ముడా కుంభకోణంపై సిద్దరామయ్య, కేంద్ర మంత్రి మధ్య ఆసక్తికర సంభాషణ

మైసూర్ అర్బన్ డెవలప్‌మెంట్ అథారిటీ (ముడా) భూ కేటాయింపుల వ్యవహారంలో కర్ణాటక ముఖ్యమంత్రి సిద్ధరామయ్య ఆరోపణలు ఎదుర్కొంటున్న విషయం తెలిసిందే. సిద్ధరామయ్య భార్య పార్వతికి నిబంధనలకు విరుద్ధంగా సైట్లు కేటాయించారనేది ప్రధాన ఆరోపణ. సిద్ధూకు రాజకీయ సంకటంగా మారడంతో వాటిని ఆమె తిరిగి ముడాకు అప్పగించారు. తాజాగా, ఇదే అంశంపై సిద్ధరామయ్యా, కేంద్ర రైల్వే శాఖ సహాయ మంత్రి వి.సోమణ్ణ మధ్య ఆసక్తికర సంభాషణ జరిగింది. బెంగళూరులోని రమణశ్రీ హోటల్‌లో సోమవారం జరిగిన ఓ అవార్డుల కార్యక్రమానికి ఇరువురూ హాజరయ్యారు. ఈ సందర్భంగా ఇరువురూ ముచ్చటించుకున్నారు. కరచాలనం చేసిన సిద్ధూ.. సోమణ్ణ భుజంపై చేయి వేసి మాట్లాడారు.

ఈ క్రమంలో‘ముడాలో అక్రమాలు ఏంటీ’ అని సోమణ్ణ ప్రశ్నించగా... ‘నేను ఏదైనా నేరుగా మాట్లాడతాను.. వేరేవాళ్లలా బెదిరించడం, ముందొక మాట, వెనుక ఒక మాట మాట్లాడను.. నిబంధనల ప్రకారమే నాకు 14 సైట్లు వచ్చాయని నా భార్య పార్వతి భావించింది.. ఆరోపణలు వచ్చాక ఆమే స్వచ్ఛందగా ఆ స్థలాలను ఇచ్చేసింది. భూసేకరణ చట్టాలకు అనుగునంగానే ఆ ప్రక్రియ కొనసాగింది.. లేని అవినీతిని నాకు అంటగట్టేందుకు కొందరు ప్రయత్నిస్తున్నారు’ అంటూ సిద్ధు వివరించారు. తన పాతమిత్రుడికి ముడా కేటాయింపుల్లో వాస్తవాలపై అవగాహన కల్పించారు.

సిద్ధూ, సోమణ్ణ ఇద్దరూ గతంలో మిత్రులు. ఒకప్పుడు ఇద్దరూ జనతాదళ్‌లో కలిసి పనిచేసిన వారే. కాంగ్రెస్‌లోకి సిద్ధరామయ్య వెంట వచ్చినసోమణ్ణ.. ఆ పార్టీ నుంచి ఎమ్మెల్యేగా గెలిచారు. తర్వాత పరిణామాలతో సోమణ్ణ బీజేపీకి గూటికి చేరారు. సిద్ధరామయ్య కాంగ్రెస్‌లో కొనసాగుతున్నారు. మరోవైపు, ముడా స్థలాలను అప్పగించాలని ముందుగానే తాను చేసిన సూచనను పట్టించుకోకుండా తప్పు చేశావని సిద్దూకు సోమణ్ణ చెప్పినట్టు తెలుస్తోంది. ముందే తనకు కేటాయించిన 14 స్థలాలను సీఎం సతీమణి పార్వతి సరెండర్ చేసి ఉంటే వివాదం ఉండేది కాదని సోమన్న అభిప్రాయపడ్డారు. ముడా భూముల వ్యవహారం జులైలో వెలుగులోకి రాగా.. వాటిని సెప్టెంబరు 30న పార్వతి అప్పగించారు. దీనిపై ఇప్పటికే సీఎం సిద్ధరామయ్యను లోకాయుక్త ఎదుట విచారణకు ఆదేశించారు.