అమెరికా అధ్యక్షుడి వేతనం ఎంతో తెలుసా..? అలవెన్సులు ఏమేం ఉంటాయంటే

అమెరికా అధ్యక్షుడిగా డొనాల్డ్ ట్రంప్ ఎన్నికయ్యారు. ఇటీవల జరిగిన ఎన్నికల్లో డెమొక్రాటిక్ పార్టీ అభ్యర్థి కమలా హ్యారీస్‌పై ట్రంప్ విజయం సాధించారు. దీంతో అమెరికా 47వ అధ్యక్షుడిగా ఆయన జనవరి 20న బాధ్యతలు చేపట్టనున్నారు. రెండోసారి అమెరికా అధినేతగా ఎంపికైన ట్రంప్‌ ఎంత వేతనం పొందనున్నారు..? ఆయనకు ఏమేం అలవెన్సులు లభిస్తాయో చూద్దాం..

అమెరికా అధ్యక్షుడి వార్షిక వేతనం 4 లక్షల డాలర్లు. మన కరెన్సీలో చెప్పాలంటే రూ.3.37 కోట్లు. అమెరికా పౌరుడి తలసరి ఆదాయం కంటే ఇది ఆరు రెట్లు ఎక్కువ. 2001లో అమెరికన్ కాంగ్రెస్ ఈ మొత్తాన్ని నిర్ణయించింది. అప్పటి నుంచి అమెరికా అధ్యక్షుడి వేతనం మారలేదు. ద్రవ్యోల్బణానికి అనుగుణంగా 23 ఏళ్ల క్రితం అమెరికా ప్రెసిడెంట్ శాలరీని మార్చారు. అయితే అంతకు ముందున్న అధ్యక్షులకు తక్కువ వేతనం వచ్చేది.

ఏటా 4 లక్షల డాలర్ల వేతనంతోపాటు అమెరికా అధ్యక్షుడికి ఇతర అలవెన్సులు కూడా ఉంటాయి. పన్నులేవీ లేకుండా ఏటా వ్యక్తిగతంగా, అధికారిక ఖర్చుల కోసం 50 వేల డాలర్లు అలవెన్స్ రూపంలో ఇస్తారు. అమెరికా అధ్యక్షుడు, ఆయన సిబ్బంది ప్రయాణ ఖర్చుల కోసం ఏడాదికి లక్ష డాలర్లు మంజూరు చేస్తారు. ఎంటర్‌టైన్‌మెంట్ కోసం ఏడాదికి 19 వేల డాలర్లు అలవెన్స్‌గా ఇస్తారు. ఈ మొత్తంతోనే విదేశీ అతిథులకు ఆతిథ్యం ఇస్తారు. ఒకవేళ అమెరికా అధ్యక్షుడిగా బాధ్యతలు చేపట్టిన వ్యక్తి.. వైట్ హౌస్‌‌లో మార్పులు చేర్పులు చేయాలని భావిస్తే.. అందుకోసం రీడెకరేషన్ అలవెన్స్‌గా ఒక లక్ష డాలర్లు ఇస్తారు. ప్రెసిడెంట్ ఎలాంటి ఇబ్బందుల్లేకుండా తన పని తాను చేసేందుకు వీలుగా ఈ అలవెన్సులు మంజూరు చేస్తారు.

అమెరికా అధ్యక్షుడు తన కుటుంబంతో కలిసి అధికారిక నివాసమైన వైట్ హౌస్‌లో నివాసం ఉంటారనే సంగతి తెలిసిందే. వారికి వైట్ హౌస్‌లో వసతితోపాటు భోజనం, మెయింటెనెన్స్ అన్నీ ప్రభుత్వమే చూసుకుంటుంది. వైట్ హౌస్‌ను ఇల్లుగా, ఆఫీసుగానూ ఉపయోగిస్తారు. అమెరికా అధ్యక్షుడు, ఆయన ఫ్యామిలీకి రక్షణగా.. 24 గంటలపాటు పటిష్టమైన భద్రత ఉంటుంది. అధ్యక్షుడు పర్యటనలు, బయటకెళ్లిన సమయంలో సీక్రెట్ సర్వీస్ సహా అనేక సంస్థలు ఆయన రక్షణ బాధ్యతలను చూసుకుంటాయి. అమెరికా అధ్యక్ష పదవి నుంచి దిగిపోయిన తర్వాత ఏటా 2 లక్షల డాలర్లకుపైగా పెన్షన్ లభిస్తుంది. ద్రవ్యోల్బణానికి అనుగుణంగా దీన్ని పెంచుతారు. మాజీ అధినేతకు ఆఫీసు, ప్రయాణానికి ఫండ్స్, జీవిత కాలం సీక్రెట్ సర్వీస్ ప్రొటెక్షన్ లభిస్తాయి.

1789లో జార్జ్ వాషింగ్టన్ అమెరికా అధ్యక్షుడిగా బాధ్యతలు చేపట్టినప్పుడు ఆయనకు ఏటా 25 వేల డాలర్ల వేతనం ఇచ్చేవారు. ప్రస్తుత ధరల్లో ఇది దాదాపు 9 లక్షల డాలర్లకు సమానం. 1969లో అమెరికా అధ్యక్షుడి వేతనం 2 లక్షల డాలర్లకు చేరింది. 2001లో ఇది 4 లక్షల డాలర్లు అయ్యింది. అమెరికా అధ్యక్షుడి వేతనం కంటే ఎక్కువ జీతం పొందే దేశాధినేతలు కూడా ఉన్నారు. సింగపూర్ ప్రధాన మంత్రి వార్షిక వేతనం 16 లక్షల డాలర్లు. హాంగ్ కాంగ్ చీఫ్ ఎగ్జిక్యూటివ్‌ ఏటా 6.95 లక్షల డాలర్ల వేతనాన్ని అందుకుంటారు. స్విట్జర్లాండ్ అధ్యక్షుడికి 5.30-5.70 లక్షల డాలర్ల వార్షిక వేతనం లభిస్తుంది. ఆస్ట్రేలియా ప్రధాని జీతం కూడా 4 లక్షల డాలర్లకు అటు ఇటుగా ఉంటుంది.