గ్యాస్ ధరల నుంచి జీఎస్టీ వరకు.. జనవరి 1 నుంచి వచ్చే కీలక మార్పులివే

కొత్త సంవత్సరం 2025లో అడుగుపెట్టనున్నాయి. సాధారణంగా కొత్త నెల ప్రారంభంలో కొత్త రూల్స్, మార్పులు అమలులోకి వస్తుంటాయి. ఇక ఈ కొత్త ఏడాది తొలి రోజు నుంచే చాలా మార్పులు, నిబంధనలు అమలులోకి వస్తున్నాయి. ఆర్థిక పరమైన అంశాల్లో మార్పులపై ప్రజలపై అదనపు భారం పడనుంది. గ్యాస్ ధరలు, జీఎస్టీ, వస్తువుల ధరల పెంపు, ఫిక్స్‌డ్ డిపాజిట్ల వంటి కీలకమైన ఆర్థిక అంశాలు ఇందులో ఉన్నాయి. ఇది మీ జేబుకు చిల్లు పడేలా చేయవచ్చు. మరి ఆ అంశాల గురించి ఇప్పుడే మనం తెలుసుకుందాం.

ఎస్‌పీజీ గ్యాస్ సిలిండర్ ధరలు..

చమురు మార్కెటింగ్ కంపెనీలు ప్రతి నెల ఒకటో తేదీన ఎల్‌పీజీ గ్యాస్ సిలిండర్ ధరలను సమీక్షిస్తాయి. గత ఐదు నెలలుగా 19 కిలోల వాణిజ్య సిలిండర్ ధరలను పెంచుతూ వచ్చాయి. అయితే, 14 కిలోల గృహ వినియోగ సిలిండర్ ధరలు మారలేదు. అయితే, ఈ సారి భారీ మార్పులు వచ్చే అవకాశం ఉన్నట్లు తెలుస్తోంది. ధరలు పెంచితే అదనపు భారం పడనుంది.

ఫిక్స్‌డ్ డిపాజిట్ రూల్స్..

2025, జనవరి 1వ తేదీ నుంచి నాన్ బ్యాంకింగ్ ఫైనాన్షియల్ సంస్థలు, హౌసింగ్ ఫైనాన్స్ సంస్థల్లో ఫిక్స్‌డ్ డిపాజిట్లకు సంబంధించి కీలక మార్పులు రానున్నాయి. ఈ మేరకు కొద్ది రోజుల క్రితమే రిజర్వ్ బ్యాంక్ ఆఫ్ ఇండియా కీలక ఆదేశాలు జారీ చేసింది. ప్రజల నుంచి సేకరించే డిపాజిట్ల నియమాల్లో మార్పులు, లిక్విడ్ ఆస్తులను ఉంచే శాతం, డిపాజిట్లకు బీమా వంటివి మారనున్నాయి.

యూపీఐ 123పే..

డిజిటల్ పేమెంట్లలో యూపీఐ కీలక పాత్ర పోషిస్తోంది. దీనిని మరింత ప్రోత్సహించేందుకు యూపీఐ 123 పేను రిజర్వ్ బ్యాంక్ తీసుకొచ్చింది. అయితే, ఈ ట్రాన్సాక్షన్ల పరిమితిని రూ.5 వేల నుంచి రూ.10 వేలకు పెంచుతూ ఇటీవలే నిర్ణయం తీసుకుంది. ఇది జనవరి 1 నుంచే అమలులోకి రానుంది. అలాగే యూపీఐ 123పే అనేది స్మార్ట్ ఫోన్లతో పాటు ఫీచర్ ఫోన్లలోనూ అందుబాటులోకి రానుంది.

కార్ల ధరల పెంపు..

కొత్త కారు కొనుగోలు చేసే వారికి కొత్త ఏడాదిలో అదనపు భారం పడనుంది. 2025, జనవరి 1 నుంచి కార్ల ధరలు పెరుగుతున్నాయి. ఇప్పటికే టాటా మోటార్, మారుతీ సుజుకీ, బెంజ్, బీఎండబ్ల్యూ, ఆడి, హ్యుందాయ్, మహీంద్రా, కియా వంటి దిగ్గజ కంపెనీలన్నీ ప్రకటనలు చేశాయి. 2-4 శాతం మేర ధరలు పెంచుతున్నాయి.

టెలికాం కొత్త రూల్స్..

టెలికమ్యూనికేషన్స్ డిపార్ట్‌మెంట్ నిబంధనలు జనవరి 1 నుంచే అమలులోకి రానున్నాయి. భూగర్భ కమ్యూనికేషన్ ఇన్‌ఫ్రాస్ట్రక్చర్, నిర్వహణ ఇందులో ఉండనున్నాయి. దీంతో జియో, ఎయిర్టెల్, వొడాఫోన్, బీఎస్ఎన్ఎల్ వంటి టెలికాం కంపెనీల సేవలు మరింత మెరుగుపడనున్నాయి.

వస్తు సేవల పన్ను జీఎస్టీ

2025, జనవరి 1వ తేదీ నుంచి భారత్‌లో వ్యాపారాలు కఠినమైన జీఎస్టీ నిబంధనలతో నిర్వహించాల్సి ఉంటుంది. ఈ క్రమంలో జీఎస్టీ పోర్టల్‌లో భద్రతను పెంచేందుకు పన్ను చెల్లించే వారందరికీ మల్టీ ఫ్యాక్టర్ అథెంటికేషన్ తప్పనిసరి కానుంది. 180 రోజుల కంటే పాతవి కాని బేస్ డాక్యుమెంట్లపైనే ఇక ఇ-వే బిల్లులు జనరేట్ చేస్తారు. మోసాలు అరికట్టేందుకు ఈ విధానాన్ని తీసుకొస్తున్నారు.

అమెరికా వీసా నిబంధనల్లో మార్పులు..

జనవరి 1, 2025 నుంచి నాన్ ఇమ్మిగ్రెంట్ వీసా దరఖాస్తుల ఫీజు పెరుగుతోంది. అయితే, ఎక్స్‌ట్రా పీ లేకుండా ఒకసారి మాత్రమే యూఎస్ వీసా అపాయింట్మెంట్ రీషెడ్యూల్ చేసుకోవచ్చు. అదనపు రీషెడ్యూల్స్ కోసం దరఖాస్తు రుసుములు, ఇతర ఫీ చెల్లించాలి. హెచ్‌1హీ వీసా ఓవరాల్ జనవరి 17, 2025 నుంచి అమలులోకి వస్తుంది. దీంతో సులువుగా హెచ్1బీ వీసా అప్గ్రేడ్ చేసుకోవచ్చు.