి మామిడికి మరణానంతరం పద్మశ్రీ ప్రకటించడం విశేషం. పశువుల సంరక్షణ, పాడి రైతుల సంక్షేమం కోసం ఆయన చేసిన పోరాటం మరువలేనిది.

సాధారణంగా పద్మ అవార్డుల ఎంపికలో ఈసారి కూడా క్షేత్రస్థాయిలో పనిచేసే వ్యక్తులకు ప్రాధాన్యత లభించింది. ఈ పురస్కారాలు కేవలం వ్యక్తులకు దక్కిన గౌరవం మాత్రమే కాదు.. రాబోయే తరాలకు ఇవి గొప్ప స్ఫూర్తినిస్తాయి. సమాజం కోసం నిజాయితీగా పనిచేసే వారిని ప్రభుత్వం ఎప్పుడూ గుర్తిస్తుందని ఈ అవార్డుల జాబితా నిరూపించింది.

తెలంగాణ నుంచి పద్మ అవార్డులు పొందిన వారి పూర్తి లిస్ట్ ఇదే..

1. చంద్ర మౌళి గడ్డమానుగు,

2. శ్రీమతి దీపికా రెడ్డి,

3. గూడూరు వెంకట్ రావు,

4. కృష్ణమూర్తి బాలసుబ్రహ్మణియన్

5. కుమారస్వామి తంగరాజ్

6. పాల్కొండ విజయ ఆనంద్ రెడ్డి

7. రామారెడ్డి మామిడి (మరణానంతరం)