నెలకు రూ. 3 వేలు చాలు.. తర్వాత ప్రతి నెలా చేతికి రూ. 1.50 లక్షలు.. ఇదెలా సాధ్యమంటే?

స్టాక్ మార్కెట్లలో పెట్టుబడులు పెట్టే వారికి ఓపిక ముఖ్యం. అయితే ఇక్కడ రిస్క్ చాలానే ఉంటుంది. షేర్లు ఎక్కువగా ఫ్లక్చువేట్ అవుతుంటాయన్న సంగతి తెలిసిందే. అయితే స్టాక్ మార్కెట్లపై ఆసక్తి ఉన్న వారు నేరుగా స్టాక్స్‌లోనే ఇన్వెస్ట్ చేయాల్సిన అవసరం లేదు. మ్యూచువల్ ఫండ్లలో సిస్టమేటిక్ ఇన్వెస్ట్‌మెంట్ ప్లాన్ (SIP) ద్వారా పెట్టుబడులు పెట్టి ప్రయోజనం పొందొచ్చు. దీర్ఘకాలంలో పెద్ద మొత్తంలో నగదు సమకూర్చుకోవాలంటే సిప్ పెట్టుబడి అనేది ఒక మంచి ఆప్షన్ అని చెప్పొచ్చు. ఇక్కడ సిప్ (మ్యూచువల్ ఫండ్లు) పెట్టుబడి విధానంలో కాంపౌండింగ్ ఇంట్రెస్ట్ (చక్రవడ్డీ) అంటే వడ్డీపై వడ్డీ వస్తుంది. దీంతో ప్రతి ఏటా రాబడి పెరుగుతూనే ఉంటుందని చెప్పొచ్చు. అందుకే చాలా మంది మ్యూచువల్ ఫండ్లలో పెట్టుబడులు పెడుతుంటారు.

మ్యూచువల్ ఫండ్లు అంటే.. ఇక్కడ నేరుగా స్టాక్ మార్కెట్లలో మనం పెట్టకుండా.. మన దగ్గర నిధులతో మ్యూచువల్ ఫండ్ కంపెనీలు నిర్దిష్ట స్టాక్స్‌లో ఇన్వెస్ట్ చేస్తుంటాయి. అలా మన రాబడి పెరుగుతుంటుంది. ఆర్థిక క్రమశిక్షణ ఉన్న వారు నెలనెలా కొంత మొత్తంలో పెట్టుబడి పెడుతుంటే మన రిటర్న్స్ పెరుగుతుంటాయి. సిప్ పెట్టుబడులతో భవిష్యత్తులో ఆర్థిక ఇబ్బందులు తలెత్తకుండా ఉంటాయి. 60 ఏళ్ల తర్వాత స్థిర ఆదాయం పొందొచ్చు.

నెలనెలా ఎంత పెట్టుబడి పెట్టాలి?

ఉదాహరణకు మీరు 25 ఏళ్ల వయసులో ఉన్నారనుకుందాం. మీరు ఇప్పుడు నెలనెలా రూ. 3 వేల పెట్టుబడితో సిప్ ప్రారంభించాలి. ఇలా లాంగ్ టర్మ్ ఇన్వెస్ట్ చేయాల్సి ఉంటుంది. అప్పుడు పెద్ద మొత్తంలో మీ పెట్టుబడి మాత్రమే కాకుండా రిటైర్మెంట్ తర్వాత స్థిరంగా ఆదాయం అందుకోవచ్చు.

25 ఏళ్ల వయసులో నెలకు రూ. 3 వేల చొప్పున పెట్టుబడి పెట్టాలి. ప్రతి ఏటా 5 శాతం పెట్టుబడి పెంచుకుంటూ పోతూ 35 సంవత్సరాలు ఇన్వెస్ట్ చేయాలి. 35వ సంవత్సరం వరకు మీ ప్రతి నెలా పెట్టుబడి అనేది రూ. 15,760 కి చేరుతుంది. అంటే ఇక్కడ సిప్ ద్వారా తొలుత ఏడాదికి రూ. 36 వేల పెట్టుబడి 35వ సంవత్సరంలో రూ. 1.89 లక్షలకు చేరుతుంది.

సగటున ఏడాదికి 12 శాతం రిటర్న్స్ అంచనా వేసినా కూడా 35 సంవత్సరాల్లో చూస్తే మీ మొత్తం పెట్టుబడి రూ. 32.51 లక్షలు కాగా.. ఇక్కడ రిటర్న్స్ రూ. 2.99 కోట్లుగా ఉంది. అంటే 35 ఏళ్ల పెట్టుబడులతో మీ దగ్గర రూ. 3 కోట్లు ఉంటాయి. ఈ పెద్ద మొత్తాన్ని రిటైర్మెంట్ ఫండ్‌లో పెట్టినా లేదా ఫిక్స్‌డ్ డిపాజిట్లలో పెట్టినా తర్వాత ప్రతి నెలా చేతికి రూ. 1.50 లక్షల వరకు పొందొచ్చు.