అగ్నిగుండంగా మారిన మణిపూర్.. హింస వేళ బీజేపీ ఎమ్మెల్యే వివాదాస్పద వ్యాఖ్యలు

మైతీ, కుకీ తెగల మధ్య గత ఏడాదికి పైగా సాగుతున్న ఉద్రిక్తతలు తీవ్ర హింసకు దారితీస్తున్న ఘటనలు చూస్తూనే ఉన్నాం. కుకీ మిలిటెంట్లు.. మైతీలపై.. మణిపూర్‌లో మోహరించిన భద్రతా బలగాలపై దాడులకు పాల్పడటం.. ఇళ్లు, ఆఫీస్‌లు, వాహనాలకు నిప్పంటించడం సహా అనేక దారుణాలకు తెగబడుతున్న వేళ.. తాజాగా కుకీ వర్గానికి చెందిన బీజేపీ ఎమ్మెల్యే చేసిన పని ఆ రాష్ట్రంలో మరింత అగ్గిరాజేస్తోంది. ఇటీవల ఎదురుకాల్పుల్లో చనిపోయిన కుకీ మిలిటెంట్లను అమరులు అని పేర్కొంటూ వారికి నివాళులు అర్పించడం పెను సంచనలంగా మారింది. దీనికి సంబంధించిన వీడియో ప్రస్తుతం సోషల్ మీడియాలో వైరల్ అవుతుండటంతో.. తీవ్ర విమర్శలు వెల్లువెత్తుతున్నాయి.

జిరిబామ్ జిల్లాలో ఇటీవల మిలిటెంట్లు, భద్రతా బలగాల మధ్య జరిగిన భీకర కాల్పుల్లో 10 మంది మిలిటెంట్లు హతం అయ్యారు. ఈ సందర్భంగా చురాచంద్‌పుర్ నుంచి బీజేపీ తరఫున ఎమ్మెల్యేగా గెలిచిన లాలియన్ మాంగ్ ఖౌటే.. తాజాగా చనిపోయిన ఆ మిలిటెంట్లకు నిర్వహించిన నివాళుల కార్యక్రమంలో పాల్గొన్నారు. ఈ సందర్భంగా చనిపోయిన కుకీ మిలిటెంట్లను అమరవీరులు అంటూ ఆయన నివాళులు అర్పించారు. ఈ దృశ్యాలు సోషల్ మీడియాలో వైరల్ అవుతుండటం సంచలనం రేపుతోంది.

ఇటీవల కొందరు కుకీ మిలిటెంట్లు.. జిరిబామ్‌ జిల్లా బోరోబెక్రా పోలీస్‌ స్టేషన్‌పై దాడులకు తెగబడ్డారు. ఆ తర్వాత సమీపంలో ఉన్న జకురాడోర్‌ కరోంగ్‌ గ్రామం వైపు దూసుకెళ్లి అక్కడ నానా బీభత్సం సృష్టించారు. అనేక దుకాణాలకు నిప్పంటించారు. ఈ క్రమంలోనే భద్రతా దళాలు-మిలిటెంట్ల మధ్య హోరాహోరీగా కాల్పులు జరిగాయి. ఈ కాల్పుల ఘటనలో 10 మంది కుకీ మిలిటెంట్లు హతమైనట్లు స్థానిక అధికారులు తెలిపారు. పలువురు భద్రతా సిబ్బందికి కూడా గాయాలైనట్ల చెప్పారు.

అదే సమయంలో మైతీ తెగలోని ఒక కుటుంబానికి చెందిన మహిళలు, చిన్నారులను మరో మిలిటెంట్ గ్రూప్‌ బందించి తీసుకువెళ్లడం గమనార్హం. ఆ తర్వాత వారు చనిపోగా.. మృతదేహాలను నదిలో పడేయడం మరోసారి మణిపూర్‌లో తీవ్ర ఉద్రిక్తతలకు కారణం అయింది. మరోవైపు.. మణిపూర్ ముఖ్యమంత్రి బీరేన్‌ సింగ్‌ పూర్వీకుల ఇంటిపై దాడి చేసేందుకు కొందరు సాయుధులు ప్రయత్నాలు చేయగా భద్రతా సిబ్బంది అడ్డుకున్నారు. ఇక మణిపూర్‌లో జరుగుతున్న హింసాత్మక పరిస్థితులను కేంద్ర హోంశాఖ మంత్రి అమిత్‌ షా ఎప్పటికప్పుడు సమీక్షిస్తున్నారు.