అయ్యప్ప భక్తులకు అలర్ట్.. భారీ వర్షాలతో అధికారులు కీలక నిర్ణయం

నైరుతి బంగాళాఖాతంలో ఏర్పడిన ఫెంగల్ తుఫాను ప్రభావంతో కేరళలోనూ శనివారం నుంచి భారీ వర్షాలు కురుస్తున్నాయి. పత్తనంథిట్టా జిల్లాలో ఆదివారం ఉదయం నుంచి ఎడతెరిపిలేకుండా కురిసిన వర్షాలకు శబరిమలలో అయ్యప్ప భక్తులు తీవ్ర ఇబ్బందులు ఎదుర్కొంటున్నారు. పంబా నదిలో ప్రవాహం పెరగడంతో అధికారులు అప్రమత్తమయ్యారు. ప్రమాదాలను నివారించేందుకు చర్యలు చేపట్టారు. పంబా నదిలో నీటి ప్రవాహాన్ని రాష్ట్ర విపత్తు నిర్వహణ విభాగం సైతం పరిశీలిస్తోంది. ఎన్టీఆర్ఎఫ్, ర్యాపిడ్ యాక్షన్ టీమ్, అగ్నిమాపక, పోలీస్ సిబ్బంది అప్రమత్తంగా ఉండాలని, భక్తులను ప్రమాదకర ప్రదేశాలకు వెళ్లకుండా చూడాలని సూచనలు చేశారు. నదులు, అటవీ ప్రాంతాల్లోకి భక్తులను అనుమతించరాదని ఆదేశాలు జారీ అయ్యాయి. ప్రవాహం ఎక్కువగా ఉన్నందున ఘాట్‌లలో స్నానాలకు దిగొద్దని సూచనలు చేశారు. వర్షాలు తగ్గి, నదుల్లో నీటి ప్రవాహం సాధారణ స్థితికి వచ్చే వరకూ ఈ తాత్కాలిక ఆదేశాలు అమల్లో ఉంటాయని పత్తనంథిట్టా కలెక్టర్ ప్రకటించారు.

  ‘‘తీవ్రమైన వర్షాల కారణంగా పర్వత ప్రాంతాలు, అడవులు ముఖ్యంగా ఆకస్మిక వరదలు, కొండచరియలు విరిగిపడటం వంటి ప్రమాదాలు గురవుతాయి. ఈ ప్రాంతాలకు వెళ్లే భక్తులు, సందర్శకులు చాలా జాగ్రత్తగా ఉండాలి’ అని సూచించారు. రిజర్వాయర్ల నుంచి నీటిని విడుదల చేసే అవకాశం ఉందని, ఎట్టి పరిస్థితుల్లోనూ నదులు దాటడం లేదా స్నానాలు చేయడం లేదా ఇతర కార్యకలాపాలు చేయడం నిషేధం అని ఉత్తర్వుల్లో పేర్కొన్నారు. ముక్కుజి-సత్రం అటవీ మార్గం గుండా ప్రయాణాన్ని నిషేధిస్తూ ఇడుక్కి జిల్లా కలెక్టర్ వి విఘ్నేశ్వరి ఉత్తర్వులు జారీ చేశారు. పరిస్థితులు మెరుగుపడే వరకు నిషేధం కొనసాగుతుందని తెలిపారు. ఇందుకు అవసరమైన చర్యలు తీసుకోవాలని పోలీసు, అటవీ శాఖలను ఆదేశించినట్లు ఉత్తర్వుల్లో వెల్లడించారు.

అటు, ఫెంగల్ తుఫాను ప్రభావంతో డిసెంబరు 4 వరకు కేరళలో వర్షాలు పడే అవకాశం ఉందని ఐఎండీ అంచనా వేసింది. కాగా, భారీ వర్షాల నేపథ్యంలో గతవారంతో పోల్చితే అయ్యప్ప దర్శనానికి వచ్చే భక్తుల సంఖ్య ఈవారం తగ్గింది. వర్షం కారణంగా భక్తులకు ఎటువంటి ఇబ్బంది లేకుండా ట్రావెన్‌కోర్ దేవస్థానం బోర్డు ఏర్పాట్లు చేసింది. అప్పాచిమేడు, నీలమలతో సహా మరకొట్టం నుంచి శరంగుత్తి వరకూ ఉన్న క్యూలైన్‌లో ఉండేవారు వర్షంలో తడవకుండా చర్యలు తీసుకున్నారు. అయితే, దర్శనం అనంతరం పంబకు చేరుకునే భక్తులు మాత్రం తీవ్ర ఇబ్బంది పడుతున్నారు.