ఏపీ రైతులకు తీపికబురు.. 24 గంటల్లోనే అకౌంట్లలోకి డబ్బులు జమ

ఆంధ్రప్రదేశ్‌లోని రైతులకు ప్రభుత్వం తీపికబురు వినిపించింది. ధాన్యం కొనుగోలు చేసిన రెండు రోజుల్లోనే బ్యాంకు అకౌంట్లోకి డబ్బులు జమచేస్తామని చెప్పిన ఆంధ్రప్రదేశ్ ప్రభుత్వం.. 24 గంటల్లోనే బ్యాంకు ఖాతాల్లోకి డబ్బులు జమ చేస్తోంది. ఏపీ పౌరసరఫరాల శాఖ మంత్రి నాదెండ్ల మనోహర్ ఈ విషయాన్ని వెల్లడించారు. ఇప్పటివరకూ ఆంధ్రప్రదేశ్ వ్యాప్తంగా 418.75 కోట్ల విలువైన ధాన్యం కొనుగోలు చేసినట్లు మంత్రి వెల్లడించారు. ఇందులో 391.50 కోట్ల రూపాయలు రైతుల‌ ఖాతాల్లో జమ చేసినట్లు తెలిపారు. 24 గంటల్లోపు 281.30 కోట్లు రైతుల అకౌంట్లలోకి జమ చేసినట్లు నాదెండ్ల మనోహర్ వివరించారు. ధాన్యం విక్రయించిన 24 గంటల్లో నగదు జమ అవుతోందని మంత్రి మనోహర్.. ఒకట్రెండు రోజుల్లోనే నగదు జమచేసేలా చర్యలు తీసుకుంటున్నట్లు చెప్పారు.

ఆంధ్రప్రదేశ్ వ్యాప్తంగా రైతుల కుటుంబాల్లో పండగ వాతావరణం ఉందన్న నాదెండ్ల మనోహర్.. ధాన్యం డబ్బుల కోసం గతంలో ఎప్పుడెప్పుడు పడతాయా అని రైతులు ఎదురు చూసేవారన్నారు. కూటమి ప్రభుత్వం అధికారంలోకి వచ్చిన తర్వాత ధాన్యం కొనుగోలుపై పటిష్ట ప్రణాళిక అమలు చేస్తున్నట్లు వివరించారు. ధాన్యం కొనుగోలు కోసం తూర్పుగోదావరి, ప‌శ్చిమ‌గోదావరి, ఏలూరు, కాకినాడ‌, కోన‌సీమ‌, కృష్ణా, ఎన్టీఆర్ జిల్లాల్లో 617 ధాన్యం కొనుగోలు కేంద్రాలు ఏర్పాటు చేసినట్లు వెల్లడించారు. 24051 మంది రైతుల నుంచి 1,81,988 మెట్రిక్ టన్నుల ధాన్యం కొనుగోలు చేసినట్లు పౌర సరఫరాల శాఖ మంత్రి నాదెండ్ల మనోహర్ వెల్లడించారు.

మరోవైపు రైతులు తాము పండించిన ధాన్యం అమ్ముకోవడానికి ఇబ్బందులు పడాల్సిన అవసరం లేకుండా ఏపీ ప్రభుత్వం వాట్సాప్ చాట్‌బోట్ సేవలు ప్రారంభించింది. కేవలం వాట్సాప్‌లో హాయ్ అని చెప్తే చాలు ధాన్యం విక్రయాల కోసం షెడ్యూల్ చేసుకునేలా దీనిని ఏర్పాటు చేశారు. ఇందుకోసం 73373 59375 నంబరును అందుబాటులోకి తెచ్చారు. ఈ నంబరుకు వాట్సాప్ నుంచి హాయ్ అని చెబితే చాలు... సేవలు అందుబాటులోకి వస్తాయి. ధాన్యం అమ్మాలనుకుంటున్న రైతులు.. ఏ రోజు, ఏ కేంద్రంలో, ఏ సమయంలో, ఏ రకం ధాన్యం, ఎన్ని బస్తాలు అమ్మాలనుకుంటున్నారనే వివరాలను ఇందులో ఎంచుకుంటే స్లాట్ బుక్ అవుతుంది. ఆర్టిఫిషియల్ ఇంటెలిజెన్స్ ద్వారా వాయిస్ ఓవర్‌తో ఈ సేవలను ప్రారంభించారు