ఈ బ్యాంకులోనే తక్కువ వడ్డీ.. రూ.30 లక్షల హోమ్ లోన్‌పై

సొంతింటి కల నెరవేర్చుకునేందుకు పెద్ద మొత్తంలో డబ్బులు అవసరమవుతాయి. తమ వద్ద ఉన్న సేవింగ్స్ డౌన్‌పేమెంట్‌గా చెల్లించి మిగితా సొమ్ములను బ్యాంకులో లోన్ తీసుకుంటున్న వారి సంఖ్య పెరుగుతోంది. మీరు కూడా హోమ్ లోన్ తీసుకోవాలని ప్లాన్ చేస్తున్నారా? అయితే మీరు కొన్ని ముఖ్యమైన విషయాలు తెలుసుకోవాలి. గృహ రుణం అంటే దీర్ఘకాలిక ఆర్థిక బాధ్యత. ఇక్కడ వడ్డీ రేట్లు కీలకంగా మారతాయి. తక్కువ వడ్డీ రేట్లు ఉన్న బ్యాంకులో లోన్ తీసుకోవడం ద్వారా పెద్ద మొత్తంలో ఆదా చేసుకోవచ్చు. అయితే, హోమ్ లోన్ వడ్డీ రేటును రుణ గ్రహీత వయసు, అర్హత, ఆదాయం, జీవిత భాగస్వామి ఆదాయం, అప్పులు, పొదుపు వంటి అన్ని అంశాలు ప్రభావితం చేస్తుంటాయి.

హోమ్ లోన్ తీసుకుని దీర్ఘకాలంలో తిరిగి చెల్లించేందుంకు బ్యాంకులు వీలు కల్పిస్తాయి. నెల నెల ఈక్వేటెడ్ మంత్లీ ఇన్‌స్టాల్మెంట్ ల రూపంలో చెల్లించాలి. లోన్ వచ్చిన తర్వాతి నెల నుంచి తిరిగి చెల్లించడం ప్రారంభించాల్సి ఉంటుంది. అలాగే బ్యాంకులు లోన్ ఇచ్చేందుకు ప్రధానంగా చూసేది రుణ గ్రహీత సిబిల్ స్కోర్ . మంచి స్కిబిల్ స్కోర్ ఉన్నవారికి రుణాలు ఇచ్చేందుకు బ్యాంకులు మొగ్గు చూపుతుంటాయి. అలాగే తక్కువ వడ్డీ రేట్లకే రుణాలు మంజూరు చేస్తుంటారు. అలాగే ఏ బ్యాంకులో తక్కువ వడ్డీ రేట్లు ఉన్నాయి అనేది చూసుకుని ఆ బ్యాంకులో లోన్ తీసుకోవడం ద్వారా పెద్ద మొత్తంలో వడ్డీ ఆదా చేసుకోవచ్చు. ప్రస్తుతం ప్రభుత్వ రంగ ప్రముఖ బ్యాంకుల్లో వడ్డీ రేట్లు ఎలా ఉన్నాయో తెలుసుకుందాం.

స్టేట్ బ్యాంక్ ఆఫ్ ఇండియాలో ప్రస్తుతం 8.50 శాతం నుంచి 9.85 శాతం వరకు వడ్డీ రేట్లు ఉన్నాయి.

బ్యాంక్ ఆఫ్ బరోడాలో 8.40 శాతం నుంచి 10.90 శాతం

యూనియన్ బ్యాంక్ ఆఫ్ ఇండియాలో 8.30 శాతం నుంచి 10.90 శాతం

పంజాబ్ నేషనల్ బ్యాంకులో 8.40 శాతం నుంచి 10.15 శాతం

కెనరా బ్యాంకులో 8.40 శాతం నుంచి 11.15 శాతం

బ్యాంక్ ఆఫ్ ఇండియాలో 8.40 శాతం నుంచి 11.10 శాతం

యూకో బ్యాంకులో 8.45 శాతం నుంచి 10.30 శాతం

బ్యాంక్ ఆఫ్ మహారాష్ట్రలో 8.35 శాతం నుంచి 11.15 శాతంగా ఉన్నాయి.

రూ.30 లక్షల లోన్ పై ఈఎంఐ ఎంత కట్టాలి?

పైన పేర్కొన్న బ్యాంకులన్నింటిలో చూసుకుంటే యూనియన్ బ్యాంక్ ఆఫ్ ఇండియాలో కనిష్ఠ వడ్డీ రేటు 8.30 శాతంగా ఉంది. సిబిల్ స్కోర్ 800 ఆపైన ఉండి, బ్యాంకుతో మంచి సంబంధాలు కలిగి ఉన్న వారికి కనిష్ఠ వడ్డీ రేటుకే లోన్ ఇచ్చే అవకాశం ఉంటుంది. అలాగే బ్యాంకు ఫేవర్‌గా క్రెడిట్ లేదా టర్మ్ లేదా లైఫ్ పాలసీ కలిగి ఉన్న వారికి 5 బేసిస్ పాయింట్ల మేర వడ్డీ రాయితీ ఉంటుంది.

ఉదాహరణకు మీరు ఈ బ్యాంకులో రూ.30 లక్షల హోమ్ లోన్ తీసుకున్నారు అనుకుందాం. మీ సిబిల్ స్కోర్ 800 పైన ఉండి బ్యాంకు 8.30 శాతం వడ్డీకే లోన్ ఇచ్చింది అనుకుందాం. మీరు 15 సంవత్సరాల టెన్యూర్ ఎంచుకున్నారు అనుకుందాం. అప్పుడు మీరు నెల నెలా రూ.29,190 వరకు కట్టాల్సి వస్తుంది. అదే మీరు 20 సంవత్సరాల టెన్యూర్ ఎంచుకున్నారు అనుకుందాం అప్పుడు మీ EMI అనేది రూ.25,650 వరకు ఉంటుంది. అంటే మీరు ఎంచుకునే కాల పరిమితిని బట్టి నెల వారీ ఈఎంఐ మారుతుంది.