దోస్త్ మేరా దోస్త్.. సచిన్, వినోద్ కాంబ్లీ కలిసిన వేళ

టీమిండియా మాజీ క్రికెటర్ వినోద్ కాంబ్లీ, భారత క్రికెట్ దిగ్గజం, తన చిన్ననాటి స్నేహితుడు సచిన్ టెండూల్కర్‌ను కలిశారు. వారిద్దరి గురువూ అయిన ప్రముఖ కోచ్ దివంగత రమాకాంత్ అచ్రేకర్ జయంతి వీరిద్దరూ కలుసుకునేందుకు కారణమైంది. ముంబైలోని ఛత్రపతి శివాజీ మహారాజ్ పార్క్‌లో అచ్రేకర్ మెమోరియల్‌ను ఆవిష్కరించారు. ఈ వేడుకకు కాంబ్లీ, సచిన్‌తో పాటు పలువురు హాజరయ్యారు.

అయితే కొంతకాలం నుంచి కాంబ్లీ తీవ్ర అనారోగ్యానికి గురైన విషయం తెలిసిందే. ఒకరి సపోర్ట్ లేకుండా కాంబ్లీ సొంతంగా నడవలేకపోతున్నాడు. ఆయన నడిచేందుకు ఇబ్బంది పడ్డట్లు చూపే వీడియోలు ఇటీవల వైరల్‌గా మారాయి. ఈ నేపథ్యంలో తాను అనారోగ్యానికి గురైన తర్వాత తొలిసారి కాంబ్లీ.. బహిరంగంగా సచిన్ కలిశాడు. సచిన్ కంటే ముందే కాంబ్లీ వేదికపైకి చేరుకున్నాడు. ఆ తర్వాత స్టేజ్ పైకి వచ్చిన సచిన్.. తన చిన్ననాటి స్నేహితుడు కూడా అక్కడే ఉన్నట్లు గమనించాడు. వెంటనే అతడివైపు వెళ్లాడు. సచిన్‌ను చూసిన కాంబ్లీ.. ఒక్కసారిగా భావోద్వేగానికి గురయ్యాడు. సచిన్ చేయిని వదలకుండా గట్టిగా పట్టుకున్నాడు. ఎంతకీ వదలకపోవడంతో పక్కనున్న వ్యక్తి.. సచిన్ చేయిని విడపించాడు. ఇందుకు సంబంధించిన వీడియో సోషల్ మీడియాలో వైరల్‌గా మారింది.

1990ల్లో అంతర్జాతీయ క్రికెట్‌లో ఓ వెలుగు వెలిగిన కాంబ్లీ మేటి ఆటగాడిగా గుర్తింపు పొందాడు. బ్యాటింగ్‌తో అద్భుతాలు చేశాడు. సచిన్ టెండూల్కర్ కంటే ప్రతిభావంతమైన ఆటగాడిగా గుర్తింపు పొందిన కాంబ్లీ కెరీర్.. ఆ తర్వాత గాడి తప్పంది. మద్యానికి బానిసవ్వడం వల్లే కాంబ్లీ పతనమయ్యాడని క్రీడా విశ్లేషకులు చెబుతారు. 2012లో వినోద్ కాంబ్లీ ఆరోగ్యం బాగా క్షీణించింది. 2013లో గుండెపోటుకు గురికాగా.. వైద్యులు సర్జరీ చేశారు. యాంజియోప్లాస్టీ తర్వాత కోలుకున్నప్పటికీ.. ఆ తర్వాత ఇతర ఆరోగ్య సమస్యలు ఎదుర్కొన్నారు.

సచిన్‌ టెండూల్కర్, వినోద్ కాంబ్లీలు చిన్నప్పటి నుంచి క్లోజ్ ఫ్రెండ్స్. 1988లో స్కూల్ స్థాయి క్రికెట్‌లో సచిన్-కాంబ్లీ జోడీ ప్రభంజనం సృష్టించింది. హారిస్‌ షీల్డ్‌ సెమీఫైనల్‌ మ్యాచ్‌లో వీరిద్దరూ కలిసి 664 పరుగుల రికార్డు భాగస్వామ్యం నిర్మించారు. ఇద్దరూ ట్రిబుల్ సెంచరీలతో నాటౌట్‌గా నిలిచారు. కాంబ్లీ 349 పరుగులు చేస్తే, సచిన్ 326 రన్స్ స్కోరు చేశాడు.

భారత్ తరపున వినోద్ కాంబ్లీ 17 టెస్టులు, 104 వన్డేలు ఆడాడు. 6 సెంచరీలతో వరుసగా 1084, 2477 రన్స్ స్కోరు చేశాడు. కాంబ్లీ చివరిసారిగా 2000లో భారత్ తరఫున ఆడారు. 2011లో అన్ని రకాల క్రికెట్‌ నుంచి రిటైరయ్యారు. తనతో పాటే క్రికెట్‌లో అడుగుపెట్టిన సచిన్.. భారత క్రికెట్ దిగ్గజంగా మారిపోతే.. కాంబ్లీ మాత్రం వచ్చిన అవకాశాలను సద్వినియోగం చేసుకోలేక ఒక్కో మెట్టు పతనమయ్యాడు.