కండలు పెంచేందుకు విచ్చలవిడిగా స్టెరాయిడ్స్.. సీపీ సజ్జనార్ స్ట్రాంగ్ వార్నింగ్

బరువు తగ్గాలని అనుకునే వాళ్లు, ఫిట్‌నెస్ ఫ్రీక్స్ జిమ్‌లకు వెళుతుంటారు. ఇక చక్కచి శరీర ఆకృతి కావాలనుకునే వారు కూడా జిమ్‌ల్లో బరువులెత్తుతూ కష్టపడతారు. ముఖ్యంగా యువత బాడీ బిల్డింగ్, మజిల్స్ పెంచడం కోసం జిమ్‌లో చేరుతుంటారు. ఇలాంటి వారిని ఆసరాగా చేసుకుని కొత్త దందాలకు తెరలేపుతున్నారు కొందరు అక్రమార్కులు. సప్లిమెంటరీల పేరుతో స్టెరాయిడ్స్ ఇస్తున్నారు. మొదట ప్రోటీన్ పౌడర్ల పేరుతో యువతకు 3, 6 నెలల కోర్సులు అంటూ అలవాటు చేస్తున్నారు. ఇలా వైద్యులు సూచించకుండా, యువతకు అక్రమంగా స్టెరాయిడ్స్ ఇంజెక్షన్స్ విక్రయిస్తున్న మహ్మద్ ఫైజల్ ఖాన్ (25) అనే యువకుడిని వెస్ట్ జోన్ టాస్క్ ఫోర్స్ పోలీసులు అరెస్ట్ చేశారు.

పోలీసులు తెలిపిన వివరాల ప్రకారం.. జనవరి 26న హైదరాబాద్ అత్తాపూర్‌లో అక్రమంగా స్టెరాయిడ్ ఇంజెక్షన్లను వ్యక్తిని పోలీసులు అరెస్ట్ చేశారు. అతడి నుంచి రూ. 1.6 లక్షల విలువైన స్టెరాయిడ్ ఇంజెక్షన్లు స్వాధీనం చేసున్నారు. వేగంగా కండలు పెంచుకోవాలనే యువత ఆశను ఆసరాగా చేసుకుని.. నిందితుడు లైసెన్స్, వైద్యుల ప్రిస్క్రిప్షన్ లేకుండా స్టెరాయిడ్ ఇంజెక్షన్లు విక్రయిస్తున్నట్లు గుర్తించారు. కాగా ఈ స్టెరాయిడ్లను సూరత్‌ నుంచి ఇండియా మార్ట్ ద్వారా కొనుగోలు చేస్తున్నట్లు తెలిపింది. అనంతరం సిటీ యువతకు అధిక ధరలకు అమ్ముతున్నట్లు విచారణలో నిందితుడు అంగీకరించినట్లు పోలీసులు తెలిపారు.

కవిత రూపంలో సజ్జనార్ వార్నింగ్..

కాగా, త్వరగా కండలు పెంచాలనే ఆశతో చాలా మంది యువకులు షార్ట్‌కట్ మార్గాలు వెతుకున్నారు. అందుకోసం అడ్డదారులు తొక్కుతున్నారు. అలాంటి వారికి కవిత రూపంలో వార్నింగ్ ఇచ్చారు హైదరాబాద్ సీపీ వీసీ సజ్జనార్. "ప్రిస్కిప్షన్ కె బినా స్టెరాయిడ్ లేనా మత్లబ్.. బాడీ నహీ, బర్‌బాదీ బనానా. సిక్స్ ప్యాక్ కే లియే లివర్, కిడ్నీ, ఫ్యూచర్ కొ కుర్బాన్ మత్ కరో రె జవానో!" అంటూ కవిత రూపంలో వార్నింగ్ ఇచ్చారు సీపీ సజ్జనార్. (డాక్టర్ సూచించకుండా స్టెరాయిడ్స్ తీసుకుంటే బాడీ పెరగదు సరికదా.. ఇంకా నాశనం అవుతుంది. సిక్స్ ప్యాక్ కోసం లివర్, కిడ్నీ, భవిష్యత్తును నాశనం చేసుకోకండి).

స్టెరాయిడ్స్ దుర్వినియోగం చేయడం వల్ల అది వ్యసనంలా మారుతుందని సజ్జనార్ తెలిపారు. శరీరంలోని అవయవాలకు కూడా నష్టం కలిగిస్తుందన్నారు. వంధ్యత్వం (ఇన్‌ఫెర్టిలిటీ), మరణానికి కూడా దారితీస్తుందని హెచ్చరించారు. ఫిట్‌నెస్‌కు క్రమశిక్షణ అవసరమని.. ప్రమాదకరమైన షార్ట్‌కట్ మార్గాలు కాదని చెప్పారు. వేగంగా కండలు పెంచడం.. మీ ప్రాణాలను పణంగా పెట్టడం కంటే విలువైనది కాదన్నారు. యువత ఇలాంటి విషయాల గురించి తెలుసుకోవాలని.. సురక్షితంగా ఉండాలని చెప్పారు. అక్రమ మాదకద్రవ్యాల అమ్మకాల గురించి తెలిస్తే తమకు సమాచారం ఇవ్వాల్సిందిగా విజ్ఞప్తి చేశారు.