హైదరాబాద్‌లో అద్దెకు కొత్త కార్లు

మీరు కొత్త కారు కొనాలని చూస్తున్నారా? ఇటీవలి కాలంలో దిగ్గజ కార్ల తయారీ సంస్థలు అందరికీ అందుబాటు ధరల్లో కొత్త కొత్త మోడల్ కార్లను తీసుకొస్తున్నాయి కూడా. అయితే.. ఎక్కువ ఖర్చవుతుంది.. అంత పెట్టలేం ఏని ఆలోచిస్తూ వెనుకడుగు వేస్తున్నారా? అయితే ఇది మీకోసమే. కొత్త కారు లీజుకు తీసుకొని.. వాడుకునే సేవల్ని కియా ఇండియా గతంలో లాంఛ్ చేసిన సంగతి తెలిసిందే. అప్పుడు 24 నుంచి 60 నెలల వరకు లీజింగ్ కోసం తీసుకురాగా.. ఇప్పుడు షార్ట్ టర్మ్ సరికొత్త ఫ్లెక్సిబుల్ ఓనర్‌షిప్ ప్లాన్ లాంఛ్ చేసింది. దీనిని 14 ప్రధాన నగరాలకు విస్తరిస్తున్నట్లు ప్రకటించింది. ఇక ఇప్పుడు దీంట్లో భాగంగా కనీసం 12 నెలల నుంచి మూడేళ్ల వరకు (36 నెలలు) లీజుకు తీసుకోవచ్చు. దీనినే కియా సబ్‌స్క్రైబ్ పేరిట తీసుకొచ్చింది.

కారు కొనాల్సిన అవసరం లేకుండానే.. నెలకు కొంత మొత్తం అద్దె చెల్లించి.. వినియోగించుకునే పథకాన్ని కియా ఇండియా అందుబాటులోకి తీసుకొచ్చింది. ఇందులో భాగంగా..ఏఎల్ డీ ఆటోమోటివ్‌తో ఒప్పందం కుదుర్చుకుంది. హైదరాబాద్, చెన్నై, బెంగళూరు సహా దేశంలోని 14 నగరాల్లో.. ఈ సేవల్ని అందుబాటులోకి తీసుకొచ్చింది. శాలరీడ్ సహా సెల్ఫ్ ఎంప్లాయిడ్ ఇండివిడ్యువల్స్‌కు నెలకు అద్దె చెల్లించి వాడుకునేందుకు ఈ ఇనిషియేటివ్ ఉపయోగపడుతుందని పేర్కొంది.

ఇక 12 నుంచి 36 నెలల వరకు కార్లను అద్దెకు తీసుకోవాల్సి ఉంటుంది. కియా సొనెట్‌కు అయితే నెలకు అద్దె రూ. 17,999 చెల్లించాల్సి ఉంటుంది. అదే కియా సెల్టోస్‌కు రూ. 23,999 చెల్లించాల్సి ఉంటుంది. ఇక కియా కారెన్స్‌కు రూ. 24,999, కియా EV6 కు ప్రతి నెలా రూ. 1,29,000 చొప్పున రెంట్ చెల్లించాలి. తక్షణ అవసరాలకైనా, ఫ్యామిలీ లేదా ఫ్రెండ్స్‌తో కలిసి దూరప్రాంతాలకు వెళ్లాల్సి వచ్చినా ఇది ఉపయోగపడుతుందని చెప్పొచ్చు.

గతంలో తీసుకొచ్చిన కియా లీజ్ ప్రోగ్రామ్‌కు కస్టమర్ల నుంచి మంచి రెస్పాన్స్ లభించిందని.. అందుకే ఇప్పుడు షార్ట్ టర్మ్ ప్లాన్ తెచ్చినట్లు చెప్పారు కియా ఇండియా సేల్స్ అండ్ మార్కెటింగ్ సీనియర్ వైస్ ప్రెసిడెంట్ హర్‌దీప్ సింగ్ బ్రార్. షార్ట్ టర్మ్ కమిట్‌మెంట్‌లో భాగంగా.. ఢిల్లీ, నోయిడా, ఫరీదాబాద్, గాజియాబాద్, గురుగ్రామ్, ముంబై, పుణె, అహ్మదాబాద్, బెంగళూరు, ఇండోర్, హైదరాబాద్, చెన్నై, కోల్‌కతా, జైపూర్ ఇలా మొత్తం 14 నగరాల్లో తెచ్చినట్లు వివరించారు.

చాలా మంది నిజంగా కార్లు అంటే ఇష్టం ఉంటుంది కానీ కొనే స్తోమత ఉండదు. ఇలాంటి వారి కోసమే ఇలా లీజింగ్, సబ్‌స్క్రిప్షన్ ప్లాన్స్ తీసుకొస్తున్నాయి. మీకు నచ్చిన కారును.. నిర్దిష్ట కాలం పాటు వాడుకోవచ్చు. దీని కోసం నెలనెలా నిర్దిష్ట మొత్తం చెల్లించాల్సి వస్తుంది. విదేశాల్లో ఈ కార్ సబ్‌స్క్రిప్షన్ అనేది చాలా పాపులర్ అన్న సంగతి తెలిసిందే.