భార్య వేధింపులతో బెంగళూరు టెకీ ఆత్మహత్య.. వరకట్న చట్టాలపై లాయర్ల కీలక డిమాండ్

వరకట్న చట్టాన్ని ఉపయోగించుకుని కొంతమంది భార్యలు.. వారి భర్తలను, అత్తింటివారిని ఎంత హింసిస్తున్నారో చూస్తూనే ఉన్నాం. అప్పుడప్పుడూ ఇలాంటి వరకట్న చట్టానికి బలై ఆవేదన వెళ్లగక్కుకున్న కుటుంబాలు, వారి గోడును మనం వింటూనే ఉన్నాం. అయితే ఏదైనా పెద్ద సంఘటనలు జరిగినపుడు మాత్రమే ఇలాంటి వాటిపై చర్చ జరుగుతూ ఉంటుంది. ఆ తర్వాత ఎక్కడి వారు అక్కడే ఉండిపోతే.. మళ్లీ పరిస్థితి మొదటికి వస్తూ ఉంటుంది. తాజాగా ఇటీవల కర్ణాటక రాజధాని బెంగళూరులో టెకీ ఆత్మహత్య చేసుకునేముందు రాసిన సూసైడ్ లెటర్, సెల్ఫీ వీడియో దేశం మొత్తం తీవ్ర చర్చకు దారి తీసిన నేపథ్యంలో పలువురు ప్రముఖ లాయర్లు.. వరకట్న చట్టం, దానిలో తీసుకురావాల్సిన మార్పులను మరోసారి గుర్తు చేస్తున్నారు.

బెంగళూరు టెకీ ఆత్మహత్య కేసు సంచలనంగా మారిన నేపథ్యంలో వరకట్న వేధింపులకు సంబంధించిన సెక్షన్ 498 ఏ దుర్వినియోగాన్ని అరికట్టేందుకు వెంటనే సంస్కరణలు తీసుకురావాలని పలువురు లాయర్లు పిలుపునిచ్చాయి. ఈ సెక్షన్‌ దుర్వినియోగాన్ని అడ్డుకోవాలని అడ్వకేట్ వికాస్ పహ్వా బుధవారం సూచించారు. 30 ఏళ్లకు పైగా క్రిమినల్ లాయర్‌గా గుర్తింపు పొందిన వికాస్ పహ్వా.. కొందరు వ్యక్తిగతంగా సెక్షన్ 498ఏ దుర్వినియోగం చేయడాన్ని తాను ప్రత్యక్షంగా చూసినట్లు చెప్పారు.

వరకట్న వేధింపులకు సంబంధించిన వాస్తవ ఘటనలు ఉన్నప్పటికీ.. ఆర్థికంగా సమస్యలు పరిష్కరించాలని భర్త, అతడి కుటుంబాలను వేధింపులకు గురి చేయాలనే ఉద్దేశంతో భారీగా కేసులు నమోదు అవుతున్నాయని ఆయన తీవ్ర ఆవేదన వ్యక్తం చేశారు. ఇలాంటి కేసుల్లో చాలా వరకు నిరాధారమైన కేసులు ఉన్నాయని.. చట్టాన్ని తప్పుగా ఉపయోగించడాన్ని అరికట్టేందుకు తీవ్రమైన చర్యలు తీసుకోవాల్సిన సమయం వచ్చేసిందని పేర్కొన్నారు.

ఇక దేశంలో క్రిమినల్ కేసులు వాదించడంలో పేరు గాంచిన మరో లాయర్ సుమిత్ గెహ్లాట్ కూడా ఇదే విధమైన అభిప్రాయాన్ని వెల్లడించారు. ఈ సెక్షన్ 498ఏ నిబంధనల ద్వారా భర్తనే కాకుండా మొత్తం అత్తింటివారి కుటుంబాన్ని కూడా టార్చర్ చేసేందుకు కొందరు దాన్ని ఆయుధంగా ఉపయోగిస్తున్నారని ఆందోళన వ్యక్తం చేశారు. ఈ చట్టాన్ని దుర్వినియోగం చేయడం ద్వారా కొందరు భర్తలు, వారి కుటుంబం మానసిక క్షోభ, ఆర్థిక ఒత్తిడిని ఎదుర్కొంటున్నట్లు చెప్పారు. ఇలాంటి ఘటనల్లో కొన్ని సందర్భాల్లో ఇలా విషాదకరమైన ఘటనలు కూడా ఎదురవుతున్నట్లు వెల్లడించారు. ఈ సెక్షన్ 498 ఏ చట్టాన్ని బాధితుల రక్షణ కోసం కానీ.. దాన్ని దుర్వినియోగం చేయకుండా చూసుకోవడానికి అవసరమైన అన్ని భద్రతా చర్యలు తప్పనిసరి చేయాలని లాయర్ సుమిత్ గెహ్లాట్ స్పష్టం చేశాయి.

కొన్ని వివాహ బంధాలు కేవలం విడాకులతో ముగిసే వాతావరణాన్ని సృష్టించాయని.. ఇక కొన్ని సందర్భాల్లో ఆ భర్తకు జీవితాంతం వేధింపులు, ఆర్థికంగా నష్టపోవడం వంటి పరిస్థితికి దారితీస్తుందని మరో క్రిమినల్ లాయర్ ఆశిష్ దీక్షిత్ పేర్కొన్నారు. కొన్ని సందర్భాల్లో విడాకుల సమయంలో భార్యలు భారీగా భరణం డిమాండ్ చేయడం.. వారి భర్తలను ఆర్థికంగా కుంగదీస్తున్నట్లు తెలిపారు. పెళ్లై కొన్ని నెలలే అయినా.. భర్తల నుంచి భారీగా భరణం డిమాండ్ చేయడంతో వారి జీవితాలు అప్పుల్లో కూరుకుపోతున్నాయని చెప్పారు. ఇంకో క్రిమినల్ లాయర్ జూహీ అరోరా కూడా ఇలాంటి వ్యాఖ్యలే చేశారు. వరకట్న చట్టాలను దుర్వినియోగం చేస్తుండటంపై తీవ్ర ఆందోళన వ్యక్తం చేశారు. ఇక వరకట్న వేధింపుల కేసును విచారిస్తూ సుప్రీంకోర్టు కూడా తాజాగా కీలక వ్యాఖ్యలు చేసింది. సెక్షన్ 498 ఏ దుర్వినియోగంపై జస్టిస్ బీవీ నాగరత్నతో కూడిన ధర్మాసనం తీవ్ర ఆందోళన వ్యక్తం చేసింది.