ఈ 5 పెన్నీ స్టాక్స్‌తో కాసుల పంట.. లక్షను కోట్లు చేసిన షేరు ఇదే.. ఏకంగా 12 వేల శాతం రిటర్న్స్

స్టాక్ మార్కెట్లలో చాలా మంది ఇన్వెస్ట్ చేస్తుంటారు. స్టాక్స్‌లో ఇన్వెస్ట్ చేయడం కూడా బిజినెస్‌లో ఇన్వెస్ట్ చేయడం మాదిరిగానే ఉంటుందని చెప్పొచ్చు. దీర్ఘకాలంలో మాత్రమే భారీగా లాభాలు ఆర్జించే అవకాశం ఉంటుంది. షార్ట్ టర్మ్‌లో ఒడుదొడుకులు ఎదురవొచ్చు. ఇటీవలి కాలంలో స్టాక్ మార్కెట్లలో ఇన్వెస్ట్ చేసే వారి సంఖ్య కూడా పెరుగుతుందని చెప్పొచ్చు. దేశీయ స్టాక్ మార్కెట్ సూచీలు రికార్డు స్థాయి గరిష్టాలకు చేరుతుండటం కూడా దీనికి కారణంగా చెప్పొచ్చు. కొందరు తక్కువ ధర ఉందని పెన్నీ స్టాక్స్ ఎంచుకుంటుంటారు. అయితే వీటిల్లో అన్నీ లాంగ్ టర్మ్‌లో అద్భుత రిటర్న్స్ ఇస్తాయని చెప్పలేం. కానీ గత చరిత్ర ఆధారంగా దీర్ఘకాలంలో మల్టీబ్యాగర్ రాబడుల్ని అందించిన కొన్ని స్టాక్స్ గురించి ఇప్పుడు తెలుసుకుందాం.

లాయిడ్స్ ఇంజినీరింగ్ వర్క్స్- ఇది గతంలో లాయిడ్స్ స్టీల్ ఇండస్ట్రీస్ పేరుతో చలామణీలో ఉండేది. ఇది 0.55 నుంచి ప్రస్తుతం రూ. 66.85 లెవెల్స్‌కు చేరుకుంది. ఏకంగా 12 వేల శాతానికిపైగా రిటర్న్స్ అందించిందని చెప్పొచ్చు. ఈ క్రమంలో లక్ష పెట్టుబడిని కోట్లు చేసిందన్నమాట. 2018- 19 లో ఈ స్టాక్ ఇన్వెస్టర్లకు నష్టాల్ని మిగల్చగా మళ్లీ 2020లో పుంజుకుంది. 2021లో ఏకంగా 1920 శాతం పెరిగింది. 2023లో మళ్లీ పుంజుకుంది. ఈ సంవత్సరం కూడా లాభాల్లోనే ఉంది. పలు బ్రోకరేజీ సంస్థలు ఈ స్టాక్‌‌కు బై రేటింగ్ ఇచ్చి టార్గెట్ ప్రైస్ పెంచేశాయి.

రతన్‌ఇండియా ఎంటర్‌ప్రైజెస్- ఇది కూడా దీర్ఘకాలంలో స్టాండవుట్ పెర్ఫామర్‌గా ఉంది. గత ఐదేళ్లలో ఈ స్టాక్ రూ. 1.75 నుంచి రూ. 75 కు పెరిగింది. దీంతో ఇన్వెస్టర్లు 4185 శాతం రాబడి పొందారు. లక్ష పెట్టుబడితో రూ. 41 లక్షల వరకు పొందారన్నమాట. ఐనాక్స్ విండ్- ఇది ఫుల్లీ ఇంటిగ్రేటెడ్ విండ్ ఎనర్జీ ప్లేయర్‌గా ఉంది. గత కొన్నేళ్లుగా అద్భుత వృద్ధితో దూసుకెళ్తోంది. గత ఐదేళ్ల సమయంలో ఈ స్టాక్ 787 శాతం పెరిగింది. ప్రస్తుతం ఈ షేరు ధర రూ. 150.91 వద్ద ఉంది. రెనివబుల్ ఎనర్జీ స్పేస్‌కు సంబంధించి ఈ కంపెనీ భారీ ఆర్డర్లు దక్కించుకుంటుండటంతో ఈ స్టాక్ పుంజుకుంటోంది.

అవంటెల్- ఈ టెలికాం ప్రొడక్ట్ మాన్యుఫ్యాక్చరింగ్ కంపెనీ 2019 నుంచి ఇన్వెస్టర్లకు మంచి లాభాలు అందిస్తూ వస్తోంది. ఐదేళ్ల కిందట ఈ షేరు ధర రూ. 4.22 వద్ద ఉండగా.. ఇప్పుడు అది రూ. 123.35 కు చేరింది. ఏకంగా 2822 శాతం రిటర్న్స్ ఈ క్రమంలో అందించింది. అంటే లక్ష పెట్టుబడి పెట్టిన వారికి ఇక్కడ ఐదేళ్లలో రూ. 29 లక్షల వరకు వచ్చిందని చెప్పొచ్చు. మ్యాన్ ఇన్‌ఫ్రా- 2023 మార్చి నుంచి వరుసగా 2024 ఫిబ్రవరి వరకు ఈ స్టాక్ పెరుగుతూనే ఉంది. ప్రతి నెలా సానుకూల ఫలితాలే వచ్చాయని చెప్పొచ్చు. ఈ మధ్యలో 214 శాతం రిటర్న్స్ అందించింది. ఐదేళ్లలో 871 శాతం పెరిగిందీ షేరు. ప్రస్తుతం ఈ స్టాక్ రూ. 199 లెవెల్స్‌లో ట్రేడవుతోంది.