ఏటీఎంల నుంచే పీఎఫ్ డబ్బులు విత్‌డ్రా.. కేంద్రం కీలక ప్రకటన

ఈపీఎఫ్ఓ చందాదారులకు కేంద్రం అదిరిపోయే శుభవార్త చెప్పింది. పీఎఫ్ అకౌంట్ కింద డబ్బులు విత్‌డ్రాపై కీలక ప్రకటన చేసింది. వచ్చే ఏడాది నుంచి ఉద్యోగులు.. తమ ప్రావిడెంట్ ఫండ్ అకౌంట్ నుంచి డబ్బుల్ని.. నేరుగా ఏటీఎంల ద్వారానే విత్‌డ్రా చేసుకునేందుకు అవకాశం ఉంటుందని కేంద్ర కార్మిక శాఖ స్పష్టం చేసింది. దేశంలో పెద్ద సంఖ్యలో ఉన్న కార్మికుల కోసం వారికి మరింత మెరుగైన సేవల్ని అందించేందుకు.. సర్వీసుల్ని విస్తరించేందుకు కేంద్ర కార్మిక శాఖ తమ ఐటీ వ్యవస్థల్ని అప్‌గ్రేడ్ చేస్తుందని వివరించింది. ఈ క్రమంలోనే ఈపీఎఫ్ డబ్బుల విత్‌డ్రాపైనా స్పందించారు కేంద్ర కార్మిక శాఖ కార్యదర్శి సుమితా దవ్రా. ఇప్పటికే పీఎఫ్ క్లెయిమ్స్ పరిష్కారం కోసం ఈ ప్రక్రియను వేగవంతం చేసే ప్రయత్నం చేస్తున్నట్లు వివరించారు.

'మేం ఇప్పటికే క్లెయిమ్స్‌ను చాలా వేగంగా సెటిల్ చేస్తున్నాం. ఇంకా జీవన సౌలభ్యాన్ని మరింత మెరుగుపర్చేందుకు ఈ ప్రక్రియను మరింత సులభతరం చేసేందుకు కృషి చేస్తాం. క్లెయిమ్ దారుడు, లబ్ధిదారుడు, ఇన్సూరెన్స్ ఉన్న వ్యక్తి.. ఇలా ఎవరైనా ఏటీఎంల ద్వారానే తమ క్లెయిమ్స్ యాక్సెస్ చేస్కొని.. డబ్బుల్ని తీసుకోవచ్చు. ఇక్కడ పెద్దగా మానవ ప్రమేయం లేకుండానే జరుగుతుంది.' అని సుమితా చెప్పారు.

 వ్యవస్థలు అభివృద్ధి చెందుతున్నాయని.. ఇక ప్రతి 2,3 నెలలకు ఓసారి మీరు గణనీయ మార్పుల్ని గమనిస్తారని ఆమె వివరించారు. ఇక జనవరి 2025 నాటికి ఇంకా మెరుగైన వ్యవస్థను చూస్తారని భావిస్తున్నట్లు అన్నారు సుమితా. ప్రస్తుతం ఎంప్లాయీస్ ప్రావిడెంట్ ఫండ్ ఆర్గనైజేషన్‌కు 70 మిలియన్లకుపైగా (7 కోట్లు) యాక్టివ్ కాంట్రిబ్యూటర్స్ ఉన్నారు. కొద్ది రోజుల ముందు నుంచే.. ఈపీఎఫ్ఓ 3.0 అప్‌డేట్ కోసం కేంద్ర ప్రభుత్వం కృషి చేస్తోందని వార్తలు వస్తున్నాయి. దీని కింద ముందుగా ఏటీఎంల నుంచి పీఎఫ్ విత్‌డ్రా అనే అంశం ప్రధానంగా పరిశీలనలో ఉంది. ఇందుకోసం.. చందాదారులకు ఏటీఎం కార్డు అందిస్తారని తెలుస్తోంది. అయితే.. విత్‌డ్రా క్లెయిమ్ ఎలా.. ఎంత మొత్తం ఏయే అవసరాలకు తీసుకోవచ్చు అనే దానిపై క్లారిటీ రావాల్సి ఉంది. ఇంకా.. ఈపీఎఫ్ అకౌంట్‌కు పీఎఫ్ కాంట్రిబ్యూషన్ లిమిట్ తొలగించే దానిపైనా చర్చలు జరుగుతున్నట్లు తెలుస్తోంది. అప్పుడు.. చందాదారుడు.. తనకు తోచిన మొత్తం పీఎఫ్ అకౌంట్లోకి జమ చేసే విధంగా మార్పులు చేయనున్నట్లు సమాచారం. ఇంకా.. చాలా గణనీయ మార్పులు జరగొచ్చనే అభిప్రాయాలు వ్యక్తమవుతున్నాయి. వీటన్నింటిపై కేంద్రం స్పష్టత ఇవ్వలేదు. మరి ఏం తెలియాలన్నా.. జనవరి తర్వాతే తెలిసే అవకాశం ఉంది.