విద్యార్థులకు గుడ్‌న్యూస్.. స్కూళ్లకు 4 రోజులు సెలవులు

ఉత్తర భారతదేశాన్ని ప్రస్తుతం కాలుష్యం తీవ్రంగా వేధిస్తోంది. శీతాకాలం ప్రారంభం కావడం, గాలి కాలుష్యం పెరిగిపోవడంతో పరిస్థితి తీవ్రంగా మారింది. ఈ నేపథ్యంలోనే పలు రాష్ట్రాల్లో ప్రభుత్వాలు కాలుష్య కట్టడికి చర్యలు తీసుకుంటున్నాయి. ఇందులో భాగంగానే స్కూళ్లకు సెలవులు ప్రకటిస్తోంది. ఉద్యోగులు వర్క్ ఫ్రమ్ హోమ్ చేయాలని సూచించారు. అంతేకాకుండా అవసరం అయితే తప్ప బయటికి రావద్దని హితవు పలుకుతున్నారు. ఇక మరికొన్ని ప్రాంతాల్లో ఆన్‌లైన్ క్లాసులు నిర్వహిస్తున్నారు. ఉత్తర భారత రాష్ట్రాలైన ఢిల్లీ, హర్యానా, పంజా, ఉత్తర్‌ప్రదేశ్, మహారాష్ట్రలో కాలుష్యాన్ని కట్టడి చేసేందుకు ప్రభుత్వాలు తక్షణ చర్యలను అమలు చేస్తున్నాయి. ప్రభావిత రాష్ట్రాల్లో గాలి నాణ్యత సూచీలు ప్రమాదకరమైన స్థాయికి మించి నమోదవుతుండటంతో విద్యార్థుల ఆరోగ్యం దృష్ట్యా అధికారులు చర్యలు చేపడుతున్నారు.

హర్యానాలో గాలి నాణ్యత సూచీ - ఏక్యూఐ 320 నమోదైనట్లు అధికారులు వెల్లడించారు. ప్రజల ఆరోగ్యాన్ని పరిరక్షించేందుకు రాష్ట్ర ప్రభుత్వం చర్యలు చేపట్టింది. ఇందులో భాగంగానే రాష్ట్రంలోని ప్రభుత్వ, ప్రైవేట్ పాఠశాలల్లో 5వ తరగతి వరకు విద్యార్థులకు హర్యానా ప్రభుత్వం సెలవులు ప్రకటించింది. ఈనెల 22వ తేదీ వరకు ఈ సెలవులు కొనసాగుతాయని వెల్లడించింది. స్థానిక గాలి నాణ్యత పరిస్థితులను బట్టి సెలవును పొడిగించడానికి లేదా ఆన్‌లైన్ తరగతులకు మార్చడానికి డిప్యూటీ కమిషనర్‌లను అనుమతిస్తూ డైరైక్టరేట్ ఆఫ్ స్కూల్ ఎడ్యుకేషన్ ఆదేశాలు జారీ చేసింది.

 ఇక అధికారిక ఉత్తర్వులు జారీ చేయనప్పటికీ.. పంజాబ్ ప్రభుత్వం కూడా స్కూళ్లకు సెలవులు ప్రకటించే పరిస్థితిని నిశితంగా పరిశీలిస్తోంది. గాలి నాణ్యత సూచీ 207 నమోదు కావడంతో ముందస్తుగానే జాగ్రత్త చర్యలు చేపట్టింది. విద్యార్థుల ఆరోగ్యాన్ని దృష్టిలో ఉంచుకుని పాఠశాలలకు సెలవు ప్రకటించే అవకాశాలను ఆలోచిస్తోంది. తీవ్రమైన గాలి కాలుష్యం దృష్ట్యా పాఠశాలలను మూసివేసి ఆన్‌లైన్ తరగతులు నిర్వహిస్తున్నారు. అయితే బోర్డు పరీక్షలకు సిద్ధమవుతున్న 10, 12 తరగతుల విద్యార్థులు మాత్రం స్కూలుకు రావాలని తెలిపింది.

ఇక ఉత్తర్‌ప్రదేశ్‌లోని గజియాబాద్, నోయిడా, మీరట్ వంటి నగరాల్లో ఢిల్లీ రాజధాని ప్రాంతంలో భాగంగా ఉండగా.. ప్రస్తుతం ఈ ప్రాంతాల్లో కూడా గాలి కాలుష్యం భారీగా ఉంది. దీంతో పాఠశాలలను మూసివేసే అవకాశం ఉండగా.. వీటికి సంబంధించి అధికారుల మధ్య చర్చలు కొనసాగుతున్నాయి. మరోవైపు.. ఢిల్లీలో గాలి నాణ్యత ప్రమాదకర స్థాయికి చేరుకుంది. ఆనంద్ విహార్ ప్రాంతంలో 487, చాందినీ చౌక్ ప్రాంతంలో 444, ద్వారక ప్రాంతంలో 499 నమోదైంది. ఇక అనేక ప్రాంతాల్లో 450 నుంచి 500 మధ్య ఏక్యూఐ నమోదైనట్లు పేర్కొన్నారు.