శివాలెత్తిన శివమ్ దూబె.. బీసీసీఐ టోర్నీలో సిక్సర్ల వర్షం

బిగ్ హిట్టర్ శివమ్ దూబే.. బ్యాట్‌తో రెచ్చిపోయాడు. సయ్యద్ ముస్తాక్ అలీ ట్రోఫీలో భాగంగా ముంబై, సర్వీసెస్ మధ్య జరిగిన మ్యాచ్‌లో సిక్సర్ల వర్షం కురిపించాడు. తనను అందరూ సిక్స్ హిట్టర్ అని ఎందుకంటారో మరోసారి నిరూపించాడు. గాయం నుంచి కోలుకున్న ఈ ఆల్‌రౌండర్‌.. బీసీసీఐ ఆధ్వర్యంలో నిర్వహిస్తున్న సయ్యద్‌ ముస్తాక్‌ అలీ ట్రోఫీలో ముంబై తరఫున బరిలోకి దిగాడు. సర్వీసెస్‌తో మ్యాచ్‌లో 36 బంతుల్లోనే 71 పరుగులు చేసి నాటౌట్‌గా నిలిచాడు.

మరో ఎండ్‌లో ‘మిస్టర్‌ 360’ సూర్యకుమార్ యాదవ్ ఉన్నప్పటికీ.. అతడి కంటే వేగంగా బ్యాటింగ్ చేశాడు శివమ్ దూబూ. సుమారు 200 స్ట్రైక్‌ రేటుతో పరుగులు చేశాడు. ఈ ఇన్నింగ్స్‌లో దూబె.. ఫోర్ల కంటే సిక్స్‌లే ఎక్కువగా కొట్టడం విశేషం. 7 సిక్స్‌లు బాదిన ఈ లెఫ్ట్ హ్యాండర్.. 2 ఫోర్లు కూడా కొట్టాడు.

ఈ మ్యాచ్‌లో తొలుత బ్యాటింగ్ చేసిన ముంబైకి శుభారంభం దక్కలేదు. ఇటీవల పేలవ ఫామ్‌తో విమర్శలు ఎదుర్కొంటున్న పృథ్వి షా.. మరోసారి విఫలమయ్యాడు. 3 బంతులు ఎదుర్కొని డకౌట్‌ అయ్యాడు. అజింక్య రహానె (22), కెప్టెన్ శ్రేయస్ అయ్యర్ (20) కూడా విఫలమయ్యారు. దీంతో ముంబై ఇన్నింగ్స్‌ను చక్కదిద్దే బాధ్యతలు తీసుకున్న శివమ్ దూబె, సూర్యకుమార్ నాలుగో వికెట్‌కు 66 బంతుల్లో 130 పరుగుల భాగస్వామ్యం నెలకొల్పారు. సూర్యకుమార్‌ 46 బంతుల్లో 70 పరుగులు చేశాడు. దీంతో ముంబై జట్టు నిర్ణీత 20 ఓవర్లలో 4 వికెట్ల నష్టానికి 192 పరుగులు చేసింది.

అనంతరం భారీ లక్ష్యంతో బరిలోకి దిగిన సర్వీసెస్ 19.3 ఓవర్లలో 153 పరుగులకు ఆలౌటైంది. కెప్టెన్ మోహిత్ (54) ఒంటరి పోరాటం వృథా అయ్యింది. ఇక ఐపీఎల్ మెగా వేలంలో అన్‌సోల్డ్‌గా మిగిలి, గత మ్యాచ్‌లో భారీగా పరుగులు సమర్పించుకున్న శార్దుల్ ఠాకూర్‌.. ఈ మ్యాచ్‌లో సత్తా చాటాడు. ఏకంగా 4 వికెట్లు తీశాడు. దీంతో ముంబై జట్టు 39 పరుగుల తేడాతో విజయం సాధించింది.

ఐపీఎల్‌‌లో చెన్నై సూపర్‌ కింగ్స్ జట్టు తరఫున ఆడుతున్నప్పటి నుంచి శివమ్‌ దూబె ఆటతీరు పూర్తిగా మారిపోయింది. అప్పటికవరకూ పెద్దగా చెప్పుకోదగ్గ ఇన్నింగ్స్‌లో ఆడని దూబె.. ధోనీ సారథ్యంలోని సీఎస్కేలో మాత్రం మెరుపులు మెరిపించాడు. సిక్సర్లతో ప్రత్యర్థి బౌలర్లకు గుబులు పుట్టించాడు. ఈ క్రమంలోనే టీ20 ప్రపంచకప్‌ 2024 కోసం భారత జట్టులో చోటు సంపాదించాడు. భారత జట్టు విజేతగా నిలవడంలో తన వంతు పాత్ర పోషించాడు. ఈ క్రమంలోనే ఐపీఎల్‌ 2025 మెగా వేలానికి ముందు సీఎస్కే జట్టు దూబెను రూ. 12 కోట్లకు రిటైన్ చేసుకుంది.