హిందూ ఆలయానికి ముస్లిం భక్తుడి గిప్ట్.. 600 వజ్రాల కిరీటం, 8 ఏళ్లుగా తయారీ

కొందరు భక్తులు.. తాము బాగా విశ్వసించే దేవుడికి భారీగా కానుకలు, ఆభరణాలు, డబ్బులు అందిస్తూ ఉంటారు. తాము కోరుకున్న కోరికలు నెరవేరితే మరిన్ని కానుకలు ఇస్తామని మొక్కుతారు. ఆ కోరికలు నెరవేరితే ఆ మొక్కులను చెల్లించుకుంటారు. అయితే కొందరు తమ మతం కాకపోయినా.. ఇతర మతాలకు చెందిన దేవుళ్లను కూడా ఎంతో భక్తితో ఆరాధిస్తూ ఉంటారు. ఇలా వారు నమ్మిన దేవుడికి మొక్కులు చెల్లించుకునేందుకు రకరకాల బహుమతులను అందిస్తూ ఉంటారు. తాజాగా ఓ ముస్లిం వ్యక్తి.. హిందూ ఆలయానికి భారీ విలువ గల బహుమతిని అందించారు. వందలాది వజ్రాలతో స్పెషల్‌గా తయారు చేసిన కిరీటాన్ని గిఫ్ట్‌గా ఇచ్చారు. ఈ సందర్భంగా ఆయన తనలో ఉన్న మత సామరస్యాన్ని చాటుకున్నారు.

తమిళనాడులోని తిరుచ్చిలో ఉన్న ప్రఖ్యాత శ్రీరంగం రంగనాథర్‌ ఆలయానికి ఓ ముస్లిం భక్తుడు 600 వజ్రాలతో ప్రత్యేకంగా తయారు చేసిన కిరీటాన్ని బహుమతిగా సమర్పించారు. ముస్లిం అయిన జహీర్‌ హుస్సేన్‌.. భరతనాట్య కళాకారుడు. తాను నిర్వహించిన ప్రదర్శనలతో సంపాదించిన డబ్బులను దాచుకుని.. ఒక విలువైన కిరీటాన్ని తయారు చేయించారు. ఈ క్రమంలోనే శ్రీరంగం రంగనాథర్ ఆలయ ప్రధాన అర్చకుడు సుందర్‌ భట్టర్‌కు బుధవారం ఈ వజ్రాలతో కూడిన కిరీటాన్ని అందజేశారు. 3169 క్యారెట్ల బరువు ఉన్న ఒకే రూబీ రాయితో ఈ వజ్రాల కిరీటాన్ని తయారు చేసినట్లు జహీర్ హుస్సేన్ వెల్లడించారు. ప్రపంచంలోనే ఇలాంటి వజ్రాల కిరీటం ఇదే మొదటిది అని ఆయన స్పష్టం చేశారు.

ఈ సందర్భంగా శ్రీరంగం రంగనాథర్ ఆలయానికి వజ్రాల కిరీటం అందించిన జహీర్‌ హుస్సేన్‌.. తనకు ముస్లిం, హిందూ, క్రిస్టియన్ అనే తేడాలు లేవని తెలిపారు. ఇక ఆ వజ్రాల కిరీటాన్ని గోపాల్‌ దాస్‌ అనే కళాకారుడు తయారు చేసినట్లు చెప్పారు. ఆ కిరీటాన్ని రూపొందించేందుకు దాదాపు 8 ఏళ్ల సమయం పట్టినట్లు వెల్లడించారు. ఈ నేపథ్యంలోనే జహీర్ హుస్సేన్ చేసిన పని.. మత సామరస్యాన్ని చాటుతోందని, హిందూ-ముస్లిం భాయ్ భాయ్ అంటూ సోషల్ మీడియాలో నెటిజన్లు కామెంట్లు చేస్తున్నారు.