సీనియర్లకు బెస్ట్ ఆప్షన్.. స్పెషల్ స్కీమ్‌తో 9.50 శాతం వడ్డీ.. రూ.5 లక్షలు జమ చేస్తే ఎంతొస్తుంది?

రిజర్వ్ బ్యాంక్ ఆఫ్ ఇండియా కీలక పాలసీ రేట్లను వరుసగా 11వ సారి యథాతథంగా కొనసాగిస్తున్నట్లు ప్రకటించిన సంగతి తెలిసింది. దీంతో బ్యాంకులు సైతం యథాతథ స్థితినే కొనసాగిస్తున్నాయి. ఆర్‌బీఐ వడ్డీ రేట్లు తగ్గిస్తే బ్యాంకులు సైతం డిపాజిట్లపై వడ్డీ రేట్లు తగ్గించే అవకాశం ఉంటుంది. వచ్చే ఏడాది తొలి త్రైమాసికంలో ఫిక్స్‌డ్ డిపాజిట్ల వడ్డీ రేట్లు తగ్గే అవకాశాలు ఉన్నాయని బ్యాంకింగ్ వర్గాల సమాచారం. అందుకే బ్యాంక్ డిపాజిట్లు చేసే వారికి ఇదే సరైన సమయంగా చెప్పవచ్చు. సాధారణంగానే జనరల్ కస్టమర్లతో పోలిస్తే సీనియర్ సిటిజన్లకు బ్యాంకులు అదనపు వడ్డీ రేట్లు ఆఫర్ చేస్తుంటాయి. గరిష్ఠంగా 9.50 శాత మేర వడ్డీ అందుకోవాలంటే ఈ బ్యాంకులోనే డిపాజిట్ చేయాలి.

స్టేట్ బ్యాంక్ ఆఫ్ ఇండియా వంటి దిగ్గజ బ్యాంకుల కన్నా అధిక వడ్డీ రేట్లు కల్పిస్తోంది యూనిటీ స్మాల్ ఫైనాన్స్ బ్యాంక్. ప్రస్తుతం ఈ బ్యాంకులో సీనియర్ సిటిజన్లకు ఫిక్స్‌డ్ డిపాజిట్లు పైన మంచి వడ్డీ రేట్లు ఉన్నాయి. 4.50 శాతం నుంచి గరిష్ఠంగా 9.50 శాతం వరకు వడ్డీ ఆఫర్ చేస్తోంది. జనరల్ కస్టమర్లకు సైతం 4.50 శాతం నుంచి 9 శాతం వరకు వడ్డీ ఇస్తోంది. స్పెషల్ స్కీమ్ 1001 మెచ్యూరిటీ టెన్యూర్ ద్వారా గరిష్ఠ వడ్డీ రేట్లు ఆఫర్ చేస్తోంది.

యూనిటీ స్మాల్ ఫైనాన్స్ బ్యాంక్ ప్రస్తుతం 1001 రోజుల మెచ్యూరిటీ టెన్యూర్ గల స్పెషల్ ఫిక్స్‌డ్ డిపాజిట్ స్కీమ్ ద్వారా గరిష్ఠ వడ్డీ రేట్లు ఇస్తోంది. జనరల్ కస్టమర్లకు 9 శాతం వడ్డీ ఇస్తుండగా 60 ఏళ్ల వయసు పైబడిన సీనియర్ సిటిజన్లకు 9.50 శాతం వడ్డీ ఇస్తోంది. మరి ఒక సీనియర్ సీటిజన్ రూ.5 లక్షలు జమ చేసినట్లయితే మెచ్యూరిటీ తర్వాత ఎంతొస్తుందో ఆన్‌లైన్ కాలిక్యులేటర్ ద్వారా తెలుసుకోవచ్చు. 1001 రోజుల అంటే దాదాపు రెండు సంవత్సరాల 9 నెలల సమయం ఉంటుంది. రూ.5 లక్షలు ఫిక్స్‌డ్ డిపాజిట్ చేస్తే వడ్డీ రూ.1,28,700 వరకు వస్తుంది. మొత్తంగా చేతికి రూ.6,28,700 అందుతుంది. అదే జనరల్ కస్టమర్ అయితే అసలూ వడ్డీ కలిపి చేతికి రూ.6,21,900 వరకు లభిస్తాయి.