వీడియోలు చూపి బెదిరించి.. లా స్టూడెంట్‌పై సామూహిక అత్యాచారం..

దేశంలో ఎన్ని చట్టాలు తీసుకువచ్చినా కామాంధుల తీరు మారడం లేదు. మహిళలపై అఘాయత్యాలకు అడ్డుకట్ట పడటం లేదు. నిత్యం ఎక్కడో ఓ చోట.. ఏదో ఓ మూల కామాంధుల చేతిలో అబల బలవుతోంది. అరాచక శక్తుల చేతిలో అన్యాయంగా నలిగిపోతోంది. ధైర్యం చేసి పోలీసులను ఆశ్రయించేది కొందరైతే.. పరువు పేరుతో, మానం పేరుతో లోలోన నలిగిపోతున నిత్యం వేధింపులకు, శారీరక, మానసిక వేదనకు గురవుతున్నది ఎందరో. తాజాగా ఆంధ్రప్రదేశ్‌లో మరో దారుణం జరిగింది. ఓ లా స్టూడెంట్ మీద సామూహిక అత్యాచారం జరిగిన ఘటన విశాఖపట్నంలో ఆలస్యంగా వెలుగులోకి వచ్చింది. నిందితులు అత్యాచారాన్ని వీడియో తీసి బెదిరింపులకు దిగటంతో బాధితురాలు ఏం చేయాలో దిక్కుతోచని పరిస్థితుల్లో ఆత్మహత్యకు యత్నించింది.

స్థానికంగా ఓ లా కాలేజీలో న్యాయ విద్యను అభ్యసిస్తున్న ఓ యువతికి.. తన సహచర విద్యార్థితో పరిచయం ఏర్పడింది. ఆ పరిచయం కాస్తా స్నేహంగా మారింది. అయితే పెళ్లి చేసుకుంటానని ఆమెను నమ్మించిన యువకుడు.. ఈ ఏడాది ఆగస్ట్ 10న కంబాలకొండకు ఆమెను తీసుకెళ్లాడు. అక్కడ ఆమెపై అత్యాచారానికి పాల్పడ్డాడు. అంతటితో ఆగని నిందితుడు.. అదే నెలలో తన స్నేహితుడి ఇంట్లో బాధితురాలిపై మరోసారి అఘాయిత్యానికి పాల్పడ్డాడు. అతని స్నేహితులు ముగ్గురు కూడా ఆమెపై అత్యాచారానికి పాల్పడ్డారు. ఇదంతా వీడియో తీసిన నిందితులు.. దీని ఆధారంగా బెదిరిస్తూ పలుమార్లు అత్యాచారానికి పాల్పడ్డారు. అయితే రోజురోజుకూ ఈ వేధింపులు ఎక్కువ కావటంతో బాధితురాలు భరించలేకపోయింది. ఆత్మహత్యకు యత్నించింది.

అయితే కుటుంబసభ్యులు సకాలంలో గుర్తించడంతో ప్రాణాలతో బయటపడింది. గట్టిగా అడగటంతో.. అసలు విషయం బయటపడింది. దీంతో బాధితురాలి కుటుంబసభ్యులు విశాఖపట్నం టూటౌన్ పోలీస్ స్టేషన్‌లో ఫిర్యాదు చేశారు. దీనిపై కేసు నమోదుచేసిన విశాఖపట్నం టూటౌన్ పోలీసులు.. నిందితులు నలుగురిని అరెస్ట్ చేశారు. రిమాండ్‌కు తరలించారు.

మరోవైపు విశాఖలో లా స్టూడెంట్ అత్యాచారం ఘటనపై ఆంధ్రప్రదేశ్ హోంమంత్రి వంగలపూడి అనిత కూడా స్పందించారు. విశాఖపట్నం పోలీస్ కమిషనర్‌తో మాట్లాడారు. ఈ ఘటనకు సంబంధించి పూర్తి వివరాలు అడిగి తెలుసుకున్నారు. మరోసారి ఇలాంటి ఘటనలు జరగకుండా చర్యలు తీసుకుంటామన్న వంగలపూడి అనిత.. అత్యాచారానికి పాల్పడిన వారిని కఠినంగా శిక్షించాలని పోలీసులను ఆదేశించారు. బాధిత కుటుంబానికి ప్రభుత్వం అండగా ఉంటుందని భరోసా ఇచ్చారు.