మహిళలు, యువతుల అదృశ్యంపై పవన్ కళ్యాణ్ ట్వీట్.. హోంమంత్రి రియాక్షన్

ఆంధ్రప్రదేశ్‌లో యువతులు, మహిళ అదృశ్యంపై ఏపీ డిప్యూటీ సీఎం పవన్ కళ్యాణ్ మరోసారి స్పందించారు. ఈ మేరకు ఎక్స్ వేదికగా పవన్ కళ్యాణ్ ట్వీట్ చేశారు. వైసీపీ ప్రభుత్వ హయాంలో ఆంధ్రప్రదేశ్‌లో సుమారుగా 30 వేల మంది మహిళలు, బాలికలు అదృశ్యమయ్యారని మరోసారి ఆరోపించిన పవన్ కళ్యాణ్.. ఇంత జరిగినా గత ప్రభుత్వం ఎలాంటి చర్యలు తీసుకోలేదని విమర్శించారు. ఈ విషయంలో అప్పటి ప్రభుత్వం కనీసం చిన్న ప్రకటన కూడా ఇవ్వలేకపోయిందన్నారు. అయితే టీడీపీ కూటమి సర్కారు అధికారంలోకి వచ్చిన తర్వాత ఆంధ్రప్రదేశ్‌లో పరిస్థితి మారిందన్నారు పవన్ కళ్యాణ్. ఆంధ్రప్రదేశ్‌లో పటిష్టమైన లా అండ్ ఆర్డర్ అమలు చేస్తామని ఎన్డీఏ కూటమి ముందే చెప్పిందంటూ ట్వీట్ చేశారు.

మరోవైపు 18 మంది మహిళల మిస్సింగ్ కేసులను ఛేదించిన విజయవాడ సిటీ పోలీసులను ఈ సందర్భంగా పవన్ కళ్యాణ్ అభినందించారు. ఆంధ్రప్రదేశ్ హోంమంత్రి వంగలపూడి అనిత నేతృత్వంలో కేసులు ఛేదించిన టాస్క్‌ఫోర్స్ పోలీసులకు, హోంశాఖకు అభినందనలు తెలియజేశారు. ఆంధ్రప్రదేశ్ పోలీసులను చూసి తాను గర్వపడుతున్నట్లు డిప్యూటీ సీఎం పవన్ కళ్యాణ్ ట్వీట్ చేశారు. మహిళల భద్రత, హక్కుల పరిరక్షణకు గానూ పోలీసులకు సీఎం నారా చంద్రబాబు నాయుడు పూర్తి స్వేచ్ఛ ఇచ్చినట్లు పేర్కొన్నారు. మహిళలపై సోషల్ మీడియాలో అసభ్యకర పోస్టులు పెట్టే వారిపైనా కఠినచర్యలు తీసుకోవాలని.. అందుకు పోలీసులకు ప్రభుత్వం నుంచి పూర్తి సహకారం ఉంటుందని పవన్ కళ్యాణ్ పేర్కొన్నారు. ప్రజలు సైతం అప్రమత్తంగా ఉంటూ గ్రామాలు, పట్టణాలు, నగరాలను సురక్షితంగా మార్చుకోవాలని విజ్ఞప్తి చేశారు.

మరోవైపు డిప్యూటీ సీఎం పవన్ కళ్యాణ్‌కు హోంమంత్రి వంగలపూడి అనిత ధన్యవాదాలు తెలియజేశారు. విజయవాడ సిటీ పోలీసులు, ప్రత్యేక టాస్క్‌ఫోర్స్, ఆంధ్రప్రదేశ్ హోంశాఖ నిరంతర ప్రయత్నాలను, కృషిని గుర్తించినందుకు పవన్ కళ్యాణ్‌కు ధన్యవాదాలు తెలియజేశారు. క్లిష్టమైన కేసులను ఇంత త్వరగా పరిష్కరించడం మహిళల భద్రత, రక్షణ పట్ల ఎన్డీఏ ప్రభుత్వం నిబద్ధతను చూపుతోందన్నారు. మహిళల అక్రమ రవాణా, అదృశ్యం. సోషల్ మీడియా దుర్వినియోగం వంటివాటిపై సీఎం చంద్రబాబు మార్గదర్శకంలో ఆంధ్రప్రదేశ్ ప్రభుత్వం గట్టి చర్యలు తీసుకుంటోందని వంగలపూడి అనిత ట్వీట్ చేశారు.