అమర జవాన్‌కు భార్య, కుమారుడు కన్నీటి వీడ్కోలు.. గుండె బరువెక్కే దృశ్యం

జమ్మూ కశ్మీర్‌లో ఉగ్రవాదులతో పోరాడుతూ వీరమరణం పొందిన ఆర్మీ అధికారి, జూనియర్ కమిషన్డ్ ఆఫీసర్ నాయిబ్ సుబేదార్ రాకేశ్ కుమార్‌కు ఆయన స్వగ్రామంలో కుటుంబ సభ్యులు, గ్రామస్థులు కన్నీటి వీడ్కోలు పలికారు. హిమాచల్ ప్రదేశ్‌లోని మండి జిల్లా బార్నోగ్ గ్రామంలో అశ్రునయనాల మధ్య రాకేష్ కుమార్ అంత్యక్రియలను మంగళవారం నిర్వహించారు. జైహింద్ జైహింద్ అంటూ నినాదాలు చేస్తూ రాకేశ్ కుమార్ పార్థివదేహం వద్ద కన్నీటి పర్యంతమైన ఆయన భార్య, కుమారుడిని చూస్తే ఎవరికైనా కన్నీరు ఆగదు.

ఇటీవల వరదల్లో పూర్తిగా పాడైన తమ ఇంటిని మళ్లీ చక్కగా నిర్మించుకోవాలని రాకేశ్ కుమార్ కలలు కన్నారట. జనవరి నెలలో ఇంటికి వచ్చి పని మొదలుపెడదామని కుటుంబ సభ్యులకు చెప్పారట. ఇంతలోని ఆయన్ని మృత్యువు కబళించింది. ఆదివారం జమ్మూ కశ్మీర్‌లోని కిష్ట్‌వార్ జిల్లాలో తీవ్రవాదులతో జరిగిన భీకర పోరులో రాకేశ్ కుమార్ కన్నుమూశారు. మరో నెల రోజుల్లో ఇంటికి నవ్వుతూ రావాల్సినవాడు.. ఇలా విగతజీవిగా రావడంతో కుటుంబ సభ్యులు కన్నీరుమున్నీరు అవుతున్నారు. ముఖ్యంగా రాకేశ్ష్ కుమార్ భార్య భానుప్రియ, పిల్లలు యశశ్విని, ప్రణవ్‌‌లను ఓదార్చడం ఎవరి తరం కావడం లేదు. భానుప్రియ అయితే తన భర్త పార్థివదేహాన్ని ఉంచిన శవపేటిక స్వయంగా మోశారు.

రాకేష్ కుమార్ భౌతిక దేహాన్ని సోమవారం మధ్యాహ్నం ఆర్మీ ప్రత్యేక హెలీకాప్టర్‌లో కంగ్ని హెలీప్యాడ్‌కు తీసుకొచ్చారు. అక్కడి నుంచి ముందుగా నేర్ చౌక్ మెడికల్ కాలేజ్‌కు తరలించి.. అనంతరం మంగళవారం ఉదయానికి ఆయన స్వగ్రామానికి చేర్చారు. రాకేశ్ కుమార్ ఇండియన్ ఆర్మీలోని 2 పారా స్పెషల్ ఫోర్సెస్ విభాగానికి చెందిన అధికారి. ఇండియన్ ఆర్మీలో పేరా స్పెషల్ ఫోర్సెస్ విభాగం 1966లో ప్రారంభమైంది. ఇది ఆర్మీలో అత్యున్నత పారాషూట్ రెజిమెంట్. శత్రువులను దెబ్బ కొట్టడంలో సుశిక్షితులైన కమాండోలకే ఇందులో స్థానం ఉంటుంది. అలాంటి ఒక గొప్ప కమాండోను ఇప్పుడు దేశం కోల్పోయింది. ఇక, గత నెల రోజులుగా ఉగ్రమూకలు పేట్రేగిపోతున్నాయి. సైనికులతో పాటు సాధారణ పౌరులు, వలస కూలీలే లక్ష్యంగా దాడులకు తెగబడుతున్నాయి.