పెళ్లైన మరుసటి రోజే వధువు మృతి.. అందరు చూస్తుండగానే, తీవ్ర విషాదం

ఆ జంట రెండు రోజుల క్రితమే వివాహ బంధంతో ఒక్కటయ్యింది.. వధువు కోటి ఆశలతో అత్తింట్లో అడుగు పెట్టింది. ఇంతలో ఊహించని ఘటన జరిగింది. ఆ వధూవరుల కలలను కల్లలు చేసింది.. కొత్త జంటను మృత్యువు విడదీసింది. పెళ్లి జరిగిన మరుసటి రోజే రెండు కుటుంబాలకు తీరని శోకాన్ని మిగిల్చింది. కడప జిల్లాలో జరిగిన ఈ ఘటన తీవ్ర విషాదాన్ని నింపింది.

 పెండ్లిమర్రి మండలానికి చెందిన సందల ఓబన్న, ఉత్తమ్మ దంపతులకు ముగ్గురు కుమార్తెలు, ఇద్దరు కుమారులు ఉన్నారు. రెండో కుమార్తె స్వాతిని పెద్దముడియానికి చెందిన హేమంత్‌కుమార్‌కు పెళ్లి కుదిరింది. ఈనెల 17 (ఆదివారం)న అంగరంగ వైభవంగా కుటుంబ సభ్యులు, బంధువులు, స్నేహితుల మధ్య వివాహం జరిగింది. స్వాతి భర్తతో కలిసి అత్తింటిలో అడుగు పెట్టింది. స్వాతి సోమవారం తెల్లవారుజామున ఇంట్లో పనులు చేస్తుండగా.. ఒక్కసారిగా కుప్పకూలింది. పక్కనే ఉన్న కుటుంబ సభ్యులు గమనించి వెళ్లి చూడగా.. అప్పటికే ఆమె ప్రాణాలు కోల్పోయింది. అయితే స్వాతి మరణంపై తమకు ఎలాంటి ఫిర్యాదు అందలేదని పోలీసులు చెబుతున్నారు. ఆమె అనారోగ్య కారణాలతో చనిపోయారా.. ఇతర కారణాలు ఉన్నాయా అనేది క్లారిటీ రావాల్సి ఉంది. తమ కళ్ల ముందే స్వాతి చనిపోయిందని అత్తింటివారు చెబుతున్నారు.

మంత్రి లోకేష్‌కు సౌదీలో చిక్కుకున్న మహిళ రిక్వెస్ట్

కడపకు చెందిన షకీలాబేగం ఓ వీడియోను విడుదల చేశారు. కడపకు చెందిన ఏజెంటు రఫీ, ముంబైకి చెందిన మరో ఏజెంటు షకీల్‌ అహ్మద్‌లు తనను సౌదీ అరేబియాలోని జెడ్డాకు పంపించారని చెప్పారు. తొమ్మిది నెలల క్రితం అక్కడికి వెళ్లానని.. ఇక్కడ తనను ఓ మహిళ ఇంట్లో పనికి పెట్టారని చెప్పుకొచ్చారు. అప్పటి నుంచి యజమాని తనను చిత్రహింసలు పెడుతోందని ఆవేదన వ్యక్తం చేశారు. తనను విపరీతంగా కొట్టి బయటకు తరిమేసిందని.. అక్కడ నుంచి ఇండియా ఎంబసీకి వెళ్లినా పట్టించుకోలేదన్నారు.

బంగ్లాదేశ్‌కు చెందిన వారు ఆశ్రయమివ్వడంతో అక్కడ తలదాచుకుంటున్నానని చెప్పారు షకీలా. తనకు భర్త, నలుగురుపిల్లలున్నారని.. అప్పులు తీర్చాలని ఉద్దేశంతో ఇంట్లో వారు వద్దంటున్నా తాను సౌదీకి వచ్చానన్నారు. తనను తిరిగి ఇండియాకు పంపించాలంటే రూ.5లక్షలు డిమాండ్ చేస్తున్నారని.. తనను కాపాడాలని మంత్రి లోకేష్‌‌ను రిక్వెస్ట్ చేశారు. తన ఆరోగ్య పరిస్థితి కూడా సరిగా లేదన్నారు.