కార్పొరేట్ కంపెనీల్లో కొత్త ట్రెండ్.. ఈ 'సైలెంట్ ఫైరింగ్' అంటే ఏంటి?

కార్పోరేట్ వ్యవస్థలో కొత్త కొత్త పదాలు తెరపైకి రావడం గమనిస్తూనే ఉంటాం. గ్రేట్ రిజగ్నిషన్, క్వైట్ క్విట్టింగ్, మూన్ లైటింగ్ అంటూ కొత్త కొత్త పదాలు మీరు ఇటీవల వినే ఉంటారు. ఇప్పుడు మరో కొత్త పదం సైలెంట్ ఫైరింగ్ తెరపైకి వచ్చింది. ప్రస్తుతం కార్పొరేట్ రంగంలో చాలా సంస్థలు ఇదే విధానాన్ని అవలంభిస్తున్నాయటా. కరోనా మహమ్మారితో ఏర్పడిన పరిస్థితులతో భారీ ఎత్తున లేఆఫ్స్ ప్రకటించిన కంపెనీలు ఇప్పుడు అంతకు మించిన వ్యూహంతో సైలెంట్ ఫైరింగ్ చేపడుతున్నట్లు తెలుస్తోంది. అసలేంటీ ఈ కొత్త విధానం? కార్పొరేట్ కంపెనీలు ఎందుకు ఈ విధానాన్ని అనుసరిస్తున్నాయి.

ఆర్టిఫిషియల్ ఇంటెలిజెన్స్ పూర్తి స్థాయిలో అందుబాటులోకి వస్తే తమ ఉద్యోగులు పోతాయని చాలా రంగాల్లోని ఉద్యోగులు ఆందోళన చెందుతున్నారు. చాలా మంది నిపుణులు సైతం దీనిపై ఆందోళన వ్యక్తం చేశారు. ఇప్పుడు ఆ ఆందోళనలే నిజమవుతున్నాయంటున్నారులు కొందరు నిపుణులు. ఏఐ టెక్నాలజీని అందిపుచ్చుకునే చర్యల్లో భాగంగానే కంపెనీలు ఈ సైలెంట్ ఫైరింగ్ ట్రెండ్ ఫాలో అవుతున్నాయంటున్నారు. పొమ్మన లేక పొగబెట్టడం అనే సామెత ఇక్కడ సరిగ్గా సరిపోతుంది. సైలెంట్ ఫైరింగ్ సైతం అలాంటిదే. కంపెనీలో ఉద్యోగులను నేరుగా తొలగించకుండా విధులను కష్ఠతరం చేసి వారంతట వారే కంపెనీ నుంచి వెళ్లిపోయేలా చేయడమే దీని ముఖ్య ఉద్దేశం. అలా వెళ్లిపోయిన వారి స్థానంలో ఏఐని భర్తీ చేస్తున్నాయటా.

కరోనా తగ్గుముఖం పట్టిన క్రమంలో చాలా కంపెనీలు ఉద్యోగులను ఆఫీసులకు రావాలని ఆదేశాలు జారీ చేస్తున్నాయి. అమెజాన్ వంటి పెద్ద కంపెనీలు ఇప్పటికే కచ్చితంగా ఆఫీసులకు రావాలని అల్టిమేటం జారీ చేశాయి. ఈ నిర్ణయంతో 73 శాతం మంది ఉద్యోగులు ఉద్యోగం వదిలేయాలని భావించారని ఓ నివేదిక తెలిపింది. ఈ క్రమంలోనే అమెజాన్ లాంటి కంపెనీలు సైలెంట్ ఫైరింగ్ ట్రెండ్ పాటిస్తున్నాయని పేర్కొంది. ఉద్యోగులను నేరుగా ఉద్యోగం నుంచి తొలగించకుండా సైలెంట్ ఫైరింగ్ వ్యూహాలు అవలంబిస్తున్నాయని తెలిపింది.

ఆర్టిఫిషియల్ ఇంటెలిజెన్స్ తమ ఉద్యోగాలను భర్తీ చేస్తుందని చాలా మంది ఆందోళన చెందుతున్నారు. దీంతో ఉద్యోగుల్లో అసంతృప్తి నెలగొందని, పనిపై ఏకాగ్రత చూపలేకపోతున్నారని పలు రిపోర్ట్ చెబుతున్నాయి. ప్రతి 10 మందిలో ముగ్గురు వ్యక్తులు ఏఐతో ఒత్తిడికి గురవుతున్నారని పేర్కొంది. అయితే ఏఐని అందిపుచ్చుకునేందుకు కంపెనీలు పెద్ద ఎత్తున నిధులు ఖర్చు చేయడంపై ఆందోళన వ్యక్తం చేశారు ఎంఐటీ ఆర్థిక వేత్త డారన్ అసిమోగ్లూ. రానున్న 10 ఏళ్ల కాలంలో 5 శాతం ఉద్యోగాలపైనే ఏఐ ప్రభావం ఉంటుందని, అంచనాలు ఫలించకపోవచ్చన్నారు. ఏఐకి అంతటివ విశ్వసనీయత ఉండాలని అభిప్రాయపడ్డారు.