ఆ ఉద్యోగులందరికీ ఈపీఎఫ్ఓ తీపి కబురు.. మరోసారి గడువు పెంపు.. నెల జీతం బోనస్!

ఉద్యోగుల భవిష్య నిధి సంస్థ (ఈపీఎఫ్ఓ) మరోసారి కీలక నిర్ణయం తీసుకుంది. కేంద్ర ప్రభుత్వం తీసుకొచ్చిన ఎంప్లాయ్‌మెంట్ లింక్డ్ ఇన్సెంటివ్ ) స్కీమ్ బెనిఫిట్స్ పొందేందుకు అర్హులైన ఉద్యోగులందరికీ మరో అవకాశం కల్పించింది. ఈఎల్ఐ స్కీమ్ బెనిఫిట్స్ పొందేందుకు ముఖ్యమైన UAN యాక్టివేషన్ సహా బ్యాంక్ ఖాతాతో ఆధార్ లింక్ చేసుకునేందుకు ఇచ్చిన గడువును మరోసారి పొడిగిస్తున్నట్లు తాజాగా ప్రకటించింది. యూఏఎన్ యాక్టివేషన్ గడువు నవంబర్ 30,2 024తోనే ముగిసినప్పటికీ దానిని డిసెంబర్ 15, 2024 వరకు పొడిగించిన సంగతి తెలిసిందే. ఆ గడువు సైతం ముగియడంతో మరో అవకాశం కల్పిస్తూ మరోసారి ఈ గడువును పెంచినట్లు తాజాగా ప్రకటించింది.

కేంద్ర ప్రభుత్వం ప్రకటించిన ఎంప్లాయ్మెంట్ లింక్డ్ ఇన్సెంటివ్ (ఈఎల్ఐ) స్కీమ్ మానీటరీ బెనిఫిట్స్ క్లెయిమ్ చేసుకునేందుకు యూఏఎన్ యాక్టివేషన్, బ్యాంక్ ఖాతాతో ఆధార్ లింక్ చేయడం తప్పనిసరి. ఈఎల్ఐ ప్రోత్సాహకాలను ఈపీఎఫ్ఓ ఆధ్వర్యంలో కేంద్రం అందిస్తోంది. ఈ కొత్త ప్రోత్సాహక పథకాన్ని ఈ ఏడాది జులైలో ప్రవేశపెట్టిన యూనియన్ బడ్జెట్ 2024 లో మూడు రకాల ఈఎల్ఐ స్కీమ్స్ (A,B,C)లను ప్రకటించారు ఆర్థిక మంత్రి నిర్మలా సీతారామన్. ఈ క్రమంలో అర్హులైన వారికి ఈ స్కీమ్ బెనిఫిట్స్ కల్పించేందుకు యూఏఎన్ యాక్టివేషన్ చేసేలా చూడాలని కంపెనీల యాజమాన్యాలకు ఈపీఎఫ్ఓ గతంలోనే సూచించింది. ఇప్పటికీ చాలా మంది తమ యూఏఎన్ యాక్టివేషన్ చేసుకోలేదని తేలిన క్రమంలోనే మరోసారి గడువు పెంచినట్లు తెలుస్తోంది.

నెల రోజుల జీతం బోనస్..

కేంద్ర ప్రభుత్వం తీసుకొచ్చిన మూడు ఈఎల్ఐ పథకాల్లో స్కీమ్-ఏ ఉద్యోగులకు ఉద్దేశించినది ఇందులో భాగంగా మొదటి సారి ఉద్యోగంలో చేరినవారిని ఈపీఎఫ్ఓ అకౌంట్ల సాయంతో గుర్తించి ఒక నెల వేతనాన్ని ప్రోత్సాహకంగా ఇవ్వనున్నారు. గరిష్ఠంగా రూ.15 వేల వరకు మూడు దఫాలుగా ఉద్యోగుల ఖాతాల్లో జమ చేయనున్నారు. గరిష్ఠంగా నెలకు రూ.1 లక్ష వరకు వేతనం అందుకుంటున్న ఉద్యోగులే అర్హులు.

ఉపాధి కల్పన ప్రోత్సహించేలా..

ఉత్పాదక రంగంలో ఉపాధి కల్పనను ప్రోత్సహించేందుకు స్కీమ్-బీ ఉద్దేశించినది. దీని ద్వారా ఉపాధి కల్పించే కంపెనీ యాజమాన్యానికి ప్రోత్సాహకాలు ఇవ్వనున్నారు. మొదటి సారి ఉద్యోగంలో చేరే వారితో పాటుగా.. ఉపాధి కల్పించిన కంపెనీకి మొదటి నాలుగు సంవత్సరాల పాటు నిర్ధేశిత పే స్కేళ్ల ప్రకారం ఈపీఎఫ్‌లో చందాలు ప్రోత్సాహకంగా జమ చేయనున్నారు.

స్కీమ్-సీ ద్వారా నెలకు రూ.3 వేలు..

స్కీమ్ -సీ ప్రకారం ప్రతి ఉద్యోగికి ఈపీఎఫ్ఓ వాటా కింద కంపెనీ యాజమాన్యాలు చెల్లించే వాటా కింద రెండేళ్ల పాటు నెలకు రూ.3 వేలు కేంద్రం చెల్లిస్తుంది. జనవరి 2025 నుంచే ఈ ఈఎల్ఐ పథకాన్ని అమలు చేసే అవకాశాలు ఉన్నట్లు తెలుస్తోంది.