5 శాతం వడ్డీకే 3 లక్షల లోన్.. రోజుకు రూ. 500, తర్వాత రూ. 15 వేల సాయం

దేశంలోని వివిధ వర్గాల ప్రజలకు ఆర్థిక సాధికారత కల్పించేందుకు, వారిని ప్రోత్సహించేందుకు చాలా స్కీమ్ తీసుకొస్తోంది కేంద్ర ప్రభుత్వం. ఇప్పటికే చిన్న మొత్తాల పొదుపు పథకాలు దాదాపు అన్ని వర్గాల వారి కోసం అందుబాటులో ఉన్నాయి. అయినప్పటికీ ఇంకా స్కీమ్స్ లాంఛ్ చేస్తూనే ఉంది. ఈ క్రమంలోనే గతేడాది సెప్టెంబర్ 17న పీఎం విశ్వకర్మ అనే పథకాన్ని ప్రారంభించింది. ఓబీసీ సామాజిక వర్గానికి చెందినటువంటి 18 రకాల వర్గాలకు లబ్ధి చేకూరేలా వడ్డీలో రాయితీ కల్పిస్తూ రుణాలు మంజూరు చేయనుంది. ఈ స్కీం కింద దాదాపు 30 లక్షల కుటుంబాలకు ప్రయోజనం దక్కుతుందని కేంద్ర మంత్రి అశ్వినీ వైష్ణవ్ గతంలో వెల్లడించారు.

కళాకారులు తమ నైపుణ్యాల్ని మరింత మెరుగుపర్చుకోవడం, టూల్‌కిట్ ఇన్సెంటివ్, డిజిటల్ ట్రాన్సాక్షన్స్, మార్కెటింగ్‌ను ప్రోత్సహించేందుకు వీలుగా ఈ స్కీం కింద రుణాలు మంజూరు చేస్తారు. మొదటి విడతలో భాగంగా 5 శాతం వడ్డీ రాయితీతో రూ. లక్ష లోన్ ఇస్తారు. ఇది చెల్లించేందుకు 18 నెలల సమయం ఉంటుంది. ఆలోగా ఈ రుణం చెల్లిస్తే గనుక.. రెండో విడతలో రూ. 2 లక్షల లోన్ ఇస్తుంది. ఇక్కడ చెల్లించేందుకు 30 నెలల వరకు సమయం ఇస్తుంది.

పలు కులవృత్తుల వారు చిన్న, మధ్య తరహా వ్యాపారాలు చేసుకునేందుకు వీలుగా ఆర్థిక చేయూత అందిస్తుంది. 2023 నుంచి 2028 వరకు ఐదేళ్లు ఈ స్కీం అమల్లో ఉంటుంది. కేంద్ర ప్రభుత్వ పథకాల నుంచి ఎలాంటి రుణ సదుపాయం పొందని వారికే ఇది వర్తిస్తుంది. ఈ స్కీంలో దరఖాస్తు చేసుకునేందుకు పాస్‌పోర్ట్ సైజ్ ఫొటో, ఆధార్ రేషన్ కార్డులు, పాన్ కార్డు, మొబైల్ నంబర్, ఇ- మెయిల్ ఐడీ, నివాస, కుల ధ్రువీకరణ పత్రాలు, బ్యాంక్ అకౌంట్, పాస్ బుక్ వంటివి సమర్పించాలి. ఇక ఇందులో ఎంపికైన వారికి ముందుగా ప్రాథమిక నైపుణ్యం పెంపొందించేందుకు 5 నుంచి 7 రోజుల పాటు.. అదే అధునాతన నైపుణ్యం కోసం అయితే 15 రోజుల శిక్షణ ఇస్తారు. ఈ రోజుల్లో రోజుకు రూ. 500 చొప్పున చెల్లిస్తారు. టూల్ కిట్ కోసం శిక్షణ పూర్తయ్యాక రూ. 15 వేలు సాయం ఇస్తారు.

వడ్రంగులు, ఆయుధాలు తయారు చేసే వారు, రజకులు, దర్జీలు, చేప వలలు తయారు చేసేవారు, పూలదండలు తయారు చేసేవారు, క్షురకులు, తాపీ పనిచేసేవారు, నారతాళ్లు చేసేవారు, విగ్రహాల తయారీదారులు, కుమ్మరి (కుండలు చేసేవారు), స్వర్ణకారులు, కమ్మరి, ఇంటి తాళాలు తయారుచేసేవారు, చర్మకారులు (చెప్పులు తయారుచేసేవారు) ఇలా పలు వర్గాల ప్రజలకు ప్రయోజనం చేకూరుతుంది.