బాక్సింగ్‌ డే టెస్టులో అనూహ్య ఘటన.. అభిమానులపై కోహ్లీ ఆగ్రహం

ఆస్ట్రేలియాతో జరుగుతున్న నాలుగో టెస్టులో విరాట్ కోహ్లీని ఆసీస్‌ అభిమానులు రెచ్చగొట్టే ప్రయత్నం చేశారు. రెండో రోజు ఆటలో 3 పరుగులు చేసి ఔట్‌ అయిన తర్వాత.. డ్రెస్సింగ్‌ రూమ్‌వైపు వెళ్లాడు. అయితే ఈ క్రమంలోనే ఆస్ట్రేలియా ఫ్యాన్స్ కోహ్లీని రెచ్చగొట్టే ప్రయత్నం చేశారు. తమ మాటలు, చేతలతో కోహ్లీకి ఆగ్రహం తెప్పించారు.

క్రీజులో ఉన్నంతసేపు ఏకాగ్రతతో ఆడిన విరాట్.. మళ్లీ ఆఫ్‌సైడ్‌ బంతిని వేటాడి ఔట్‌ అయ్యాడు. దీంతో నిరాశగా డ్రెస్సింగ్‌ రూమ్‌వైపు అడుగులు వేస్తున్నాడు. అయితే ఈ సమయంలోనే కోహ్లీని కొంతమంది ఆస్ట్రేలియా ఫ్యాన్స్‌ ఎగతాళి చేశారు. తమ మాటలు, చేతలతో భారత స్టార్‌ను రెచ్చగొట్టారు. దీంతో కోహ్లీ ఆగ్రహానికి గురయ్యాడు. మళ్లీ వెనక్కి వచ్చి.. స్టేడియంలో కూర్చున్న ఫ్యాన్స్‌వైపు కోపంగా చూశాడు. ఇది గమనించిన భద్రతా అధికారి కోహ్లీకి నచ్చజెప్పి లోపలికి తీసుకెళ్లాడు. ఇందుకు సంబంధించిన వీడియో సోషల్‌ మీడియాలో వైరల్‌గా మారింది.

విరాట్ పట్ల.. ఆస్ట్రేలియా అభిమానులు ప్రవర్తించిన తీరును భారత ఫ్యాన్స్‌ ఖండిస్తున్నారు. భారత అత్యుత్తమ బ్యాటర్‌ పట్ల ఇది అమర్యాదకరమైన ప్రవర్తన అని పేర్కొన్నారు. ఆటగాళ్లపై విమర్శలు చేయొచ్చు కానీ.. అది హద్దులు దాటుతోందని వ్యాఖ్యానించారు.

ఇక ఆస్ట్రేలియా బ్యాటర్‌ కొన్‌స్టాస్‌తో కోహ్లీ వాగ్వాదంపై ఆస్ట్రేలియా మీడియా ప్రచురించిన ఆర్టికల్స్‌ తీవ్ర వివాదానికి దారితీశాయి. కొన్ని పత్రికలు కోహ్లీ జోకర్‌ అనే అర్థం వచ్చేలా.. హెడ్‌లైన్లను పెట్టాయి. ఎడిట్‌ చేసిన ఫొటోలను అందులో వాడాయి. దీనిపై టీమిండియా మాజీ క్రికెటర్ రవిశాస్త్రి ఘాటుగా స్పందించాడు.

“స్వదేశంలో ఆస్ట్రేలియా ఇలానే స్పందిస్తుందని అందరికీ తెలుసు. ఇలాంటప్పుడే మన ఆటగాళ్లకు మనం మద్దతుగా నిలవాలి. ఆస్ట్రేలియా మీడియా ఇలా హెడ్‌లైన్లు పెట్టడంలో నాకేమీ ఆశ్చర్యం కలగలేదు. ఎందుకంటే మెల్‌బోర్న్‌లో ఆసీస్‌ గత 13 ఏళ్లుగా మ్యాచ్‌ గెలవలేదు. దీంతో ఈసారి ఎలాగైనా గెలవాలనే లక్ష్యంతో ఇలా ప్రవర్తిస్తోంది. ఇందులో ఆటగాళ్లు, ప్రేక్షకులే కాకుండా మీడియా కూడా ఇందులో భాగస్వామే. కాబట్టి, ఇలాంటివి నన్ను ఆశ్చర్యపరచలేదు” అని రవిశాస్త్రి వ్యాఖ్యానించాడు.