సిమ్ కార్డు, ఇంటర్నెట్ లేకుండానే ఫోన్‌‌లో టీవీ చూసేయొచ్చు

టెక్నాలజీ పెరగడంతో ఫోన్లలోనే టీవీ ప్రసారాలను చూసేస్తున్నాం. డీటీహెచ్‌లకు సంబంధించిన యాప్‌లు, ఓటీటీల ద్వారా ఫోన్లలో టీవీ ప్రసారాలు చూసే వెసులుబాటు కలిగింది. అయితే, వీటికి ఇంటర్నెట్ ఉండాల్సిందే. ఇప్పుడు ఈ టెక్నాలజీ కొత్త పుంతల తొక్కబోతోంది. ఇకపై సిమ్ కార్డు, ఇంటర్నెట్ లేకుండానే మొబైల్‌లో టీవీ ప్రసారాలు చూడొచ్చు. అవును.. మీరు చదివింది నిజమే. సిమ్ కార్డు, ఇంటర్నెట్ లేకుండా టీవీ ఎలా చూడొచ్చు? అలాంటి కొత్త టెక్నాలజీని కేంద్రం అందుబాటులోకి తీసుకురానుంది. ‘డైరెక్ట్ టు మొబైల్’ అనే ఈ కొత్త టెక్నాలజీ ప్రస్తుతం పరిశోధన దశలో ఉంది. దేశవ్యాప్తంగా ఎంపిక చేసిన ప్రాంతాల్లో ఈ టెక్నాలజీ ద్వారా టీవీ ప్రసారాలను పరీక్షిస్తున్నారు.

డీ2ఎం టెక్నాలజీ కోసం దేశవ్యాప్తంగా 19 నగరాల్లో 470 - 582 మెగాహెర్జ్‌ స్పెక్ట్రమ్‌ను సిద్ధం చేసినట్లు కేంద్ర సమాచార, ప్రసార శాఖ కార్యదర్శి అపూర్వ చంద్ర తెలిపారు. మంగళవారం (జనవరి 16) ఢిల్లీలో జరిగిన బ్రాడ్‌కాస్టింగ్‌ సదస్సులో ఆయన ఈ వివరాలను వెల్లడించారు. డైరెక్ట్ టు మొబైల్ టెక్నాలజీ అనేది పూర్తి స్వదేశీ పరిజ్ఞానంతో రూపొందించారు. అంటే, మనదేశంలోనే రూపొందించిన సాంకేతికత. ఐఐటీ ఖరగ్‌పూర్‌, శాంఖ్య ల్యాబ్స్‌ కలిసి ‘డీ2ఎమ్‌’ను అభివృద్ధి చేశాయి. టీవీ ప్రసారాల్లో ఇది సంచనలం కానుంది.

డీ2ఎమ్‌ టెక్నాలజీ ఎఫ్‌ఎం రేడియో, డీటీహెచ్‌ తరహాలో పనిచేస్తుంది. ఈ విధానంలో బ్రాడ్‌బ్యాండ్‌, బ్రాడ్‌కాస్ట్‌ టెక్నాలజీ కలిపి టీవీ కార్యక్రమాలను ప్రసారం చేస్తారు. దీంతో స్మార్ట్‌ఫోన్లకు మల్టీమీడియా కంటెంట్‌ నేరుగా వస్తుంది. ఈ సాంకేతికతతో ప్రసారాలకు అయ్యే ఖర్చు తగ్గడంతో పాటు నెట్‌వర్క్‌ సామర్థ్యం పెరుగుతుందని నిపుణులు చెబుతున్నారు.

మొబైల్ ఫోన్లలో మార్పులు చేయాలా..?

అయితే, ప్రస్తుతం మార్కెట్లో ఉన్న మొబైల్ ఫోన్లలో డీ2ఎమ్ టెక్నాలజీ పనిచేయదు. ఈ టెక్నాలజీకి అనుగుణంగా సెల్ ఫోన్లలో మార్పులు చేయాల్సి ఉంటుంది. డీ2ఎమ్ టెక్నాలజీ వచ్చే ఏడాదికల్లా ప్రజలకు అందబాటులోకి వస్తుందని సైన్స్ అండ్ టెక్నాలజీ శాఖ కార్యదర్శి అభయ్ కరాందికర్ తెలిపారు. ఈ టెక్నాలజీని ఇప్పటికే బెంగళూరు, ఢిల్లీలోని కర్తవ్యపథ్‌, నోయిడా ప్రాంతాల్లో పైలట్‌ ప్రాజెక్ట్‌గా పరీక్షించారు.