బుమ్రా పేరు చెబితేనే వణికిపోతున్న ఆస్ట్రేలియా బ్యాటర్లు

బోర్డర్ గవాస్కర్ ట్రోఫీ తొలి టెస్టులో 9/72తో ఆకట్టుకున్న టీమిండియా పేసర్ జస్‌ప్రీత్ బుమ్రా.. ఆస్ట్రేలియా బౌలర్లను భయపెడుతున్నాడు. ముఖ్యంగా ఈనె 6 నుంచి ఆడిలైడ్ వేదికగా జరిగే రెండో టెస్టులో పింక్ బాల్‌తో అతడు మరింత మెరుగైన ప్రదర్శన చేస్తాడనే అంచనాలు ఉన్నాయి. అతడిని ఎదుర్కోవడం ఆస్ట్రేలియా బ్యాటర్లకు కష్టమే అని విశ్లేషణలు వినిపిస్తున్నాయి. ఈ నేపథ్యంలో సోషల్ మీడియాలో జరుగుతున్న ప్రచారంపై ఆసీస్ బ్యాటర్, వికెట్ కీపర్ అలెక్స్ కేరీ మాట్లాడాడు. జస్‌ప్రీత్ బుమ్రాను ఎలా ఎదుర్కోవాలో.. తమ జట్టులోని ప్రపంచ స్థాయి బౌలర్లకు తెలుసని వ్యాఖ్యానించాడు.

"జస్‌ప్రీత్ బుమ్రా అద్భుతమైన పేసర్. అందులో అనుమానం లేదు. అతడు కొన్నేళ్లుగా నిలకడగా బౌలింగ్ చేస్తున్నాడు. కానీ మా జట్టులో ప్రపంచ స్థాయి బ్యాటర్లు ఉన్నారు. ఎలాంటి సమస్యలకైనా వారు పరిష్కారాలు కనుగొంటారు. రెండో టెస్టుకు కూడా వారు అదే విధంగా సన్నద్ధమై వస్తారు. ముఖ్యంగా కొత్త బంతితో అతడు ప్రమాదకరం. తొలి రెండు స్పెల్స్‌లో అతడిని జాగ్రత్తగా ఎదుర్కోవాలి. బుమ్రా పాత బంతితో బౌలింగ్ చేసే వరకు ఎదురుచూడాలి. ఏది ఏమైనా బుమ్రాతో పాటు భారత బౌలర్లన సమర్థవంతంగా ఎదుర్కొనేందుకు మా బ్యాటర్లు ఇప్పటికే పరిష్కారాలను కనుగొన్నారని అనుకుంటున్నా" అని అలెక్స్ కేరీ చెప్పాడు.

కాగా ఆస్ట్రేలియా డ్రెస్సింగ్ రూమ్‌లో విబేధాలు తలెత్తాయనే వార్తలను కేరీ ఖండించాడు. కొన్ని సార్లు సరైన ప్రదర్శన చేయలేకపోతామని.. కానీ మేమంతా కలిసి కట్టుగా ఉన్నామని చెప్పుకొచ్చాడు. తాము ఓడిపోయింది కేవలం ఒక్కటెస్టు మాత్రమే అని.. ఇంకా నాలుగు మ్యాచ్‌లు మిగిలి ఉన్నాయని వ్యాఖ్యానించాడు. తమ స్ట్రైల్‌లో తాము ఆడితే.. విజయాలు దానంతట అవే వస్తాయని పేర్కొన్నాడు.

కాగా రోహిత్ శర్మ గైర్హాజరీలో తొలి టెస్టులో భారత జట్టును నడిపించిన బుమ్రా.. ఆటగాడిగా, సారథిగా సూపర్ హిట్ అయ్యాడు. ఈ మ్యాచులో 9 వికెట్లు తీసి ప్లేయర్ ఆఫ్ ది మ్యాచ్‌గా ఎంపికయ్యాడు. సొంతగడ్డపై కివీస్ చేతిలో 0-3తో సిరీస్ ఓడినప్పటికీ.. పెర్త్ టెస్టులో జట్టును ముందుండి నడిపించి విజయాన్ని అందించాడు. దీంతో ఆడిలైడ్ టెస్టులో అతడు ఎలాంటి ప్రదర్శన చేస్తాడనేది ఆసక్తికరంగా మారింది. డిసెంబర్ 6 నుంచి రెండో టెస్టు ప్రారంభం కానుంది. ఇది డే నైట్ టెస్టు.