ఏపీలో అక్కడ ఉచిత బస్సు సౌకర్యం.. అది కూడా వారికే..

విజయవాడ దుర్గ గుడి ఘాట్ రోడ్డును అధికారులు మూసివేయనున్నారు. దుర్గ గుడి ఘాట్ రోడ్డును మంగళవారం (నవంబర్ 19) సాయంత్రం నుంచి మూడు రోజుల పాటు మూసివేయనున్నారు. కొండ రక్షణ చర్యల్లో భాగంగా మూడు రోజుల పాటు దుర్గ గుడి ఘాట్ రోడ్డు మూసివేస్తున్నట్లు అధికారులు వెల్లడించారు. నవంబర్ 19 సాయంత్రం నుంచి నవంబర్ 22 వరకూ ఘాట్ రోడ్డులో రాకపోకలపై ఆంక్షలు ఉంటాయని తెలిపారు. ఇంద్రకీలాద్రిపై కొలువైన కనకదుర్గమ్మ దర్శనానికి వచ్చే భక్తులు కనకదుర్గానగర్ మీదుగా రావాలని అధికారులు సూచించారు. సామాన్య భక్తులు, వీఐపీలు, సిబ్బంది ఈ మార్గంలోనే రావాలని విజయవాడ దుర్గ గుడి ఈవో విజ్ఞప్తి చేశారు.

మరోవైపు వినాయకగుడి, స్నానాల రేవు నుంచి కనకదుర్గానగర్ వరకూ ఉచితంగా బస్సు సౌకర్యం ఏర్పాటు చేసినట్లు విజయవాడ కనకదుర్గ గుడి ఈవో కేఎస్ రామారావు వెల్లడించారు. దుర్గమ్మ దర్శనానికి వచ్చే భక్తులు ఈ మార్పులను గమనించాలని కోరారు. మరోవైపు విజయవాడ ఘాట్ రోడ్డులో అప్పుడప్పుడూ కొండచరియలు విరిగిపడి ప్రమాదాలు జరుగుతుంటాయి. ఇలాంటి ప్రమాదాలు జరగకుండా నివారించాలనే ఉద్దేశంతోనే అధికారులు కొండరక్షణ చర్యలు చేపడుతున్నారు. మూడు రోజుల పాటు ఈ పనులు జరగనున్నాయి. దీనిని దృష్టిలో ఉంచుకుని ఘాట్ రోడ్డులో రాకపోకలపై ఆంక్షలు విధించారు.

మరోవైపు ఇంద్రకీలాద్రిపై కొలువైన శ్రీదుర్గా మల్లేశ్వరస్వామిని శ్రీ శృంగేరి శారదా పీఠాధిపతి శంకరాచార్య విధుశేఖర భారతి స్వామీజీ దర్శించుకున్నారు. ఆలయానికి వచ్చిన శృంగేరీ పీఠాధిపతికి దుర్గ గుడి ఈవో కేఎస్ రామారావు ఆలయ మర్యాదలతో స్వాగతం పలికారు. అనంతరం స్వామీజీ ప్రత్యేక పూజలు నిర్వహించారు. ఆ తర్వాత మహా మండపంలోని కళా వేదిక వద్ద భక్తులకు స్వామీజీ అనుగ్రహ భాషణం చేశారు. మరోవైపు కార్తీక మాసం సందర్భంగా దుర్గ గుడికి భక్తులు రద్దీ పెరిగింది. తెల్లవారుజాము నుంచే కనకదుర్గమ్మ అమ్మవారిని దర్శించుకుంటున్న భక్తులు మొక్కులు చెల్లించుకుంటున్నారు. భక్తుల కోసం అధికారులు ప్రత్యేక ఏర్పాట్లు కూడా చేశారు.