విజయ్ మాల్యా, నీరవ్ మోదీ భారత్‌కు రప్పించేందుకు ప్రధాని స్కెచ్.. బ్రిటన్ టూర్‌లో కీలక పరిణామం

భారత్‌లో వేల కోట్ల రూపాయలు ఎగ్గొట్టి విదేశాలకు పారిపోయిన ఆర్థిక నేరగాళ్లను తిరిగి దేశానికి రప్పించేందుకు కేంద్రంలోని నరేంద్ర మోదీ ప్రభుత్వం అన్ని చర్యలు తీసుకుంటోంది. ఈ క్రమంలోనే భారత బ్యాంకులకు వేల కోట్లు ఎగనామం పెట్టి.. బ్రిటన్ పారిపోయిన విజయ్ మాల్యా, నీరవ్ మోదీలను తిరిగి భారత్‌కు అప్పగించాలని.. ఇప్పటికే బ్రిటన్‌కు భారత్ విజ్ఞప్తి చేసింది. తాజాగా బ్రెజిల్ వేదికగా జరుగుతున్న జీ20 సదస్సులో భాగంగా బ్రిటన్ ప్రధానితో సమావేశం అయిన ప్రధాని మోదీ.. విజయ్ మాల్యా, నీరవ్ మోదీలను తిరిగి తమకు అప్పగించాలని కోరారు.

బ్రెజిల్ వేదికగా జరుగుతున్న జీ20 సదస్సులో భాగంగా పలు దేశాల అధినేతలతో ప్రధాని నరేంద్ర మోదీ భేటీ అవుతున్నారు. ఈ క్రమంలోనే బ్రిటన్ ప్రధాని కీర్ స్టార్మర్‌తో భేటీ అయిన మోదీ.. విజయ్ మాల్యా, నీరవ్ మోదీలను భారత్‌కు అప్పగించాలని విజ్ఞప్తి చేశారు. వీరిద్దరితో పాటు పన్ను ఎగవేత, మనీలాండరింగ్‌ ఆరోపణలు ఎదుర్కొంటున్న సంజయ్‌ భండారీని కూడా భారత్‌కు రప్పించేందుకు కేంద్ర ప్రభుత్వం అన్ని ప్రయత్నాలు చేస్తోంది.

2018లో తప్పుడు పత్రాలతో పంజాబ్‌ నేషనల్ బ్యాంక్‌ను నీరవ్‌ మోదీ మోసగించినట్లు బయటికి వచ్చింది. ఈ కేసును ఇప్పటికే సీబీఐ, ఈడీ విచారణ జరుపుతున్నాయి. ఇక ఇప్పటికే నీరవ్ మోదీ ఆస్తులను ఈడీ స్వాధీనం చేసుకుంది. ఈ క్రమంలోనే 2018 డిసెంబర్‌లో నీరవ్‌ మోదీ తమ దేశంలోనే ఉన్నాడని బ్రిటన్‌ ప్రభుత్వం భారత్‌కు సమాచారం అందించింది. ఈ నేపథ్యంలోనే నీరవ్ మోదీని తమకు అప్పగించాలని భారత్‌ కోరగా.. 2019 మార్చిలో నీరవ్‌ మోదీని బ్రిటన్ పోలీసులు అరెస్ట్‌ చేశారు. ఈ క్రమంలోనే నీరవ్ మోదీని భారత్‌కు అప్పగించేందుకు ఈ ఏడాది బ్రిటన్‌ సర్కార్ ఆమోదం తెలిపింది. దీంతో తనను భారత్‌కు అప్పగించడాన్ని నీరవ్ మోదీ అక్కడి కోర్టులో సవాల్ చేయగా.. కోర్టు కొట్టివేసింది.

ఇక విజయ్‌ మాల్యా కూడా భారత్‌లో రూ.9వేల కోట్ల మేర బ్యాంకు రుణాలను ఎగవేసి విదేశాలకు పరారయ్యాడు. ఆ తర్వాత విజయ్ మాల్యా విదేశాల్లో భారీగా ఆస్తులు కొనుగోలు చేసినట్లు.. సీబీఐ అధికారులు ముంబై కోర్టులో ఛార్జిషీట్‌ దాఖలు చేశారు. విదేశాల్లో భారీగా ఆస్తులు కొన్న తర్వాత అతడు భారత్‌ను విడిచిపెట్టి పారిపోయినట్లు తెలిపింది. అయితే ఇలాంటి ఆర్థిక నేరగాళ్లను భారత్‌కు అప్పగించే విషయంలో బ్రిటన్‌ ప్రభుత్వం మొదటి నుంచి మద్దతుగానే నిలుస్తోంది. కొన్ని న్యాయపరమైన అంశాల వల్ల నిందితుల అప్పగింత ప్రక్రియ ఆలస్యంగా మారుతోంది. ఇక ఇలాంటి వారు భారత్‌లో విచారణ ఎదుర్కోవాలని బ్రిటన్ మాజీ ప్రధాని బోరిస్‌ జాన్సన్‌ కూడా స్పష్టం చేశారు. భారత్‌లో మోసాలు చేసి.. బ్రిటన్ న్యాయవ్యవస్థలను ఉపయోగించుకొని తప్పించుకోవాలనుకునే వారిని ఎట్టి పరిస్థితుల్లోనూ అంగీకరించమని బోరిస్ వెల్లడించారు.