ఐపీఎల్‌ ప్రారంభ వేడుకకు భారీ ఏర్పాట్లు..

క్రికెట్ పండుగ ఐపీఎల్ 16వ సీజన్ ఆరంభ వేడుకల కోసం అద్భుతంగా ఏర్పాట్లు జరుగుతున్నాయి. అహ్మదాబాద్‌లోని నరేంద్ర మోదీ స్టేడియంలో ఐపీఎల్ ఓపెనింగ్ సెరమనీ నిర్వహించనున్నారు. శుక్రవారం నాడు ఇదే స్టేడియంలో ఐపీఎల్ 2023 తొలి మ్యాచ్ జరగనుంది. ఈ మ్యాచ్‌లో డిఫెండింగ్ ఛాంపియన్ గుజరాత్ టైటాన్స్, చెన్నై సూపర్ కింగ్స్ తలపడతాయి. ఈ మ్యాచ్ సాయంత్రం 7.30 గంటలకు ప్రారంభం అవుతుంది. ఈ మ్యాచ్ కన్నా ముందుగానే సాయంత్రం 6 గంటలకు ఐపీఎల్ ఆరంభ వేడుకలు జరుగుతాయి. ఈ వేడుకల్లో స్టార్ హీరోయిన్ తమన్నా భాటియా కూడా మెరవనుంది. అంతేకాదు, డ్రోన్ల సాయంతో ఆకాశంలో ఐపీఎల్ ట్రోఫీ చిత్రం కనిపించేలా ఏర్పాట్లు చేస్తున్నారు. దీనికి సంబంధించిన ఒక వీడియో నెట్టింట తెగ వైరల్ అవుతోంది. ఈ వీడియో చూసిన అభిమానులు అందరూ కూడా ఈ వేడుకల కోసం ఆత్రుతగా ఎదురు చూస్తున్నట్లు చెప్తున్నారు. చాలా మంది ఈ ఓపెనింగ్ వేడుకలు చూసేందుకు స్టేడియం వెళ్లాలని అనుకుంటున్నారు. రెండేళ్ల తర్వాత మళ్లీ ఐపీఎల్‌ని స్వదేశీ, విదేశాల్లో నిర్వహిస్తున్నారు. కరోనా కారణంగా 2019 తర్వాత ఈ ఫార్మాట్‌లో మ్యాచ్‌లు జరగలేదు. యూఏఈలో కొన్ని మ్యాచ్‌లు జరిగాయి.. గత ఏడాది సీజన్ మొత్తం కేవలం రెండు లేదా మూడు ఎంపిక చేసిన వేదికల్లోనే జరిగాయి. అలాంటిది ఇప్పుడు అన్ని జట్లు తమ తమ సొంత స్టేడియాలకు చేరుకోవడంతో అభిమానులు ఎంతో సంతోషిస్తున్నారు. చెన్నై, ఆర్‌సిబి మరియు ఇతర జట్లు కూడా తమ సొంత స్టేడియంలలో ప్రాక్టీస్ సెషన్‌లను చూడటానికి అభిమానులను అనుమతించాయి. ఈ ఐపీఎల్‌ ఆరంభ వేడుకల్లో బాలీవుడ్ స్టార్లు మెరుస్తారని వార్తలు వినిపిస్తున్నాయి. అలాగే ఈ ఐపీఎల్ మ్యాచులు స్టార్ స్పోర్ట్స్‌తోపాటు జియో సినిమాలో కూడా ప్రత్యక్ష ప్రసారం కానున్నాయి.