ఓపెన్ చేసిన తెల్లారే మూతపడ్డ హాస్పిటల్.. గ్రాండ్‌గా ఓపెనింగ్ చేసి అడ్డంగా దొరికిపోయారు

గుజరాత్‌లో భారీ హంగు, ఆర్భాటంతో ప్రారంభమైన ఓ ఆస్పత్రి.. ఒక్కరోజులోనే మూతపడటం ప్రస్తుతం తీవ్ర చర్చనీయాంశంగా మారింది. అనుమతులు లేకుండా చిన్న చిన్న క్లినిక్‌లు నడిపే కొందరు నకిలీ డాక్టర్లు.. ఏకంగా ఓ పెద్ద ఆస్పత్రినే కట్టారు. అంతేకాకుండా దాన్ని ప్రారంభించేందుకు భారీగా ఏర్పాట్లు కూడా చేశారు. ఈ ఆస్పత్రిని ప్రారంభించేందుకు కొందరు అధికారులు, పోలీసులు వస్తున్నట్లు ప్రచారం చేశారు. ఈ క్రమంలోనే అంగరంగ వైభవంగా ప్రారంభించారు. అయితే ఒక్క రోజులోనే అంతా మారిపోయింది. వాళ్లు ఫేక్ డాక్టర్లు అని తేలిపోవడంతో ఆ ఆస్పత్రి మూతపడింది. గుజరాత్‌లోని సూరత్ పట్టణంలో జరిగిన ఈ సంఘటన ప్రస్తుతం తీవ్ర చర్చకు దారి తీస్తోంది.

సూరత్‌కు చెందిన ఐదుగురు వ్యక్తులు కలిసి పండేసారా ప్రాంతంలో జన్‌సేవ మల్టీ స్పెషాలిటీ ఆస్పత్రిని ఆదివారం ప్రారంభించారు. ఈ ఐదుగురు వ్యక్తుల్లో బీఆర్ శుక్లా అనే వ్యక్తి తాను ఆయుర్వేదిక్ మెడిసిన్ డిగ్రీ చదివినట్లు యాడ్ పేపర్‌లో ప్రింట్ చేయించాడు. అయితే అతడు ఫేక్ డాక్టర్ అని గుర్తించిన అధికారులు గుజరాత్ మెడికల్ ప్రాక్టీషినర్స్ యాక్ట్ కింద కేసు నమోదు చేసినట్లు సీనియర్ పోలీస్ అధికారి విజయ సింగ్ గుర్జార్ వెల్లడించారు. ఇక ఆ హాస్పిటల్ ఓపెనింగ్‌కు వచ్చే అతిథులకు ఒక్క మాట కూడా చెప్పకుండా వారి పేర్లను గెస్ట్‌ల లిస్ట్‌లో చేర్చడం గమనార్హం. ఇక మొత్తం ఐదుగురు వ్యక్తుల్లో ఇద్దరు వ్యక్తులకు ఫేక్ మెడిసిన్ డిగ్రీలు ఉన్నాయని పేర్కొన్నారు. మిగిలిన వ్యక్తుల మెడిసిన్ డిగ్రీ సర్టిఫికేట్లను వెరిఫికేషన్ చేస్తున్నారు.

ఈ వ్యవహారం బయటపడటంతో జన్‌సేవ మల్టీ స్పెషాలిటీ ఆస్పత్రిని అధికారులు సోమవారం మూసివేశారు. ఇక ఎలక్ట్రో హోమియోపతిలో డిగ్రీ ఉందని ఆర్‌కే దూబే అనే మరో వ్యక్తి పేర్కొనగా అధికూడా ఫేక్ అని తేల్చారు. వీరితోపాటు జీపీ మిశ్రా అనే మరో వ్యక్తిపై 3 కేసులు నమోదు చేసినట్లు తెలిపారు. అతడి డిగ్రీ ఏంటి అనేది ఇంకా వెల్లడించలేదని పోలీసులు వివరించారు. ఇక మిగితా ఇద్దరి సంగతి కూడా విచారణ జరుపుతున్నట్లు పేర్కొన్నారు.

ఇక ఆ ఆస్పత్రి ఓపెనింగ్‌కు సూరత్ మున్సిపల్ కమిషనర్ షాలినీ అగర్వాల్, సూరత్ పోలీస్ కమిషనర్ అనుపం సింగ్ గహ్లోత్, జాయింట్ పోలీస్ కమిషనర్ రాఘవేంద్ర వట్సాలు వస్తారని అతిథుల జాబితాలో పేర్లు చేర్చారు. అయితే వారు మాత్రం దీని గురించి తమకు ఎలాంటి సమాచారం లేదని.. తాము ఆ ప్రారంభోత్సవానికి హాజరు కాలేదని తేల్చి చెప్పారు. దీంతో జన్‌సేవ మల్టీ స్పెషాలిటీ ఆస్పత్రిని మూసివేసిన అధికారులు.. తదుపరి దర్యాప్తును కొనసాగిస్తున్నారు.