క్రికెట్ మాత్రమే కాదు.. టెన్నిస్‌లోనూ మెరుపులు

సీనియర్ ఐపీఎస్ అధికారి సీవీ ఆనంద్ గురించి ప్రత్యేక పరిచయం అక్కర్లేదు. ప్రస్తుతం ఆయన తెలంగాణ హోం శాఖ ప్రత్యేక ప్రధాన కార్యదర్శిగా వ్యవహరిస్తున్నారు. విధి నిర్వహణలోనే కాదు.. ఆటల్లోనూ ఆయన మేటి అనే సంగతి తెలిసిందే. ముఖ్యంగా సీవీ ఆనంద్ మంచి క్రికెట్ ప్లేయర్ అని ప్రత్యేకంగా చెప్పాల్సిన పని లేదు. 50 ఏళ్లు పైబడినప్పటికీ కుర్రాళ్ల తరహాలో క్రికెట్ ఆడుతుంటారాయన. సీవీ ఆనంద్ గురించి మరో విషయం ఏమిటంటే.. క్రికెట్ మాత్రమే కాదు ఆయనకు టెన్నిస్, గోల్ఫ్‌లోనూ మంచి అనుభవం ఉంది. క్రీడలతో పాటుగా యోగా, ధ్యానంతో ఎల్లప్పుడూ ఫిట్‌గా ఉంటారు.

క్రికెట్‌లో మాత్రమే కాదు తాజాగా టెన్నిస్‌లోనూ మెరుపులు మెరిపించారు సీవీ ఆనంద్. హైదరాబాద్ వేదికగా 23వ హైదరాబాద్ ఓపెన్ టెన్నిస్ అసోసియేషన్ పోటీలు జరుగుతున్నాయి. ఈ పోటీలలో 55 ప్లస్ విభాగంలో సింగిల్స్ కేటగిరీలో బరిలోకి దిగారు సీవీ ఆనంద్. బరిలోకి దిగటమే కాదు ఏకంగా ఫైనల్ వరకూ చేరుకున్నారు. ఈ విషయాన్ని ఆయన తన ఎక్స్ అకౌంట్ ద్వారా వెల్లడించారు. క్రికెట్ కారణంగా రెగ్యులర్‌గా టెన్నిస్ ఆడలేకపోతున్నానని.. అందుకే హైదరాబాద్ ఓపెన్ టెన్నిస్ అసోసియేషన్ పోటీలలో పాల్గొన్నట్లు తెలిపారు. ఇక పోటీలలో భాగంగా సెమీఫైనల్ మ్యాచ్‌లో మణికన్నన్ మీద గెలిచిన సీవీ ఆనంద్.. ఫైనల్ చేరుకున్నారు. ఈ విషయాన్ని ట్వీట్ చేశారు.ఈ క్రమంలోనే క్రికెట్, గోల్ఫ్ ఆడటం కంటే టెన్నిస్ సింగిల్స్ మ్యాచ్ ఆడటం చాలా కష్టమంటూ రాసుకొచ్చారు.

" క్రికెట్ సీజన్ కారణంగా రెగ్యులర్‌గా టెన్నిస్ ఆడటం కుదరడం లేదు. అందుకే 23వ హైదరాబాద్ ఓపెన్ టెన్నిస్ అసోసియేషన్ పోటీలలో 55 ఏళ్ల సింగిల్స్ విభాగంలో పాల్గొన్నా. పోటీలలో ప్రీక్వార్టర్ ఫైనల్స్, క్వార్టర్ ఫైనల్స్ మ్యాచ్‌లు గెలిచా. అయితే సెమీఫైనల్‌లో చాలా గట్టిపోటీ ఎదురైంది. చెన్నైకు చెందిన మణికన్నన్ నుంచి గట్టి పోటీ ఎదుర్కొన్నా. ఎట్టకేలకు 6-4 , 6-4తో గట్టెక్కి ఫైనల్ చేరుకున్నా. అయితే ఇప్పుడే నాకో విషయం అర్థమైంది. క్రికెట్, గోల్ఫ్ ఆడటం కంటే టెన్నిస్ సింగిల్స్ మ్యా్చ్ ఆడేందుకు ఎక్కువ స్టామినా కావాలని నాకు అర్థమైంది. " అని సీవీ ఆనంద్ రాసుకొచ్చారు. మరోవైపు నెటిజన్లు కూడా సీవీ ఆనంద్ పోస్టుపై స్పందిస్తున్నారు. ఆయన వ్యాఖ్యలతో ఏకీభవించేవారు కొందరైతే.. ఫైనల్‌లోనూ గెలిచి కప్ కొట్టాలంటూ మరికొందరు కామెంట్లు పెడుతున్నారు. మరికొందరు సీవీ ఆనంద్ ఆల్‌రౌండర్ అంటూ కామెంట్స్ చేస్తున్నారు.