ఆంధ్రా సిమెంట్స్‌లో 5 శాతం వాటా విక్రయం.. నేటి నుంచే సబ్‌స్క్రిప్షన్!

దేశీయ ఫస్ట్ జనరేషన్ సిమెంట్ కంపెనీ, ఆంధ్రప్రదేశ్ నుంచి సిమెంట్ ఉత్పత్తి చేస్తున్న ఆంధ్రా సిమెంట్స్ కంపెనీలో వాటా విక్రయిస్తోంది పేరెంట్ సంస్థ సాగర్ సిమెంట్స్. 5 శాతం వాటా విక్రయించాలని నిర్ణయం తీసుకున్నట్లు వెల్లడించింది. ఇందులో భాగంగా పూర్తిగా ఆఫర్ ఫర్ సేల్ (ఓఎఫ్ఎస్) ద్వారా 46 లక్షలకుపైగా షేర్లను విక్రయిస్తామని సోమవారం స్టాక్ ఎక్స్చేంజీలకు సమాచారం అందించింది. ఒక్కో షేరు కనీస ధర రూ. 90 గా నిర్ణయించింది. ఈ నెల 27 వ తేదీ అంటే ఇవాళ్టి నుంచే బిడ్లు దాఖలు చేసుకునేందుకు అవకాశం కల్పిస్తున్నట్లు తెలిపింది. రిటైల్ మదుపరులకు సబ్‌స్క్రిప్షన్ బుధవారం నుంచి ఉంటుందని తెలిపింది.

ఆంధ్రా సిమెంట్స్ ఆఫర్ ఫర్ సేల్ ద్వారా షేర్ల విక్రయం ఫిబ్రవరి 27 నుంచి 28, 2024 తేదీల మధ్య జరుగుతుంది. నాన్ రిటైల్ ఇన్వెస్టర్ల తొలి రోజు అంటే ఫిబ్రవరి 27 న బిడ్లు దాఖలు చేయవచ్చు. ఈ బిడ్లు దాఖలు చేసేటప్పుడు అలాట్ చేయని షేర్లను తమకు ఇవ్వాలనే సూచన చేయవచ్చు. అలాగే రిటైల్ ఇన్వెస్టర్లు టీ ప్లస్ 1 డే అంటే రెండో రోజు ఫిబ్రవరి 28న బిడ్లు దాఖలు చేయవచ్చు. ఓపీఎస్ మార్గదర్శకాల ప్రకారం నాన్ రిటైల్ ఇన్వెస్టర్ల అన్ అలాడెట్ బిడ్లపై రెండో రోజు నిర్ణయం తీసుకుంటారు.

 నాన్ రిటైల్ కేటగిరీలో కనీసం 25 శాతం ఆఫర్ షేర్లు మ్యూచువల్ ఫండ్స్, ఇన్సూరెన్స్ కంపెనీలకు రిజర్వ్ చేస్తారు. రిటైల్ కేటగిరిలోకి వస్తే 10 శాతం వాలిడ్ బిడ్స్ కోసం రిజర్వ్ చేస్తారు. ఈ ఓఎఫ్ఎస్ కి ఆనంద్ రతి షేర్ అండ్ స్టాక్ బ్రోకర్స్ లిమిటెడ్ సోల్ బ్రోకర్ గా వ్యవహరిస్తోంది. ఆంధ్రా సిమెంట్స్ లిమిటెడ్ షేర్లు వరుస నష్టాల్లో ట్రేడింగ్ అవుతోంది. ఇవాళ చూసుకుంటే.. 0. 95 శాతం నష్టంతో రూ. 109. 75 వద్ద ట్రేడింగ్ అవుతోంది. ఈ కంపెనీ స్టాక్ 52 వారాల గరిష్ఠ స్థాయి రూ. 158. 25 వద్ద ఉంది. అలాగే 52 వారాల గరిష్ఠ స్థాయి రూ. 54. 90 వద్ద ఉంది. కంపెనీ మార్కెట్ క్యాపిటలైజేషన్ రూ. 1001 కోట్లుగా ఉంది.