సరికొత్త ఐడియాతో వేల కోట్లు ఆర్జన.. అమెరికాలో సంచలనం

 ప్రతి సమస్యకూ ఏదో ఒక పరిష్కారం ఉంటుంది. ఇందులో నుంచే అవకాశాల్ని కూడా సృష్టించుకోవాలి. చాలా మంది విజయవంతమైన వ్యాపారులు కూడా ఇదే సూత్రాన్ని పాటించి జీవితంలో గొప్ప స్థాయికి చేరుతుంటారు. అంకుర్ జైన్.. ఈ భారత సంతతి టెక్ బిలియనీర్‌కు కూడా ఇది సరిగ్గా సరిపోతుంది. రెంటల్ పేమెంట్స్‌తో రివార్డ్స్ తీసుకొచ్చి.. అప్పటివరకు నిశ్శబ్దంగా ఉన్న యూఎస్ రెంటల్ మార్కెట్లో సంచలనం సృష్టించారు. ఇదొక గేమ్ ఛేంజర్‌గా అవతరించింది. వార్టన్ స్కూల్ ఆఫ్ బిజినెస్ గ్రాడ్యుయేట్ అయిన జైన్ సరికొత్తగా ఆలోచించాడు. అవకాశాల్ని అందిపుచ్చుకొని.. మెదడుకు పదునుపెట్టి.. కొత్త ఆలోచనను ఆచరణలో పెట్టాడు. దీనితో ఇది అమెరికాలో లీజుకు లేదా అద్దెకు తీసుకున్న ప్రజలకు ఎంతో మేలు చేసింది. ఇది రెంట్ పేమెంట్స్‌పై విలువైన పాయింట్లు అందించడం ద్వారా ఖర్చుల్ని తగ్గించింది.

ఎక్కువగా జనం తమ సంపాదనలో కనీసం 30 శాతం వరకు అద్దె కోసం చెల్లిస్తున్నట్లు తెలుస్తోంది. ఇక్కడ ఖర్చులే తప్ప ఎలాంటి ప్రయోజనం ఉండదు. ఇక్కడే జైన్ ఒక అవకాశాన్ని వెతుక్కున్నాడు. బిల్ట్ రివార్డ్స్ అనే ఒక కంపెనీ ప్రారంభించాడు. ఇది అమెరికా రెంటల్ మార్కెట్ తలరాతే మార్చేసింది. అతడి జీవితాన్ని కూడా మార్చేసింది. ఎలాంటి అదనపు ఛార్జీలు లేకుండా అద్దె దారులు తమ రెంట్ చెల్లించేందుకు వీలుగా ఒక క్రెడిట్ కార్డును తీసుకొచ్చాడు. ఆరోజుల్లో అసాధ్యం అనుకున్నదాన్ని సుసాధ్యం చేశాడని చెప్పొచ్చు.

బిల్ట్ రివార్డ్స్‌తో.. అమెరికాలోని ప్రాపర్టీ మేనేజర్లను లింక్ చేశాడు. అందరినీ ఒకే వేదిక మీదకు తీసుకొచ్చాడు. BILT లో వారిని చేరమని.. ఇంకా అద్దెదారులు ఎప్పటికీ విడిచిపెట్టరని వారికి వాగ్దానం చేశాడు. ఇది కొంత కాలంలోనే సక్సెస్ అయింది. అమెరికాలో ఇప్పుడు దాదాపు 25 లక్షల వరకు రెంటల్ యూనిట్స్‌ను ఇది కవర్ చేస్తుంది. ఈ బిల్డ్ రివార్డ్స్ ద్వారా.. టెనెంట్స్ తాము చేసే పేమెంట్లపై రివార్డ్ పాయింట్స్ గెల్చుకుంటారు. ట్రావెల్, డైనింగ్ ఇతర ట్రాన్సాక్షన్లపైనా పాయింట్స్ గెల్చుకుంటారు.

ఈ బిల్డ్ రివార్డ్స్ అనేది అమెరికా కేంద్రంగా పనిచేసే హోమ్ రెంటల్ రివార్డ్స్ స్టార్టప్. 2024 జనవరిలో బిల్ట్ రివార్డ్స్ దాదాపు 200 మిలియన్ డాలర్ల వరకు నిధుల్ని సమీకరించింది. దీంతో ఫోర్బ్స్ రిపోర్ట్ ప్రకారం స్టార్టప్ విలువ 3.1 బిలియన్ డాలర్లకు చేరింది. ఇది భారత కరెన్సీలో దాదాపు రూ. 26,248 కోట్లుగా ఉంది. రెంట్ పేమెంట్లను ఈ బిల్ట్ రివార్డ్స్ మరింత సులభతరం చేస్తుంది. ఇంకా ఎయిర్‌లైన్స్, హోటల్స్, జిమ్స్, రెస్టారెంట్లు వంటి వాటి చోట్ల రివార్డ్ పాయింట్లు గెల్చుకోవడంతో పాటుగా రిడీమ్ చేసుకోవచ్చు. జైన్‌కు ఈ స్టార్టప్‌లో దాదాపు 36 శాతం వాటా ఉందని తెలుస్తోంది. తన కెరీర్ మొత్తంలో జైన్ ఎన్నో అవార్డులు దక్కించుకున్నారు. ఎన్నో ఘనతల్ని సాధించారు. ప్రస్తుతం 34 ఏళ్ల వయసులో ఉండగా.. ఇప్పటికే యంగెస్ట్ బిలియనీర్లలో ఒకడిగా ఉన్నాడు.

ఇక ఫోర్బ్స్ రిపోర్ట్ ప్రకారం.. జైన్ సంపద దాదాపు 1.2 బిలియన్ డాలర్లుగా ఉంది. భారత కరెన్సీలో చూస్తే ఇది దాదాపు రూ. 10 వేల కోట్లకుపైనే ఉంటుంది. అంకుర్ జైన్ తండ్రి.. నవీన్ జైన్ మైక్రోసాఫ్ట్ మాజీ ఎగ్జిక్యూటివ్. ఇక అంకుర్ జైన్.. ఈ ఏడాది ఏప్రిల్‌లో డబ్ల్యూడబ్ల్యూఈ మాజీ రెజ్లర్, తన ప్రేయసి ఎరికా హమ్మండ్‌ను వివాహం చేసుకొని వార్తల్లోకి ఎక్కారు. ఈజిప్ట్ గ్రేట్ పిరమిడ్స్ ఎదురుగా వీరు వివాహం చేసుకున్నారు.