5 శాతం వడ్డీకే రూ. 3 లక్షల వరకు లోన్.. రూ. 15 వేలు సాయం.. కేంద్ర ప్రభుత్వ స్కీమ్

చేతి వృత్తిదారుల్ని ఆర్థికంగా మరింత బలోపేతం చేసేందుకు.. వారికి అండగా ఉండేందుకు ప్రధాని నరేంద్ర మోదీ నేతృత్వంలోని కేంద్ర ప్రభుత్వం 2023, సెప్టెంబర్ 17న నెలలో ఒక స్కీమ్ ప్రకటించిన సంగతి తెలిసిందే. ఇదే ప్రధాన మంత్రి విశ్వకర్మ యోజన (పీఎం విశ్వకర్మ స్కీమ్). చేతి వృత్తులపై ఆధారపడి జీవిస్తున్న కుటుంబాలకే ఇది వర్తిస్తుంది. మొత్తం 18 రకాల చేతి వృత్తి దారుల్ని ఈ పథకానికి అర్హులుగా గుర్తించారు. దీంట్లో వడ్రంగులు, శిల్పకారులు, తాపీ పని చేసేవారు, వలలు, బోట్లు తయారీదారులు, పాదరక్షలు తయారు చేసేవారు, కమ్మరి, బుట్టలు అల్లేవారు, కలంకారీ, బొమ్మలు తయారు చేసేవారు, స్వర్ణకారులు, రజకులు, నాయీబ్రాహ్మణులు, దర్జీలు ఉన్నారు.

సర్టిఫికెట్ లేదా ఐడీ కార్డుల ఆధారంగా.. ఈ పథకం లబ్ధిదారుల్ని గుర్తిస్తారు. ఇక పథకంలో ఎంపికైన వారికి వారం రోజుల పాటు నిపుణులతో పలు హస్త కళారూపాల తయారీపై శిక్షణ అందిస్తారు. ఈ ట్రైనింగ్‌లో భాగంగా రోజుకు రూ. 500 స్టైఫెండ్ అందిస్తారు. కావాలనుకుంటే.. మరో వారం అంటే 15 రోజుల శిక్షణ కూడా తీసుకోవచ్చు.

లబ్ధిదారులకు మొదట రూ. 15 వేల సాయం అందిస్తారు. ఇది సదరు వృత్తికి సంబంధించి పనిముట్లు కొనుగోలు చేసేందుకు. సాయం అందించడం లేదా అంత విలువైన పరికరాల్ని అందిస్తారు. దాదాపు 30 లక్షల కుటుంబాలకు ఈ స్కీమ్ ప్రయోజనం చేకూర్చే అవకాశం ఉందని కేంద్ర ప్రభుత్వం.. అంచనా వేసింది.

తర్వాత బ్యాంకుల ద్వారా 5 శాతం వడ్డీతో లోన్లు మంజూరు చేసేలా చర్యలు తీసుకుంటారు. అంటే మిగతా వడ్డీ బ్యాంకులకు కేంద్రం చెల్లిస్తుంది. ఇక్కడ మొదట రూ. లక్ష లోన్ వస్తుంది. 18 నెలల కాలంలో దీనికి చెల్లిస్తే.. మళ్లీ రెండో విడతలో రూ. 2 లక్షల రుణం పొందొచ్చు. ఈ లోన్ 30 నెలల కాలంలో చెల్లించాల్సి ఉంటుంది. కళాకారులు.. తమ నైపుణ్యాలు అప్‌గ్రేడ్ చేసుకోవడం సహా టూల్‌కిట్ ఇన్సెంటివ్, డిజిటల్ ట్రాన్సాక్షన్స్, మార్కెటింగ్‌ను ప్రోత్సహించేందుకు వీలుగా ఈ లోన్లు మంజూరు చేస్తారు.

అర్హులైన వారు తమ వివరాల్ని www.pmvishwakarma.gov.in వెబ్‌సైట్ ద్వారా ఆన్‌లైన్‌లో దరఖాస్తు చేసుకోవచ్చు. లబ్ధిదారుల వయసు 18 సంవత్సరాల నిండి ఉండాలి. ఇంకా గత అయిదేళ్ల కాలంలో కేంద్ర, రాష్ట్ర ప్రభుత్వాల నుంచి ఎలాంటి లోన్లు పొందకూడదు. ప్రభుత్వ కుటుంబాల ఉద్యోగులు కూడా అనర్హులు. కామన్ సర్వీస్ కేంద్రాలకు వెళ్లి కూడా ఈ పథకం కోసం అప్లై చేసుకోవచ్చు. ఇక క్షేత్రస్థాయిలో పరిశీలించి లబ్ధిదారుల్ని ఎంపిక చేస్తారు. అన్ని వివరాల్ని పరిశీలించిన తర్వాత సర్టిఫికెట్ వస్తుంది.