అక్కడ 24 గంటల ట్రేడింగ్‌కు ఓకే.. గంట సేపు బ్రేక్.. మరి సెబీ ఏమంటుంది? రోజంతా ట్రేడ్ చేయొచ్చా?

భారత్‌లో స్టాక్ మార్కెట్లు ఉదయం 9 గంటలకు మొదలై.. మధ్యాహ్నం 3.30 గంటల వరకు ఉంటుంది. అమెరికాలో అయితే ఉదయం 9.30 గంటల నుంచి సాయంత్రం సాయంత్రం 4 గంటల వరకు ఉంటుంది. ఈ 6.30 గంటల ట్రేడింగ్ టైంలోనే లాభాలు సంపాదించిన వారి కంటే నష్టపోయే వారి సంఖ్యే ఎక్కువగా ఉంటుందని అంచనా. అదే రోజంతా ట్రేడింగ్ జరిగితే.. ఈ పరిస్థితి ఎలా ఉంటుందో చెప్పలేం. అయినా ట్రేడింగ్ సమయం పెంచాలని స్టాక్ ఎక్స్చేంజీలు ఎందుకు కోరుకుంటున్నాయి. దీని వల్ల అసలు ఎవరికి ప్రయోజనం కలుగుతుంది.? త్వరలో 24 గంటల ట్రేడింగ్ తీసుకురావాలని యోచిస్తున్నట్లు తెలుస్తోంది. ఇప్పటికే క్రిప్టో కరెన్సీ మార్కెట్‌లో ఇలానే ఉంది. స్టాక్ మార్కెట్లోకి కూడా తీసుకురావాలని అనుకుంటున్నట్లు సమాచారం.

ఇండియా, అమెరికా, ఐరోపా, చైనా.. ఇలా ప్రధాన దేశాల స్టాక్ మార్కెట్లపైన అంతర్జాతీయ సంఘటనల ప్రభావం ఎక్కువగా ఉంటుంది. ఇప్పుడు.. ఏ రోజైనా ట్రేడింగ్ ముగిసిన తర్వాత.. ఏదైనా పెద్ద ప్రతికూల సంఘటన లేదా పరిణామం చోటుచేసుకుంటే.. అప్పుడు మరుసటి రోజు ఉదయమే ట్రేడింగ్ ప్రారంభంలో ఆ ప్రభావం కనిపిస్తుంది. దీని తీవ్రత ఆధారంగా మదుపరులు నష్టపోతుంటారు. అయితే ట్రేడింగ్ సమయం పొడిగిస్తే.. ఈ సమస్యకు పరిష్కారం దక్కుతుందని భావిస్తున్నాయి స్టాక్ ఎక్స్చేంజీలు.

అంటే ఇక్కడ ఆయా ఘటనలపై స్పందించేందుకు.. మరుసటి రోజు ఉదయం వరకు ఎదురుచూడాల్సిన అవసరం లేకుండా.. మదుపరులు సత్వరమే స్పందించే అవకాశం ఉంటుంది. తద్వారా నష్టాల్ని నియంత్రించుకుంటారనే అభిప్రాయం వ్యక్తమవుతోంది. ఇప్పటికే ట్రేడింగ్ సమయం పొడిగింపు దిశగా అమెరికాలో అడుగులు పడుతున్నాయి. ఆ దేశంలోనే తొలి 24 గంటల స్టాక్ ఎక్స్చేంజీకి అమెరికా సెక్యూరిటీస్ అండ్ ఎక్స్చేంజ్ కమిషన్ ఇదివరకే అనుమతులు కూడా ఇచ్చింది.

24 ఎక్స్చేంజీగా వ్యవహరించే ఇది రెండు విడతల్లో తన కార్యకలాపాల్ని 2025 సంవత్సరంలో ప్రారంభించనుంది. మొదట ఉదయం 4 గంటల నుంచి రాత్రి 7 గంటల వరకు.. (అక్కడి కాలమానం ప్రకారం).. మళ్లీ గంట పాటు రాత్రి 7-8 మధ్య బ్రేక్ ఉంటుంది. తిరిగి రాత్రి 8 గంటల నుంచి ఉదయం 4 గంటల వరకు ఇలా రెండు విడతల్లో ట్రేడింగ్ ఉంటుంది. అంటే 24 గంటలని చెబుతున్నా.. గంట విరామం తీసేస్తే 23 గంటల ట్రేడింగ్ అని చెప్పొచ్చు.

ఇక క్రిప్టో కరెన్సీ ఎక్స్చేంజీలో రోజుకు 24 గంటలూ ట్రేడింగ్ ఇప్పటికే జరుగుతోంది. అమెరికాలో క్రిప్టో మార్కెట్ ఇన్వెస్ట్‌మెంట్లు పెరిగిన నేపథ్యంలో అక్కడ ఈ ట్రేడింగ్ అలవాటైంది. ప్రస్తుతం ఆసియా మార్కెట్ల సమయం ముగిసిన తర్వాత.. అమెరికా మార్కెట్లు మొదలవుతున్నాయి. అందుకే.. అక్కడి వాణిజ్య అంశాల ప్రభావం మన మార్కెట్లపై మరుసటి రోజు పడుతుంది. అదే అమెరికాలో రోజంతా ట్రేడింగ్‌కు అవకాశముంటే.. అక్కడి షేర్లలో ట్రేడింగ్ చేసే ఆసియా మదుపరుల సంఖ్య కూడా పెరగొచ్చు.

మన దేశంలో ఈక్విటీ ట్రేడింగ్ టైమ్ పొడిగింపుపై నేషనల్ స్టాక్ ఎక్స్చేంజీ ప్రతిపాదనలు సిద్ధం చేసి.. మార్కెట్ నియంత్రణ సంస్థ సెక్యూరిటీస్ అండ్ ఎక్స్చేంజ్ బోర్డ్ ఆఫ్ ఇండియాకు పంపించింది. బ్రోకర్ల నుంచి సరైన స్పందన లేకపోవడంతో సెబీ దీనిని తిరస్కరించింది. అందుకే ప్రస్తుతానికి ఇక్కడ ఆ టైమ్ పొడిగింపు వచ్చే అవకాశాలు కనిపించట్లేదు. అయితే భవిష్యత్తులో ఒకవేళ అమెరికాలో సక్సెస్ అయితే.. అప్పుడు ఇక్కడ కూడా 24 అవర్స్ ట్రేడింగ్ వచ్చే అవకాశాలు మెరుగుపడొచ్చు.