ఇప్పటికీ దేశరాజధానిగా ఢిల్లీనే ఉండాలా.. శశిథరూర్ సంచలన పోస్ట్

దేశ రాజధాని ఢిల్లీని కాలుష్యం పట్టి పీడిస్తోంది. నానాటికీ ఢిల్లీలో గాలి నాణ్యతా సూచీ క్షీణిస్తుండటం తీవ్ర ఆందోళనకు గురి చేస్తోంది. కాలుష్యానికి తోడు శీతాకాలం కావడంతో పొగమంచు కప్పేస్తుండటంతో.. గాలి నాణ్యత సూచీ తీవ్ర ప్రమాదకర స్థాయిని మించిపోయింది. ఢిల్లీ ప్రభుత్వం కఠిన చర్యలు, ఆంక్షలు విధిస్తున్నా.. పరిస్థితుల్లో మాత్రం ఎలాంటి మార్పు రావడం లేదు సరికదా ఇంకా పెరుగుతుండటం తీవ్ర కలవరపాటుకు గురి చేస్తోంది. ఈ క్రమంలోనే ఢిల్లీని రాజధానిగా ఉంచడంపై కాంగ్రెస్ ఎంపీ శశిథరూర్ ట్విటర్ వేదికగా కేంద్ర ప్రభుత్వాన్ని నిలదీశారు.

ప్రపంచ వ్యాప్తంగా ఉన్న కాలుష్య నగరాలకు సంబంధించిన లిస్ట్‌ను ట్వీట్ చేసిన శశిథరూర్.. ఒక సుదీర్ఘ పోస్ట్ వేశారు. ఓ నివేదిక ప్రకారం ప్రపంచంలోనే అత్యంత కాలుష్యంతో నిండి ఉన్న నగరంగా ఢిల్లీ మొట్టమొదటి స్థానంలో ఉన్నట్లు అందులో ఉంది. ఢిల్లీలో ప్రమాదకర కాలుష్య కారకాలు 4 రెట్లు పెరిగినట్లు శశిథరూర్ పేర్కొన్నారు. ఇక ఢిల్లీ తర్వాత ప్రపంచంలోనే అత్యంత కాలుష్య నగరంగా రెండో స్థానంలో బంగ్లాదేశ్‌ రాజధాని ఢాకా నిలిచింది. ఢాకాతో పోలిస్తే ఢిల్లీలో ప్రమాద స్థాయి 5 రెట్లు ఎక్కువగానే ఉంది.

ఢిల్లీలో ఇలాంటి తీవ్రమైన కాలుష్య పరిస్థితి గత కొన్నేళ్లుగా కనిపిస్తున్నా.. కేంద్రంలోని నరేంద్ర మోదీ ప్రభుత్వం మాత్రం అసలు పట్టించుకోవట్లేదని శశిథరూర్ ఆరోపణలు గుప్పించారు. ప్రతీ సంవత్సరం నవంబరు నుంచి జనవరి నెలల మధ్య ఢిల్లీ నగరంలో అసలు నివాసించే పరిస్థితి ఉండటం లేదని మండిపడ్డారు. మిగతా నెలల్లోనూ అంతంతమాత్రంగానే ఢిల్లీలో జీవనం కొనసాగించగలమని పేర్కొన్నారు. ఇలాంటి తీవ్ర పరిణామాల మధ్య ఢిల్లీని ఇంకా దేశ రాజధానిగా కొనసాగించాలా అని శశిథరూర్ తన ట్వీట్‌లో రాసుకొచ్చారు.

మరోవైపు.. ఢిల్లీ నగరాన్ని మంగళవారం కూడా పొగమంచు దట్టంగా కమ్మేసింది. దీంతో సగటు గాలి నాణ్యతా సూచీ 494కి పడిపోవడం తీవ్ర ఆందోళనకు గురి చేస్తోంది. ఇక ఢిల్లీలోని చాలా ప్రాంతాల్లో గాలి నాణ్యతా సూచీ 500 దాటినట్లు వాతావరణ శాఖ అధికారులు వెల్లడించడం తీవ్ర భయాందోళనలు రేపుతోంది. దీంతో వరుసగా రెండోరోజు ఢిల్లీలో ఆరెంజ్‌ అలర్ట్‌ కొనసాగుతోంది. ఉదయం 10 గంటలు దాటినా వాతావరణంలో ఉన్న తీవ్రమైన పొగమంచు కారణంగా ఎదురుగా వస్తున్న వాహనాలు కూడా కన్పించని దుస్థితి నెలకొంది. దీంతో విమానాలు, రైళ్ల రాకపోకలకు అంతరాయం ఏర్పడింది. కొన్ని విమానాలు, రైళ్లు ఆలస్యంగా నడుస్తుండగా మరికొన్ని పూర్తిగా రద్దు కావడంతో ప్రయాణికులు తీవ్ర అవస్థలు పడుతున్నారు.

ఇక ఢిల్లీ వాయు కాలుష్యంపై సోమవారం విచారణ జరిపిన సుప్రీంకోర్టు.. కాలుష్య నియంత్రణకు చర్యలు చేపట్టడంలో ఢిల్లీ ప్రభుత్వం ప్రదర్శిస్తున్న అలసత్వంపై తీవ్ర ఆగ్రహం వ్యక్తం చేసింది. తమకు చెప్పకుండా ఎలాంటి ఆంక్షలు సడలించొద్దని ఆదేశాలు జారీ చేసింది. ప్రస్తుతం ఢిల్లీతోపాటు రాజధాని ప్రాంతంలో జీఆర్‌ఏపీ-4 లెవల్‌ ఆంక్షలు కొనసాగుతున్నాయి.