మరో 'కొత్త స్కీమ్' తెచ్చిన దిగ్గజ బ్యాంక్.. 7.90 శాతం వడ్డీ.. రూ.5 లక్షలు జమ చేస్తే ఎంతొస్తుంది

కేంద్ర ప్రభుత్వం, ఎల్ఐసీ భాగస్వామ్యంలోని దిగ్గజ బ్యాంక్ ఐడీబీఐ బ్యాంక్ (IDBI) తమ కస్టమర్లకు అదిరే శుభవార్త అందించింది. తమ బ్యాంకులో డబ్బులు డిపాజిట్ చేస్తే అధిక వడ్డీ అందించేలా మరో కొత్త ఫిక్స్‌డ్ డిపాజిట్ పథకాన్ని అందుబాటులోకి తీసుకొచ్చింది. అలాగే ఇప్పటికే అందుబాటులో ఉన్న ఉత్సవ్ ఎఫ్‌డీ పథకాల గడువును సైతం పొడిగిస్తున్నట్లు తెలిపింది. ఆయా పథకాల గడువు డిసెంబర్ 31తో ముగుస్తున్న క్రమంలో ఈ నిర్ణయం తీసుకుంది. మరి ఆ స్కీమ్స్ గురించి ఇప్పుడే పూర్తి వివరాలు తెలుసుకుందాం.

కొత్త ఎఫ్‌డీ స్కీమ్ ఇదే..

ఐడీబీఐ బ్యాంక్ తమ కస్టమర్లకు అధిక వడ్డీ అందించేలా ఉత్సవ్ కాలెబుల్ ఫిక్స్‌డ్ డిపాజిట్లు న్యూ టెన్యూర్  స్కీమ్ తీసుకొచ్చింది. ఈ స్కీమ్ మెచ్యూరిటీ కాల పరిమితి 555 రోజులుగా నిర్ణయించింది. ఈ కొత్త పథకం డిసెంబర్ 23, 2024 నుంచే అమలులోకి వచ్చినట్లు ప్రకటించింది. ఈ స్కీమ్ ఫిబ్రవరి 15, 2025 వరకు అందుబాటులో ఉంటుందని పేర్కొంది. అలాగే ఇప్పటికే అందుబాటులో ఉన్న ఉత్సవ్ ఎఫ్‌డీల టెన్యూర్ గడువును మార్చి 31, 2025 వరకు పొడిగించినట్లు తెలిపింది.

ఉత్సవ్ కాలెబుల్ ఎఫ్‌డీ స్కీమ్స్ వడ్డీ రేట్లు ఇలా..

ఉత్సవల్ కాలెబుల్ ఎఫ్‌డీ పథకాల ద్వారా జనరల్ కస్టమర్లకు 300 రోజుల టెన్యూర్‌పై 7.05 శాతం, 375 రోజులపై 7.25 శాతం, 444 రోజులపై 7.35 శాతం, 700 రోజులపై 7.20 శాతం వడ్డీ ఇస్తోంది. ఇక కొత్తగా తీసుకొచ్చిన 555 రోజుల టెన్యూర్ డిపాజిట్ స్కీమ్ ద్వారా 7.40 శాతం వడ్డీ అందిస్తోంది. అదే సీనియర్ సిటిజన్లకు అయితే 50 బేసిస్ పాయింట్లు అదనపు వడ్డీ ఇస్తోంది. దీని ప్రకారం కొత్త పథకం ద్వారా సీనియర్ సిటిజన్లకు 7.90 శాతం వడ్డీ అందుతోంది.

రూ.5 లక్షలు జమ చేస్తే ఎంతొస్తుంది?

ఐడీబీఐ బ్యాంక్ కొత్తగా తీసుకొచ్చిన 555 రోజుల ఉత్సవ్ కాలెబుల్ ఎఫ్‌డీ స్కీమ్‌లో ఒక సాధారణ కస్టమర్ రూ. 5 లక్షలు జమ చేశారు అనుకుందాం. అప్పుడు మెచ్యూరిటీ తర్వాత 7.40 శాతం వడ్డీ రేటుతో చేతికి రూ. 5,56,500 వరకు అందుతుంది. అదే 60 ఏళ్లు పైబడిన ఒక సీనియర్ సిటిజన్ రూ. 5 లక్షలు జమ చేశారు అనుకుందాం. వారికి 7.90 శాతం వడ్డీ రేటుతో చేతికి మొత్తం రూ. 5,60,300 వరకు పొందుతారు.