వల్లభనేని వంశీ ముఖ్య అనుచరుల అరెస్ట్.. పరారీలో మరో నేత, చిక్కులు తప్పవా

కృష్ణా జిల్లా గన్నవరం మాజీ ఎమ్మెల్యే వల్లభనేని వంశీ ముఖ్య అనుచరుల్ని పోలీసులు అరెస్ట్ చేశారు. టీడీపీ నేత కాసనేని రంగబాబుపై దాడి కేసులో ఇవాళ వేకువజామున వీరిని అదుపులోకి తీసుకున్నారు. పోలీసులు అరెస్ట్ చేసిన వారిలో వంశీ ప్రధాన అనుచరుడు ఓలుపల్లి మోహనరంగాతో పాటు మరికొందరు ఉన్నారు. వీరిని అరెస్ట్ చేసి కంకిపాడు పోలీస్ స్టేషన్‌కు తరలించారు. టీడీపీ నేత రంగబాబుపై ఈ దాడి జరిగింది.

రంగబాబును గన్నవరం సమీపంలోని పార్క్‌ ఎలైట్‌ హోటల్‌ దగ్గరకు ఆయన్ను పిలిచి దాడి చేశారు. ఈ ఘటనలో రంగబాబు కాలికి గాయాలు కాగా.. పిన్నమనేని ఆసుపత్రిలో చికిత్స పొందారు. ఆయన పోలీసులకు ఫిర్యాదు చేయడంతో కేసు నమోదైంది. పొలం విషయం గురించి మాట్లాడేందుకు రావాలని పిలిచి దాడి చేసినట్లు రంగబాబు ఆరోపించారు. గత ఏడాది క్రైంనెంబరు 42గా ఈ దాడి కేసు నమోదు చేయగా.. ఈ ఘటనలో తొమ్మిది మందిని నిందితులుగా గుర్తించారు పోలీసులు. వీరిపై సెక్షన్‌ 326, 120 బి రెడ్‌ విత్‌ 34 సెక్షన్ల కింద కేసు నమోదు చేశారు.

గత ప్రభుత్వ ఈ హయాంలో కేసుపై పోలీసులు చర్యలు తీసుకోలేదు. తాజాగా ఈ కేసు విచారణ మొదలుపెట్టగా.. నిందితులు ఓలుపల్లి మోహనరంగా, సూరపనేని అనిల్‌, పొన్నూరు సీమయ్య, అనగాని రవి, భీమవరపు రాము, ఎం.బాబు, గుర్రం నానిలను పోలీసులు అరెస్ట్‌ చేశారు. వీరందర్ని కంకిపాడు పీఎస్‌కు తరలించి ప్రశ్నిస్తున్నారు. ఈ కేసులో వంశీ మరో ప్రధాన అనుచరుడు శేషు తప్పించుకున్నట్లు తెలుస్తోంది. అతడ కోసం పోలీసులు గాలిస్తున్నారు.. ఈ దాడి వెనుక కీలక సూత్రధారిగా ఎవరు? అనే అంంశంపై పోలీసులు ఆరా తీస్తున్నారు. పోలీసులు నిందితులను గన్నవరం కోర్టులో హాజరుపరిచే అవకాశం ఉంది.

ఇప్పటికే గన్నవరం టీడీపీ కార్యాలయంపై దాడి కేసులో మాజీ ఎమ్మెల్యే వల్లభనేని వంశీ అనుచరులు సతమతం అవుతున్నారు. ఇప్పుడు తాజాగా టీడీపీ నేతపై దాడి కేసు కూడా తెరపైకి వచ్చింది. ఇటు అసెంబ్లీలో కూడా గన్నవరం మాజీ ఎమ్మెల్యేపై విజిలెన్స్ విచారణ జరుగుతోందని అసెంబ్లీలో మంత్రి కొల్లు రవీంద్ర ప్రకటించారు. అయితే వల్లభనేని వంశీ ప్రస్తుతం గన్నవరంలో అందుబాటులో లేరని తెలుస్తోంది.