శ్రీలంక టూర్‌ షెడ్యూల్ వచ్చేసింది.. కోచ్‌ గంభీర్‌కు తొలి సిరీస్

టీ20 ప్రపంచకప్‌ 2024 తర్వాత భారత క్రికెట్‌ జట్టు జింబాబ్వేలో పర్యటిస్తున్న విషయం తెలిసిందే. శుభ్‌మన్‌ గిల్ సారథ్యంలో యువ భారత్‌ ఇప్పటికే సిరీస్‌లో 2-1తో ఆధిక్యంలో ఉంది. జులై 13, 14 తేదీల్లో జరిగే 4, 5వ టీ20తో పర్యటన ముగియనుంది. ఈ పర్యటన తర్వాత భారత జట్టు శ్రీలంకలో పర్యటించనుంది. అక్కడ మూడు టీ20లు, మూడు వన్డే మ్యాచ్‌లు ఆడనుంది. అయితే ఇందుకు సంబంధించిన షెడ్యూల్‌ను బీసీసీఐ గురువారం ప్రకటించింది.

జులై 26, 27, 29 తేదీల్లో టీ20 మ్యాచ్‌లు జరగనున్నాయి. మ్యాచ్‌లన్నీ కూడా పల్లెకెలె వేదికగానే జరగనున్నాయి. భారత కాలమాన ప్రకారం రాత్రి 7 గంటలకు ఇవి ప్రారంభం అవుతాయి. ఇక వన్డే సిరీస్‌ కూడా ఒకే వేదికలో జరగనుంది. కొలంబోలో ఈ సిరీస్‌ జరగనుంది. ఆగస్టు 1, 4, 7 తేదీల్లో మూడు వన్డే మ్యాచ్‌లు జరగనున్నాయి. భారత కాలమానం ప్రకారం వన్డే మ్యాచ్‌లన్నీ కూడా మధ్యాహ్నం 2.30 గంటలకు ప్రారంభంకానున్నాయి. ఈ పర్యటనకు సంబంధించిన జట్లను కూడా బీసీసీఐ త్వరలో ప్రకటించే అవకాశం ఉంది.

రాహుల్ ద్రవిడ్ తర్వాత టీమిండియా హెడ్‌కోచ్‌గా నియమితుడైన గౌతమ్‌ గంభీర్‌.. ఈ సిరీస్‌ నుంచే బాధ్యతలు చేపట్టనున్నాడు. ఇప్పటికే టీ20లకు రిటైర్మెంట్ ప్రకటించిన స్టార్ ప్లేయర్లు రోహిత్ శర్మ, విరాట్ కోహ్లీలు ఈ పర్యటన మొత్తానికి దూరమయ్యే అవకాశం ఉంది. వారికి వన్డే సిరీస్‌ నుంచి విశ్రాంతి ఇవ్వాలని బీసీసీఐ భావిస్తోంది. దీంతో ఈ సిరీస్‌లో కుర్రాళ్లకు అవకాశం దక్కవచ్చు.

టీ20లకు కెప్టెన్ రోహిత్ శర్మ వీడ్కోలు పలకడంతో తదుపరి కెప్టెన్‌గా ఎవరు ఉంటారనేదానిపై ఆసక్తి నెలకొంది. కానీ టీ20 ప్రపంచకప్‌లో రోహిత్‌కు డిప్యూటీగా ఉన్న హార్దిక్‌ పాండ్యాకే జట్టు పగ్గాలు దక్కే అవకాశం ఉంది. వన్డేల్లో కేఎల్‌ రాహుల్‌కు సారథ్య బాధ్యతలు అప్పగిస్తారని ప్రచారం జరుగుతోంది.

మరోవైపు భారత్‌తో ద్వైపాక్షిక సిరీస్‌లకు ముందు శ్రీలంకకు షాక్‌ తగిలింది. టీ20 జట్టు కెప్టెన్సీకి ఆ జట్టు స్టార్ ఆల్‌రౌండర్‌ వానిందు హసరంగా గుడ్‌బై చెప్పేశాడు. కానీ సాధారణ సభ్యుడిగా అందుబాటులో ఉంటాడని స్పష్టం చేశాడు. దీంతో ఈ పర్యటన నుంచి శ్రీలంక టీ20 జట్టుకు కొత్త కెప్టెన్‌ను ఎంపిక చేయాల్సి ఉంది.

టీ20 ప్రపంచకప్‌ 2024లో శ్రీలంక జట్టు గ్రూప్‌ స్టేజ్‌ నుంచే నిష్క్రమించింది. తొలి మ్యాచ్‌లో దక్షిణాఫ్రికా, రెండో మ్యాచ్‌లో బంగ్లాదేశ్‌ చేతిలో ఓడిపోయింది. నేపాల్‌తో జరగాల్సిన మూడో మ్యాచ్ వర్షం కారణంగా రద్దు కాగా, నెదర్లాండ్స్‌తో జరిగిన చివరి మ్యాచ్‌లో గెలుపొందింది. దీంతో మూడు పాయింట్లతో పాయింట్ల పట్టికలో మూడో ప్లేసులో నిలిచి.. టోర్నీలో సూపర్‌-8కు చేరకుండానే ఇంటి బాట పట్టింది. ఈ నేపథ్యంలోనే హసరంగా కెప్టెన్సీకి గుడ్‌బై చెప్పినట్లు తెలుస్తోంది.