ఆపరేషన్ చేసి కడుపులో దూది మరిచారు.. డాక్టర్ల నిర్లక్ష్యం, మహిళ మృతి

ఈమధ్య కాలంలో వైద్యుల నిర్లక్ష్యం కారణంగా అనేక మంది ప్రజలు ప్రాణాలు పోగొట్టుకుంటున్నారు. దేశ వ్యాప్తంగా ఇలాంటి కేసులు చాలానే నమోదు అవుతున్నాయి. గతంలో దూది, సూది, దారం, కత్తెర వంటివి రోగుల కడుపుల్లో మర్చిపోయిన వార్తలు మనం చాలానే చూశాం. అయితే తాజాగా ఇలాంటి ఘటనే పునరావృతం అయింది. విపరీతమైన కడుపు నొప్పి, తీవ్ర రక్తస్రావంతో ఓ మహిళ ఆస్పత్రికి వెళ్తే అక్కడి వైద్యులు ఆపరేషన్ చేసి గర్భసంచి తీసేశారు. ఇక కడుపు నొప్పి పూర్తిగా తగ్గిపోతుందని చెప్పి ఇంటికి పంపించారు.

కానీ ఎన్ని రోజులు గడుస్తున్నా కడుపు నొప్పి మాత్రం తగ్గలేదు. మరింత ఎక్కువైంది. దీంతో మరో ఆస్పత్రికి వెళ్లగా.. ఆ మహిళ కడుపులో దూది ఉందని అందుకే నొప్పి వస్తుందని చెప్పారు. అయితే ఆపరేషన్ చేసిన వైద్యుల నిర్లక్ష్యం వల్లే ఇది జరిగిందని తెలిపారు. కానీ అంత నిర్లక్ష్యం వహించిన వాళ్ల దగ్గర చూపించడం సరికాదని మరో ఆస్పత్రిలోనే చూపించాడు భర్త. ఇలా భార్య కడుపులోంచి దూది తీసేయించేందుకు వరుసగా రెండు ఆపరేషన్లు చేయించాడు. కానీ అప్పటికే ఇన్ఫెక్షన్ కడుపు మొత్తం వ్యాపించడంతో ఆ మహిళ మృతి చెందింది. ఈ విషాధకర ఘటన ఉత్తర ప్రదేశ్‌లోని ఫిలిబిత్‌లో జరిగింది.

మిశ్రయిన్ గౌటియా గ్రామానికి చెందిన ఖీలావతి శంకర్ కు 34 ఏళ్ల వయసు. అయితే కొన్ని నెలల కిందట ఆమెకు అధిక రక్తస్రావం అయింది. అలాగే విపరీతమైన కడుపు నొప్పి కూడా వచ్చింది. దీంతో భయపడిన ఆమె భర్త ఉమా శంకర్‌కు విషయం చెప్పగా ఆయన వెంటనే దేవిపూరా గ్రామంలోని ఓ ప్రైవేటు ఆస్పత్రికి తీసుకువెళ్లాడు. జిల్లా మహిళా ఆసుపత్రిలో సీనియర్ రెసిడెంట్ డాక్టర్‌గా పని చేస్తున్న డాక్టర్ ఆశా గంగ్వార్‌యే ఆ ప్రైవేటు ఆస్పత్రిని నడుపుతున్నారు. అయితే మహిళ పరిస్థితి చూసిన ఆయన వెంటనే గర్భసంచి తొలగించాలని అప్పుడే ఆమెను బతికించుకోగలమంటూ ఆపరేషన్ చేశాడు.

గర్భసంచి తొలగించిన తర్వాత కూడా ఆమెకు కడుపు నొప్పి కాస్త ఎక్కువగా ఉండడంతో 7వ తేదీ నుంచి జూలై 23వ తేదీ వరకు ఆసుపత్రిలోనే ఉంచుకున్నాడు. ఆ తర్వాత డిశ్చార్జ్ చేశాడు. ఇంటికెళ్లాక కూడా మహిళకు కడుపు నొప్పి తగ్గలేదు. 5 నెలల పాటు నొప్పితో ఆమె విలవిల్లాడుతూనే ఉంది. కానీ ఆపరేషన్ చేయించుకున్న వారందరికీ అలాగే నొస్తుందని భావించిన మహిళ మళ్లీ ఆస్పత్రికి వెళ్లలేదు. కానీ రోజురోజుకూ పరిస్థితి విషమించడంతో భర్తకు చెప్పగా ఆయన.. డిసెంబర్ 1వ తేదీన బరేలీలోని మరో ప్రైవేటు ఆస్పత్రికి తీసుకువెళ్లాడు.

అక్కడే ఖీలావతికి స్కానింగ్ చేసిన వైద్యులు మహిళ కడుపులో దూది ఉన్నట్లు గగుర్తించారు. వెంటనే దాన్ని తొలగించాలని లేకపోతే ఆమె ప్రాణానికే ప్రమాదం అని చెప్పారు. అలా అదే రోజు సర్జరీ చేశారు. అయితే కడుపులో ఇన్ఫెక్షన్ రావడంతో మరోసారి ఆపరేషన్ చేయాలని చెప్పారు. అలా రెండోసారి డిసెంబర్ 5వ తేదీన శస్త్ర చికిత్స చేశారు. కానీ అప్పటికే కడుపు అంతా ఇన్ఫెక్షన్ వ్యాప్తి చెందడంతో సర్జరీ చేస్తుండగానే మహిళ మృతి చెందింది.

అప్పటి వరకు నిర్లక్ష్యంగా వ్యవహరించిన వైద్యుల వద్దకు వెళ్లని మహిళ భర్త.. భార్య చనిపోగానే వెళ్లి గొడవ చేశాడు. ఆయతో పాటు బంధువులు, కుటుంబ సభ్యులు వెళ్లి ధర్నా చేయగా.. ఘటన వెలుగులోకి వచ్చింది. ఫిలిబిత్ జిల్లా మేజిస్ట్రేట్ సంజయ్ కుమార్ సింగ్ వరకూ ఈ విషయం వెళ్లగా.. ఆయన సోమవారం రోజు చీఫ్ మెడికల్ ఆఫీసర్ డాక్టర్ అలోక్ కుమార్‌కు.. ఈ ఘటనపై దర్యాప్తు నిర్వహించాలని ఆదేశాలు జారీ చేశారు.