గంభీర్‌కు బిగ్ ట్విస్ట్ ఇచ్చిన బీసీసీఐ..

టీమిండియా హెడ్ కోచ్‌గా గౌతమ్ గంభీర్‌ను బీసీసీఐ నియమించిన విషయం తెలిసిందే. ఇందులో భాగంగా అతడు శ్రీలంక పర్యటన నుంచి బాధ్యతలు చేపట్టనున్నాడు. ఐపీఎల్ 2024 ముగిసినప్పటి నుంచి ఈ విషయంపై గంభీర్‌తో బీసీసీఐ సంప్రదింపులు జరుపుతోంది. ఎట్టకేలకు డీల్ కుదరడంతో అధికారికంగా ప్రకటించింది. అయితే టీమిండియా కోచ్‌గా వచ్చేముందు గౌతమ్ గంభీర్.. కొన్ని కండీషన్లు పెట్టినట్లు వార్తలు వచ్చాయి. బ్యాటింగ్, బౌలింగ్, ఫీల్డింగ్ కోచ్‌ల నియామకంలో తనకు అవకాశం ఇవ్వాలని కోరినట్లు తెలుస్తోంది. అయితే గంభీర్ టీమిండియా హెడ్ కోచ్ పదవికి ఒప్పుకునేంత వరకు ఓకే అన్నట్లు చెప్పిన బీసీసీఐ.. ఇప్పుడు అతడికి షాక్‌లు ఇస్తోంది!

 బ్యాటింగ్, బౌలింగ్, ఫీల్డింగ్ కోచ్‌ల నియామకంపై గంభీర్ చేసిన సిఫార్సులను భారత క్రికెట్ నియంత్రణ మండలి (బీసీసీఐ) తిరస్కరించింది. దీంతో గంభీర్‌కు షాక్ తగిలినట్లయింది. జాతీయ మీడియా కథనాల ప్రకారం.. ప్రపంచంలో అత్యుత్తమ ఫీల్డర్లలో ఒకడిగా పేరుపొందిన జాంటీ రోడ్స్‌ను.. ఫీల్డింగ్ కోచ్‌గా గంభీర్ ప్రతిపాదించాడు. రోడ్స్‌తో కలిసి గంభీర్.. ఐపీఎల్‌లో లక్నో సూపర్ జెయింట్స్ కోసం పనిచేశాడు. దీంతో అతడి సేవలను ఉపయోగించుకోవాలని గంభీర్ భావించాడు. కానీ బీసీసీఐ అందుకు ఒప్పుకోలేదు.

సహాయ కోచ్‌లుగా భారతీయులను మాత్రమే నియమించాలనే ఉద్దేశంతో బీసీసీఐ గంభీర్ ప్రతిపాదనను తిరస్కరించినట్లు తెలుస్తోంది. గత ఏడేళ్లుగా బీసీసీఐ ఇదే పద్దతిని పాటిస్తోంది. భాష పరమైన సమస్య లేకుండా.. ఈ నిర్ణయం తీసుకున్నట్లు తెలుస్తోంది. ఇక బౌలింగ్‌ కోచ్ స్థానానికి గంభీర్.. టీమిండియా మాజీ ఫాస్ట్ బౌలర్ వినయ్ కుమార్ పేరును సిఫార్సు చేశాడు. కానీ ఈ ప్రతిపాదనను కూడా బీసీసీఐ తిరస్కరించినట్లు వార్తలు వస్తున్నాయి. జహీర్ ఖాన్, లక్ష్మీపతి బాలాజీల్లో ఒకర్ని ఎంపిక చేయాలని బీసీసీఐ భావిస్తున్నట్లు సమాచారం.

నెదర్లాండ్‌కు చెందిన టెన్ డస్కాటేను కూడా సహాయక కోచింగ్ బృందంలోకి తీసుకోవాలని గంభీర్ భావించగా.. అందుకు సైతం బీసీసీఐ ఒప్పుకోలేదు. దీంతో గంభీర్ చేసిన మూడు సిఫార్సులను బీసీసీఐ తిరస్కరించినట్లయింది. అయితే గంభీర్‌ను హెడ్‌కోచ్‌గా ప్రకటించిన సమయంలో బీసీసీఐ కార్యదర్శి జైషా ఓ ట్వీట్ చేశారు.గంభీర్‌పై తనకు పూర్తి విశ్వాసం ఉందని, బీసీసీఐ అతనికి అన్ని విధాలుగా సహకారం అందిస్తుందని అందులో పేర్కొన్నారు. భారత క్రికెట్‌ను ముందుకు నడిపించడానికి అతడే అనువైన వ్యక్తి అని కొనియాడాడు.

ఈ నేపథ్యంలో ఎవర్ని ఎంపిక చేస్తారనే విషయంపై ఉత్కంఠ కొనసాగుతోంది. కాగా రాహుల్ ద్రవిడ్ హయాంలో టీమిండియా బ్యాటింగ్ కోచ్‌గా విక్రమ్ రాథోడ్, ఫీల్డింగ్ కోచ్‌గా దిలీప్, బౌలింగ్ కౌచ్‌గా పరాస్ మాంబ్రేలు పనిచేశారు. అయితే ప్రస్తుతమున్న కోచింగ్ స్టాఫ్‌ను పూర్తి ప్రక్షాళన చేయాలని గంభీర్ భావిస్తున్నాడు.