ఒక్కరోజే 1500 మందికి శిక్ష తగ్గింపు,,,దిగిపోతూ చరిత్ర సృష్టించిన జో బైడెన్..

అమెరికా అధ్యక్షుడు జో బైడెన్ ఈరోజు తీసుకున్న ఓ నిర్ణయం చరిత్ర సృష్టించింది. మరికొన్ని రోజుల్లో ఈయన పదవీ కాలం ముగుస్తుండడంతో ఒక్కరోజులోనే ఆయన 1500 మందికి పైగా క్షమాభిక్ష పెట్టారు. ముఖ్యంగా గృహనిర్బంధంలో ఉంచిన 1500 మందికి శిక్ష తగ్గించారు. అలాగే అహింసా నేరాలకు పాల్పడిన 39 మందికి క్షమాభిక్ష పెట్టారు. అమెరికా ఆధునిక చరిత్రలో ఇంత మందికి క్షమాభిక్ష కల్పించడం ఇదే మొదటి సారి. అయితే బైడెన్ 1500 మందికి ఒకేసారి క్షమాభిక్ష ప్రసాదించడానికి కారణం ఏంటని ఆరా తీస్తున్నారు.

కరోనా సమయంలో రద్దీగా ఉండే జైళ్ల నుంచి అనేక మంది ఖైదీలను అమెరికా ప్రభుత్వం విడుదల చేసింది. అప్పటికే వారిలో ఐదుగురిలో ఒకరికి కరోనా ఉన్నట్లు గుర్తించి ఏడాది పాటు గృహ నిర్బంధంలో ఉంచింది. గృహనిర్బంధంలో ఉన్న వారికి శిక్ష తగ్గించాలనుకున్న అధ్యక్షుడు జో బైడన్.. గురువారం ఒక్క రోజే అనేక మందికి శిక్ష తగ్గించారు. ఆయన పదవీ కాలం ముగిసే లోపు మరింత మందికి శిక్షలు తగ్గించడంతో పాటు క్షమాభిక్షలు ప్రసాదించనున్నారని సమాచారం. అయితే జనవరిలో డొనాల్డ్ ట్రంప్ అధికారంలోకి వస్తే ఉరిశిక్షలు అమలు చేసే అవకాశం ఎక్కువగా కనిపిస్తోంది.

బైడెన్ ఇప్పటి వరకు మొత్తం 122 మందికి శిక్ష తగ్గించగా.. మరో 21 మందికి క్షమాభిక్ష పెట్టారు. వీళ్లలో గంజాయి కేసులో శిక్ష అనుభవిస్తున్న వారితో పాటు స్వలింగ సంపర్కం నిబంధనలు ఉల్లంఘించినవారే ఎక్కువ. అయితే 2020 ఎన్నికల ప్రచారాల్లో భాగంగా బైడెన్ ఉరిశిక్ష పడబోతున్ననేరస్థులకు జైల్లో ఉండేలా చూస్తానంటూ హామీలు ఇచ్చారు. ఆ హామీల పరంగానే అమెరికా అటార్నీ జనరల్ మెరిక్ గార్లాండ్ ఫెడరల్ ఉరిశిక్షలను నిలిపివేశారు. దీంతో బైడెన్ యే ఉరిశిక్షలు నిలిపివేయించారంటూ పెద్ద ఎత్తున విమర్శలు వచ్చాయి.

ఇవి మాత్రమే కాకుండా అక్రమ ఆయుధ కొనుగోళ్ల కేసులో నిందితుడైన బైడెన్‌ కుమారుడు హంటర్ బైడెన్‌కు.. జోబైడెన్ క్షమాభిక్ష ప్రసాదించడంతో అంతా షాక్ అయ్యారు. ఈ ఏడాది జనవరిలో ఈ నిర్ణయం తీసుకోగా.. అప్పటి నుంచి ఆయనపై ఒత్తిడి మొదలైంది. నేరస్థులకు శిక్ష తగ్గించడమో లేక క్షమాభిక్ష ప్రసాదించడమో చేయాలని అంతా అడుగుతూనే ఉన్నారు. ఇలాంటి సమయంలో జో బైడెన్ ఈ నిర్ణయం తీసుకున్నారు. అలాగే ముందు ముందు కూడా క్షమాభిక్ష పత్రాలను పరిశీలిస్తానని బైడెన్ చెప్పారు. ఇదంతా చూస్తుంటే పదవీ కాలం ముగి సేవరకు మరికొంత మందికి బైడెన్ శిక్షలు తగ్గించే అవకాశం ఎక్కువగా కనిపిస్తోంది.