పోచంపల్లిలో హోలీ వేళ విషాదం.. మంటల్లో చిక్కుకున్న హార్డ్‌వేర్ షాపు, భారీ ఆస్తి నష్టం

యాదాద్రి భువనగిరి జిల్లా భూదాన్ పోచంపల్లి మండలం వంకమామిడి గ్రామంలో హోలీ పండుగ పూట తీవ్ర విషాదం చోటుచేసుకుంది. రంగుల పండుగ వేడుకల్లో గ్రామమంతా మునిగి ఉండగా, కటికరెడ్డి దామోదర్ రెడ్డికి చెందిన సుజాత హార్డ్‌వేర్ షాపులో ఒక్కసారిగా అగ్నిప్రమాదం సంభవించింది. చూస్తుండగానే మంటలు ఉవ్వెత్తున ఎగిసిపడటంతో స్థానికులు తీవ్ర భయాందోళనలకు గురయ్యారు. పండుగ పూట అనుకోకుండా జరిగిన ఈ ప్రమాదం గ్రామంలో ఒక్కసారిగా కలకలం రేపింది.
మంటల ధాటికి దుకాణంలోని సామాగ్రి అంతా అగ్నికి ఆహుతైపోయింది. హార్డ్‌వేర్ షాపులో నిల్వ ఉంచిన ఎలక్ట్రికల్ వస్తువులు, మోటార్లు, ఐరన్ మెటీరియల్ మరియు ఇతర విలువైన సామాగ్రి పూర్తిగా దగ్ధమయ్యాయి. ఇదే క్రమంలో షాపులో ఉన్న గ్యాస్ సిలిండర్ పేలడంతో భారీ శబ్దం రావడమే కాకుండా, దట్టమైన పొగ గ్రామం మొత్తాన్ని కమ్మేసింది. దీంతో ప్రాణభయంతో ప్రజలు ఇళ్ల నుంచి బయటకు పరుగులు తీశారు.
ప్రమాద తీవ్రతను గమనించిన గ్రామస్తులు వెంటనే అప్రమత్తమై అగ్నిమాపక సిబ్బందికి సమాచారం అందించారు. సమాచారం అందుకున్న వెంటనే ఫైర్ ఇంజిన్ ఘటనా స్థలానికి చేరుకుని శ్రమించి మంటలను అదుపులోకి తెచ్చింది. ఒకవేళ మంటలు పక్కనే ఉన్న ఇళ్లకు వ్యాపించి ఉంటే ప్రమాదం మరింత పెరిగేదని, సకాలంలో అగ్నిమాపక సిబ్బంది స్పందించడంతో పెద్ద ముప్పు తప్పిందని గ్రామస్తులు ఊపిరి పీల్చుకున్నారు.
ఈ అగ్నిప్రమాదంలో తనకు తీరని నష్టం వాటిల్లిందని బాధితుడు దామోదర్ రెడ్డి ఆవేదన వ్యక్తం చేశారు. సుమారు 6 లక్షల రూపాయల మేర ఆస్తి నష్టం జరిగినట్లు ప్రాథమికంగా అంచనా వేస్తున్నారు. కష్టపడి నిర్మించుకున్న ఉపాధి మార్గం కళ్లముందే బూడిదవ్వడంతో ఆ కుటుంబం కన్నీరుమున్నీరవుతోంది. అధికారులు స్పందించి తమను ఆదుకోవాలని బాధితుడు కోరుతున్నారు.