బంపర్ ఆఫర్.. ఓలా స్కూటర్ల ధరలు తగ్గింపు.. ఇక రూ.69,999 నుంచే

 దిగ్గజ ఎలక్ట్రిక్ స్కూటర్ల తయారీ సంస్థ ఓలా ఎలక్ట్రిక్ అదిరే శుభవార్త అందించింది. తమ కంపెనీకి చెందిన ఎంట్రీ లెవెల్ స్కూటర్ల ధరలను భారీగా తగ్గిస్తున్నట్లు ప్రకటించింది. ఓలా ఎలక్ట్రిక్ కంపెనీ పోర్ట్ ఫోలియోలోని ఎస్ 1 ఎక్స్ సిరీస్ ధరలను తగ్గించింది. కొత్త ఎలక్ట్రిక్ స్కూటర్ కొనుగోలు చేయాలనుకునే వారికి ఇది బంపర్ ఆఫర్ అని చెప్పవచ్చు. ఈ స్కూటర్ల ధరలు ఇకపై రూ.69,999 (ఎక్స్ షోరూమ్) నుంచే ప్రారంభమవుతాయని కంపెనీ తెలిపింది. సవరించిన కొత్త ధరలను తన అధికారిక వెబ్‌సైట్‌లో అందుబాటులో ఉంచింది కంపెనీ.

తొలిసారి ఎలక్ట్రిక్ స్కూటర్లు కొనుగోలు చేయాలనుకునే వారి కోసం తక్కువ ధరలకే స్కూటర్లను అందిస్తున్నామని ఓలా ఎలక్ట్రిక్ కంపెనీ తెలిపింది. వచ్చే వారం నుంచే ఈ స్కూటర్ల డెలివరీలు ప్రారంభిస్తామని పేర్కొంది. మరోవైపు.. కొత్త ఎస్1 ఎక్స్ మూడు బ్యాటరీ వేరియంట్లలో లభిస్తోంది. అందులో 2 కె డబ్యూ హెచ్  బ్యాటరీ వేరియంట్ ధర ఇప్పుడు రూ.69,999 కే లభిస్తోంది. అలాగే 3 కె డబ్యూహెచ్  బ్యాటరీ వేరియంట్ ధర రూ.84,999 నుంచి మొదలవుతోంది. అలాగే 4 కేడబ్ల్యూహెచ్ బ్యాటరీ వేరియంట్ ధర రూ.99,999గా కంపెనీ నిర్ణయించింది. ఇవన్నీ ఎక్స్ షోరూమ్ ధరలను గుర్తుంచుకోవాలి.

ఈ స్కూటర్లు 8 ఏళ్లు లేదా 80 వేల కిలోమీటర్ల బ్యాటరీ వారెంటీతో వస్తున్నట్లు కంపెనీ తెలిపింది. ఎస్ 1 ఎక్స్ స్కూటర్లకు ఫిజికల్ కీ ఇస్తోంది కంపెనీ. ఇందులో 2 కిలోవాట్ హవర్ స్కూటర్ ఐడీసీ రేంజ్ 95 కిలోమీటర్లుగా ఉంది. 3 కేడబ్ల్యూహెచ్ స్కూటర్ 143 కిలోమీటర్ల రేంజ్, 4 కిలోవాట్ హవర్ స్కూటర్ రేంజ్ 190 కిలోమీటర్లుగా ఉందని కంపెనీ తెలిపింది. ఎస్1 ఎక్స్ స్కూటర్లలో 6కేడబ్ల్యూ మోటార్ ఉంటుంది. 0-40 కిలోమీటర్ల వేగాన్ని 3.3 సెకన్లలో అందుకుంటుందని కంపెనీ తెలిపింది. 2 కిలోవాట్ బ్యాటరీ వేరియంట్ స్కూటర్ టాప్ స్పీడ్ 85 కిలోమీటర్లుగా ఉండగా.. మిగిలిన స్కూటర్లు గరిష్ఠంగా 90 కిలోమీటర్ల వేగంతో ప్రయాణిస్తాయని తెలిపింది.

అలాగే ఈ స్కూటర్లలో ఎకో, నార్మల్, స్పోర్ట్స్ మోడ్స్ ఉంటాయని కంపెనీ తెలిపింది. క్రూయిజ్ కంట్రోల్, రివర్స్ మోడ్, ఓలా ఎలక్ట్రిక్ యాప్ తో కనెక్టివిటీ వంటి సదుపాయాలు ఉన్నాయి. మొత్తం 7 రంగుల్లో ఈ స్కూటర్లు అందిస్తున్నట్లు కంపెనీ పేర్కొంది. అలాగే గత రెండున్నరేళ్లలో మొత్తం 5 లక్షల వాహన రిజిస్ట్రేషన్లు నమోదైనట్లు కంపెనీ తెలిపింది. ఇది సరికొత్త రికార్డ్ గా తెలిపింది.