ఊరందరికీ వివాహ భోజనం పెట్టిన విజయ్ దేవరకొండ

టాలీవుడ్ నటీనటులు విజయ్-రష్మిక పెళ్లి వేడుక ఇప్పుడు దేశవ్యాప్తంగా ట్రెండింగ్‌లో ఉంది. ఎన్నో ఏళ్లుగా ప్రేమబంధంలో ఉన్న వీరిద్దరూ ఇటీవలె ఒక్కటయ్యారు. విరోష్ జంట పెళ్లి గత నెల 26వ తేదీన రాజస్థాన్ ఉదయ్‌పూర్‌లోని ఐటీసీ మెమోంటో హోటల్‌లో.. అతి కొద్ది మంది సన్నిహితులు, బంధువుల మధ్య హిందూ, కొడవ సంప్రదాయాల్లో రెండు సార్లు జరిగింది. ఇక ఈనెల 4వ తేదీన హైదరాబాద్‌లో విజయ్-రష్మిక పెళ్లి రిసెప్షన్ నిర్వహించనున్నారు. ఈ ఈవెంట్‌కు సంబంధించిన పనులు జరుగుతుండగానే.. ఈ జంట విజయ్ దేవరకొండ స్వగ్రామానికి చేరుకుంది.

రష్మికతో కలిసి తొలిసారి తన స్వగ్రామమైన నాగర్ క‌ర్నూలు జిల్లా బల్మూరు మండలం తుమ్మన్‌పేటకు సోమవారం చేరుకున్న విజయ్ దేవరకొండ.. అక్కడ నూతనంగా నిర్మించిన ఫామ్ హౌస్‌లో గృహప్రవేశం.. సత్యనారాయణ స్వామి వ్రతం వంటి కార్యక్రమాలను నిర్వహించారు. ఈ సందర్భంగా తన సొంతూరైన తుమ్మన్‌పేట గ్రామస్తులందరికీ భోజనాలు పెట్టించారు.

దాదాపు 3 వేల మందికి పైగా విందు ఏర్పాట్లు చేశారు. విజయ్-రష్మిక రాక నేప‌థ్యంలో తుమ్మన్‌పేటలో విజయ్ దేవరకొండ ఫామ్ హౌస్‌ను అంగరంగ వైభవంగా అలంకరించారు. పెళ్లి తర్వాత తొలిసారి విజయ్, రష్మిక జంట గ్రామానికి రావడంతో వారిని చూసేందుకు తుమ్మన్‌పేట వాసులు భారీగా తరలివచ్చారు.

మరోవైపు.. విజయ్‌ దేవరకొండ-రష్మిక మందన్న జంట.. పెళ్లి చేసుకున్న తర్వాత.. తమ కొత్త జీవితానికి ఆశీస్సులు ఇవ్వాలని కోరుతూ ఆదివారం రోజున దేశవ్యాప్తంగా 16 పుణ్యక్షేత్రాల్లో అన్నదాన కార్యక్రమాన్ని నిర్వహించారు. అదే సమయంలో ఫ్యాన్స్‌తో తమ సంతోషాన్ని పంచుకునేందుకు ఆయా నగరాల్లో స్వీట్లు కూడా పంచిపెట్టారు. ఈ సందర్భంగా తమ ప్రయాణంలో, ప్రేమలో అభిమానులంతా భాగమని.. ఏ శుభకార్యమైనా భోజనం, స్వీట్లతో జరుపుతారని.. అందుకే తమ సంతోషాన్ని అందరితో పంచుకునేందుకు స్వీట్స్‌ పంపిస్తున్నామంటూ.. విజయ్‌ రష్మిక సోషల్‌ మీడియాలో వెల్లడించారు.

ఫిబ్రవరి 26 ఉదయం 10:10 గంటలకు రాజస్థాన్‌లోని ఉదయ్‌పూర్‌లో విజయ్ దేవరకొండ, రష్మిక వివాహ బంధంతో ఒక్కటయ్యారు. ఈ వేడుకకు రెండు కుటుంబాల సభ్యులు, అత్యంత సన్నిహితులు మాత్రమే హాజరయ్యారు. ఈ పెళ్లి వేడుకకు సంబంధించిన ఫోటోలను వారు సోషల్ మీడియాలో షేర్ చేయగా.. వారి సంప్రదాయ దుస్తులు, ఆభరణాలపై జోరుగా చర్చ జరిగింది. హిందూ, కొడవ సంప్రదాయంలో పెళ్లి.. వారి ఆచారాలు ఫ్యాన్స్‌ను బాగా ఆకట్టుకున్నాయి. ఇప్పటికీ సోషల్ మీడియాలో #ViRoshWedding హ్యాష్‌ట్యాగ్‌తో వారి ఫోటోలు, వీడియోలు వైరల్ అవుతున్నాయి.