బీచ్‌లో హీరోయిన్ యోగా.. భారీ కెరటానికి గల్లంతు

ప్రశాంతత కోసం యోగా, ధ్యానం చేసేందుకు సముద్రం వద్దకు వెళ్లిన ఓ యువ హీరోయిన్.. అదే సముద్రంలో పడి గల్లంతైన విషాద ఘటన థాయిలాండ్‌లో చోటు చేసుకుంది. రష్యాకు చెందిన 24 ఏళ్ల నటి కెమిల్లా బెల్యాట్స్కాయ.. థాయిలాండ్ పర్యటనలో ఉంది. ఈ నేపథ్యంలోనే తాజాగా ఓ ద్వీపంలో నీటి ఒడ్డున రాళ్లపై కూర్చొని ధ్యానం చేస్తుండగా ఊహించని పరిణామం ఎదురైంది. సముద్రంలో ఏర్పడిన ఓ భారీ కెరటం.. దూసుకొచ్చి ఆమెను లాక్కెళ్లిపోయింది. ఆ బీచ్‌లో అందరూ చూస్తుండగానే.. కొద్దిసేపటికి ఆమె శవం ఒడ్డుకు కొట్టుకువచ్చింది. ఈ ఘోర విషాదానికి సంబంధించిన వీడియో ఇప్పుడు వైరల్ అవుతోంది.

24 ఏళ్ల రష్యన్ నటి కెమిల్లా బెల్యాట్స్కాయ.. థాయిలాండ్‌లోని కోహ్ సుముయ్ ద్వీపంలో ఉన్న రాళ్లపై కూర్చుని ధ్యానం, యోగా చేస్తోంది. ప్రశాంతంగా ఆమె ధ్యానంలో మునిగిపోగా.. ఉన్నట్టుండి ఒక్కసారిగా సముద్రంలో భారీ కెరటం ఏర్పడింది. దీంతో రాళ్లపై కెమిల్లా కూర్చున్న చోటుకే వచ్చిన రాకాసి అలలు.. ఆమెను సముద్రంలోకి లాక్కెళ్లిపోయాయి. అక్కడే ఉన్న కొందరు.. ఆమెను పరిశీలిస్తూ సెల్‌ఫోన్‌లో వీడియోలు తీశారు. ఇక ఒకరు ఆమెను రక్షించేందుకు కూడా ప్రయత్నించినా.. ప్రయోజనం లేకపోయింది. ఇక కొద్దిసేపటికి ఆమె శవం ఒడ్డుకు కొట్టుకువచ్చినట్లు ఆ వైరల్ వీడియోల్లో కనిపిస్తోంది.

ఈ నేపథ్యంలోనే తన థాయిలాండ్ పర్యటనకు సంబంధించిన ఫోటోలు, వీడియోలను.. ఆ ఘటనకు ముందు.. కెమిల్లా సోషల్ మీడియాలో షేర్ చేసింది. ఈ సందర్భంగా ధ్యానం కోసం ఆమె తీసుకెళ్లిన వస్తువులు ఆ సముద్రంలో తేలియాడుతున్న వీడియోలు కూడా కనిపించాయి. ఆమె అలల్లో కొట్టుకుపోతుండగా ప్రాణాలను కాపాడుకునేందుకు విశ్వ ప్రయత్నాలు చేసింది. కానీ చివరికి అందులోనే గల్లంతైంది. ధ్యానం చేస్తున్న రాయి నుంచి 3 నుంచి 4 కిలోమీటర్ల దూరంలో ఉన్న ప్రదేశంలో కెమిల్లా మృతదేహాన్ని పోలీసులు స్వాధీనం చేసుకున్నారు. అయితే తన బాయ్‌ఫ్రెండ్‌తో కలిసి థాయ్‌లాండ్‌కు విహారయాత్రకు వెళ్లిందని.. అంతకుముందు కూడా అదే ప్రాంతంలో ధ్యానం చేసినట్లు పోలీసులు వెల్లడించారు.

 ఇక థాయ్‌లాండ్‌లో ప్రస్తుతం భారీ వర్షాలు పడుతున్నాయి. ద్వీపం వద్దకు వెళ్లొద్దని.. పరిస్థితి ఆందోళనకరంగా ఉందని అధికారులు హెచ్చరించినట్లు తెలుస్తోంది. అయితే అధికారుల హెచ్చరికలను పట్టించుకోకుండా.. పర్యాటకులు మాత్రం సముద్రంలోకి, ద్వీపం వద్దకు వెళ్లినట్లు సమాచారం. ఇక తనకు ఆ కోహ్ సుముయ్ ద్వీపం అంటే చాలా ఇష్టమని కెమిల్లా బెల్యాట్స్కాయ‌ తన సోషల్ మీడియా పోస్టులో వెల్లడించింది.