మణిపూర్ హింసకు కారణం చిదంబరం.. సీఎం బీరెన్ సింగ్ సంచలన ఆరోపణలు

ప్రస్తుతం మణిపూర్‌లో మైతీ, కుకీ తెగల మధ్య చోటు చేసుకున్న తీవ్ర ఘర్షణలపై కాంగ్రెస్, బీజేపీలు పరస్పరం తీవ్ర విమర్శలు చేసుకుంటున్నాయి. గత ఏడాదిన్నరకు పైగా ఆ రాష్ట్రం జాతుల మధ్య హింసకు కారణం.. అధికారంలో ఉన్న బీజేపీ కారణం అని కాంగ్రెస్ పార్టీ తీవ్ర విమర్శలు గుప్పించింది. అంతేకాకుండా ఈ ఘటనకు బాధ్యత వహిస్తూ ముఖ్యమంత్రి బీరెన్ సింగ్ రాజీనామా చేయాలని డిమాండ్ చేస్తోంది. అయితే అధికార బీజేపీ కూడా కాంగ్రెస్ పార్టీపై ప్రతివిమర్శలకు దిగింది. మణిపూర్‌లో మంటలు చెలరేగడానికి కారణం కాంగ్రెస్ పార్టీ అని.. మరీ ముఖ్యంగా కేంద్ర హోంశాఖ మాజీ మంత్రి, కాంగ్రెస్ పార్టీ సీనియర్ నేత పి. చిదంబరం అని మణిపూర్ సీఎం బీరెన్ సింగ్ తీవ్ర విమర్శలు చేశారు. మణిపుర్‌లో నెలకొన్న పరిస్థితికి రాష్ట్ర ప్రభుత్వామే అంటూ పి. చిదంబరం చేసిన ఆరోపణలను బీరెన్ సింగ్ ఖండించారు.

గతంలో కాంగ్రెస్ పార్టీ అధికారంలో ఉన్నపుడు ఉన్న లోపాలను ఎత్తి చూపారు. కాంగ్రెస్‌ సీనియర్‌ నేత పి.చిదంబరం చేసిన వ్యాఖ్యలను చూసి ఆశ్చర్యపోయినట్లు బీరెన్ సింగ్ పేర్కొన్నారు. మణిపూర్‌లో ప్రస్తుతం నెలకొన్న ఈ పరిస్థితికి తనను బాధ్యుడిని చేయడం ఆమోదయోగ్యం కాదని తెలిపారు. నిజానికి కాంగ్రెస్‌ పార్టీ హయాంలో జరిగిన తప్పులే మణిపూర్‌ హింసకు కారణం అని తీవ్ర ఆరోపణలు చేశారు. కేంద్ర హోంశాఖ మంత్రిగా చిదంబరం ఉన్న సమయంలోనే మణిపూర్‌ సీఎంగా ఓక్రమ్‌ ఇబోబి సింగ్‌ పని చేశారు.

గతంలో మయన్మార్‌కు చెందిన తంగ్లియన్‌పావ్ గైట్‌ని ఓక్రమ్ ఇబోబి సింగ్.. మణిపూర్‌లోకి తీసుకువచ్చారని బీరెన్ సింగ్ ఆరోపించారు. మయన్మార్‌లో నిషేధిత జోమీ రీ-యూనిఫికేషన్ ఆర్మీ ఛైర్మన్‌ తంగ్లియన్‌పావ్ గైట్‌ అని తెలిపారు. మయన్మార్ నుంచి అక్రమంగా వచ్చిన వలసదారుల సమస్య మణిపూర్‌లో ఈ పరిస్థితులకు దారితీసిందని పేర్కొన్నారు. మణిపూర్‌లో అన్ని సమస్యలను సృష్టించింది కాంగ్రెస్ పార్టీనే అని మండిపడ్డారు. కాంగ్రెస్ పార్టీ ఈశాన్య ప్రాంతాలను, అక్కడ ఉన్న ప్రజలను ఎన్నడూ పట్టించుకోలేదని పేర్కొన్న బీరెన్ సింగ్.. ఈ పరిస్థితికి పి.చిదంబరం కారణం అని ఆరోపించారు.

ఇక మణిపూర్‌లో శాంతిభద్రతలను పునరుద్ధరించడంలో సీఎం బీరెన్‌ సింగ్‌ తీవ్రంగా విఫలం అయ్యారని పౌరహక్కుల నేత, మణిపూర్‌ ఉక్కు మహిళ ఇరోమ్‌ షర్మిల డిమాండ్‌ చేశారు. మణిపూర్‌లో నెలకొన్న సమస్యలను పరిష్కారం చేసేందుకు ప్రజాభిప్రాయ సేకరణ చేపట్టాలని కేంద్ర ప్రభుత్వాన్ని కోరారు. మరోవైపు మణిపూర్‌ పరిస్థితిపై త్వీర ఆందోళన వ్యక్తం చేసిన కాంగ్రెస్‌ జాతీయాధ్యక్షుడు మల్లికార్జున ఖర్గే.. ఆ రాష్ట్రంలో శాంతిభద్రతలు పునరుద్ధరించేందుకు జోక్యం చేసుకోవాలని రాష్ట్రపతి ద్రౌపది ముర్ముకు విజ్ఞప్తి చేశారు. ఈ హింసాత్మక ఘటనల్లో ఎంతో మంది చిన్నారులు, మహిళలు ప్రాణాలు కోల్పోయారని గుర్తు చేశారు.